ខេត្តស្វាយរៀង ៖ សាកសពបុរសម្នាក់មានអាយុជាង៣០ឆ្នាំ ត្រូវប្រជាពលរដ្ឋប្រទះឃើញនៅក្នុងគុម្ពោតព្រៃ ជិតគល់ស្ពានទន្លៀងទី២ ដែលត្រូវសង្ស័យថា អាចជាករណីឃាតកម្មវាយសម្លាប់ រួចយកមកប្លុងចោល បង្កឱ្យភ្ញាក់ផ្អើលដល់ប្រជាពលរដ្ឋ និងសមត្ថកិច្ចចោមរោមមើល ។
ហេតុការណ៍ប្រទះឃើញកើតឡើង កាលពីវេលាម៉ោង១២ និង៤០នាទីថ្ងៃទី៩ វិច្ឆកា ជាប់និងគល់ស្ពានទន្លៀងទី២ តាមបណ្តោយផ្លូវជាតិ១ ក្នុងភូមិទន្លៀង ឃុំរមាំថ្កោល ស្រុកស្វាយទាប ខេត្តស្វាយរៀង។
ប្រភពឱ្យដឹងថា ជនរងគ្រោះអាចស្លាប់ បណ្តាលមកពីត្រូវគេវ៉ៃស្លាប់នៅកន្លែងផ្សេង ហើយយកសពមកប្លុងចោលនៅទីតាំងកើតហេតុខាងលើ ពីព្រោះសពមានស្លាកស្នាម បែកលើចញ្ចើមប្រហែល១សង់ទីម៉ែត្រ ប្រវែងប្រហែល២សង់ទីម៉ែត្រ និងដៃសងខាងមានស្លាកស្នាមជាំមេជើងមានរលាត់ដាច់ស្នាមដូចគេអូស និងស្នាមជាច្រើនកន្លែងទៀត តែក៏មានអ្នកខ្លះសង្ស័យថា អាចបណ្តាលមកពីស្លាប់ដោយជំងឺអ្វីមួយដែរ ។
រហូតដល់ម៉ោង៤ និង១០នាទីរសៀលថ្ងៃទី១០ វិច្ឆិកា ទើបសមត្ថកិច្ចស្រាវជ្រាវរកឃើញអត្តសញ្ញាណ ។ បើតាមក្រុមគ្រួសារសពបានប្រាប់ថា ជនរងគ្រោះឈ្មោះមិន ពាន អាយុ៤១ឆ្នាំ មានទីលំនៅភូមិធ្មត់ ឃុំស្វាយជ្រំ ខេត្តស្វាយរៀង ។ កាលពីថ្ងៃទី៧ វិច្ឆិកាជនរងគ្រោះខាងលើ មានអាការៈចុកពោះ ហើយក្រុមគ្រួសារបាននាំមកមន្ទីរពេទ្យខេត្តស្វាយរៀង ហើយគ្រូពេទ្យបានពិនិត្យឃើញថា មានជង្ងឺពោះវៀនដុះខ្នែង ហើយពុំទាន់ព្យាបាលបាននោះទេ ដោយរង់ចាំ២ថ្ងៃទៀត ទើបវះកាត់ពោះវៀនដុះខ្នែងបាន។
លុះដល់ថ្ងៃទី៨ វិច្ឆិកា ស្រាប់តែបាត់ជនរងគ្រោះ ហើយជនរងគ្រោះក៏មានជំងឺប្រកាច់ (ជង្ងឺឆ្កួតជ្រូក) និងសរសៃប្រសាទ ដែរ ត្រូវបងប្អូនខំដើររកទាំងយប់ទាំងថ្ងៃ ប៉ុន្តែរកមិនឃើញសោះ ។ លុះដល់ថ្ងៃទី៩ វិច្ឆកា សមត្ថកិច្ចទូរស័ព្ទប្រាប់ថា មានប្រទះសាកសពមួយ ក៏នាំគ្នាមកមើល ទើបដឹងថា ជាប្តីដែលបាត់ខ្លួននោះ ។ ករណីជនរងគ្រោះស្លាប់ខាងលើនេះ សមត្ថកិច្ចសន្និដ្ឋានថា សង្ស័យជាករណីឃាដកម្ម ក៏ប៉ុន្តែដោយជនរងគ្រោះមានជំងឺ ត្រូវសមត្ថកិច្ចកំពុងស្រាវជ្រាវបន្ត ។
ចែករំលែកព័តមាននេះ