តារាចម្រៀង និងជាគណៈកម្មការផ្តល់ពិន្ទុក្នុងកម្មវិធីប្រឡងចម្រៀង Cambodian Idol សុខ សីឡាលីន បានសម្រក់ទឹកភ្នែក ដោយសារឃើញបេក្ខជនប្រឡងមួយរូប
រាជធានីភ្នំពេញ ៖ តារាចម្រៀង និងជាគណៈកម្មការផ្តល់ពិន្ទុក្នុងកម្មវិធីប្រឡងចម្រៀង Cambodian Idol សុខ សីឡាលីន បានសម្រក់ទឹកភ្នែក ដោយសារឃើញបេក្ខជនប្រឡងមួយរូបឡើងបញ្ចេញសមត្ថភាពច្រៀង ដោយអមជាមួយនឹងការលេងហ្គីតាដោយផ្ទាល់ កាលពីយប់ថ្ងៃទី១២ ខែមិថុនា ឆ្នាំ២០២២ ។
បេក្ខជនមកពីខេត្តសៀមរាប មានឈ្មោះ លី ប៊ីលី បានឡើងបកស្រាយចម្រៀងបទ «មនុស្សប្រុសពេលយំអាក្រក់មើលខ្លាំងណាស់» បានយ៉ាងល្អ ដោយបានប្រើប្រាស់សម្លេងយ៉ាងអន្លង់អន្លោច ជាមួយនឹងការលេងហ្គីតាបានយ៉ាងល្អ ដែលនោះនាំឲ្យ សុខ សីឡាលីន ទប់ទឹកភ្នែកមិនបានក៏ស្រក់ចេញមក ដោយសារនាងបាននឹកឃើញដល់មនុស្សសំខាន់ម្នាក់។
មនុស្សប្រុសដែលលេងហ្កីតាបែបនេះ គឺនាងបាននឹកឃើញទៅដល់ឪពុករបស់នាងដែលទើបតែទទួលមរណភាពកាលពីពេលថ្មីៗនេះ ដោយក្នុងនោះឪពុករបស់នាងក៏ជាអ្នកជំនាញហ្គីតាសូឡូជើងចាស់ម្នាក់ផងដែរ ខណៈពេលដែលនាងតែងតែលង់អារម្មណ៍ចំពោះមនុស្សប្រុសដែលឈរលេងហ្គីតាបែបនេះផងដែរ។
ក្រោយការចាក់ផ្សាយបង្ហាញពីបេក្ខជនប្រឡងខាងលើ បញ្ចេញសមត្ថភាពចប់ តារាចម្រៀងរូបនេះក៏បានបង្ហោះរូបភាពសកម្មភាពមួយចំនួនកាលពីឪពុករបស់នាងនៅមានជីវិត ដោយអមជាមួយសារតាមគណនេយ្យហ្វេសប៊ុករបស់ខ្លួនថា «រូបភាពលោកឪពុកគ្រប់យ៉ាង ការបណ្តុះបណ្តាលគ្រប់យ៉ាង តាំងពីយើងនៅក្រលំបាក ដែលកូនខំតស៊ូមកដល់ពេលនេះ បែរជាលោកឪពុកទៅចោលកូន តែកូនក៏អស់ចិត្ត ព្រោះកូនប្រណិបត្តមើលថែលោកគ្រប់យ៉ាង កូនព្យាយាមអស់ហើយ»។
នាងបញ្ជាក់ថា «លោកឪពុក ទិត្យ សុផាត តន្រី្តករកាន់ហ្គីតាសូឡូ 28-01-22 ប្រាំខែហើយដែលបាត់លោកពីក្នុងផ្ទះយើងទៅ យប់នេះរឹតតែធ្វើអោយកូននឹកលោកខ្លាំងណាស់ ពេលមានបេក្ខជន Cambodian idol លេងហ្គីតាបានយ៉ាងល្អ មានតែវិញ្ញាណក្ខ័ន្ធលោកឪពុកទេ ដែលយល់ពីអារម្មណ៍កូន គ្មានអ្នកផ្សេងអាចយល់បាន»។
តាមរយះសារខាងលើនេះ បញ្ជាក់ថា សុខ សីឡាលីន នៅតែមានចិត្តអាឡោះអាល័យ និងនឹកដល់ឪពុកយ៉ាងខ្លាំង បើទោះបីជាឪពុករបស់នាងបានស្លា.ប់បាត់ទៅហើយក្តី ហើយអ្វីដែលនាងកាន់តែក្តុកក្តួល កាន់តែខ្លាំងនៅពេលដែលនាងបានឃើញមនុស្សប្រុសលេងហ្គីតាបានល្អម្តងៗ។
ជាការកត់សម្គាល់ឪពុករបស់តារាចម្រៀង សុខ សីឡាលីន ឈ្មោះ ទិត្យ សុផាត បានទទួលមរណភាពកាលពីថ្ងៃទី២៨ ខែមករា ឆ្នាំ២០២២ ដោយសារជំងឺ។ កាលនៅរស់ក្រៅពីជាអ្នកតន្ត្រីករយ៉ាងពូកែមួយរូបឪពុករបស់ សុខ សីឡាលីន ក៏ជាមន្ត្រីរាជការបម្រើការងារជាទាហ៊ានថ្នាក់អនុសេនីយ៍ឯកម្នាក់ផងដែរ៕
ចែករំលែកព័តមាននេះ