រាជធានីភ្នំពេញ ៖ ក្រុមគ្រូពេទ្យឯកទេសផ្នែកជំងឺទឹកនោមផ្អែមបានថ្លែងថា បច្ចុប្បន្ននេះ អ្នកជំងឺកើតរោគជំងឺទឹកនោមផ្អែមនៅទូទាំងពិភពលោក និងពិសេសនៅកម្ពុជាកំពុងគំរាមកំហែងអាយុជីវិត ហើយ បើពុំមានវិធានការទប់ស្កាត់ទេ អ្នកជំងឺអាចប្រឈមបាត់បង់ជីវិតបានផង។
លោកវេជ្ជបណ្ឌិត ស៊ុម សេដ្ឋា គ្រូពេទ្យឯកទេសផ្នែកជំងឺទឹកនោមផ្អែម នៅមន្ទីរពេទ្យកាល់ម៉ែត ប្រាប់បណ្តាញសារព័ត៌មាននៅសណ្ឋានគារភ្នំពេញ កាលពីថ្មីៗមកនេះថា ជំងឺទឹកនោមផ្អែមអាចជាកត្តាហានិភ័យទៅតាមអាយុ ប្រវត្តិគ្រួសារជំងឺលើសសម្ពាធឈាម កត្តាអាហារូបត្ថម្ភ ទម្លាប់រស់នៅ និងការលើសទម្ងន់។
លោកបញ្ជាក់ថា «ជំងឺទឹកនោមផ្អែមអាចគ្មានអាការៈទាំងស្រុង ឬមានអាការៈតិចតួច ព្រោះកំរិតគ្លុយកូស ឬជាតិស្ករ នៅក្នុងឈាមខ្ពស់ពេក ប៉ុន្តែប្រសិនបើមិនបានទទួលការព្យាបាលជំងឺនេះ នឹងអាចធ្ងន់ធ្ងរឡើង ដូចជាជំងឺនោមច្រើន ការស្រេចទឹកជាប្រចាំ ការនោមច្រើននៅពេលយប់ ការឃ្លានអាហារជាប្រចាំ ភាពល្វើយជាប្រចាំ កំរិតគ្លុយកូសខ្ពស់នៅក្នុងឈាម កម្រិតជាតិស្ករខ្ពស់ក្នុងទឹកនោម ការធ្វើទុក្ខការងាយឆ្លងជំងឺ និងការស្រកទម្ងន់»។
ជាមួយគ្នានោះដែរ លោកវេជ្ជបណ្ឌិតបានធ្វើការណែនាំផងថា មនុស្សចាប់ពីវ័យ៥០ឆ្នាំឡើងទៅ គួរទៅធ្វើការពិនិត្យសុខភាពយ៉ាងតិចម្តង ឬពីរដងក្នុងមួយឆ្នាំ ដើម្បីតាមដានសម្ពាធឈាម និងកម្រិតជាតិស្ករក្នុងឈាម។ ក្រៅពីនេះទាំងអ្នកដែលគ្មានជំងឺ និងអ្នកមានជំងឺ គប្បីការពារ និងថែរក្សាសុខភាពឲ្យមានស្ថេរភាពពីជំងឺទឹកនោមផ្អែម និងសម្ពាធឈាម ដោយមិនមែនតាមតែការព្យាបាលខាងវេជ្ជសាស្ត្រតែម្យ៉ាងទេ គឺថែមទាំងត្រូវយកចិត្តទុកដាក់លើសុខភាពដោយធ្វើលំហាត់ប្រាណឲ្យបានទៀតទាត់ កាត់បន្ថយការជក់បារី កាត់បន្ថយការសេពគ្រឿងស្រវឹង និងកាត់បន្ថយអាហារដែលមានជាតិប្រៃ។
ចំណែកលោកវេជ្ជបណ្ឌិត លី គាត ជំនាញផ្នែកជំងឺបេះដូងនៅមន្ទីរពេទ្យកាល់ម៉ែត បានឱ្យដឹងដែរថា ប្រជាជនជាទូទៅមិនបានទៅពិនិត្យសុខភាពឲ្យបានត្រឹមត្រូវគ្រប់ៗគ្នានោះទេ ព្រោះទិន្នន័យបានបញ្ជាក់ថា ក្នុងចំណោមអ្នកជំងឺលើសសម្ពាធឈាម៤៥,៥ភាគរយ មានតែ២៨,៦ភាគរយ ដែលបានធ្វើរោគវិនិច្ឆ័យ រីឯអ្នកជំងឺទឹកនោមផ្អែមសរុប៥០,៣ភាគរយ មានតែ២៣,៩ភាគរយ ដែលបានទៅធ្វើរោគវិនិច្ឆ័យបានទៀងទាត់។
អ្នកស្រី ដាវ ធូង៉ា (Ms. Dao Thu Nga) នាយកគ្រប់គ្រងក្រុមហ៊ុនសាណូហ្វីកម្ពុជា បានបញ្ជាក់នៅក្នុងអង្គសិក្ខាសាលានេះថា «ក្រុមហ៊ុនសាណូហ្វីដែលជាក្រុមហ៊ុនឱសថឈានមុខគេលើពិភពដែលតែងតែយល់ចិត្តទុកដាក់លើអ្នកជំងឺជាចំបង។ លើសពីនេះទៅទៀត ក្រុមហ៊ុនសាណូហ្វីមានគំរោងនឹងបន្តសកម្មភាពរបស់ខ្លួនលើការអប់រំចំនេះដឹងទាក់ទងនឹងវិទ្យាសាស្ត្រនឹងសុខភាព ហើយជំងឺដែលយើងផ្តោតសំខាន់នោះ គឺជំងឺមិនឆ្លង នឹងជំងឺរុំារៃផងដែរ ជាហេតុផលដែលនាំអោយយើងបានរៀបចំព្រឹត្តិការណ៍នាថ្ងែនេះឡើង ។
លោកវេជ្ជបណ្ឌិត ទូច ឃុន ឯកទេសជំងឺទឹកនោមផ្អែម នៅមជ្ឃមណ្ឌលជំងឺទឹកនោមផ្អែម កម្ពុជា-កូរ៉េ នៃមន្ទីរពេទ្យព្រះកុសុមៈ បានពន្យល់ថា ជំងឺស្ទះសរសៃឈាមលើអ្នកជំងឺទឹកនោមផ្អែ មគឺជាការត្បៀតសរសៃឈាមនៃអវៈយវៈខាងលើ ជាពិសេសផ្នែក.ករបស់មនុស្ស និងផ្នែកអវៈយវៈខាងក្រោម ។
លោកវេជ្ជបណ្ឌិតបានឲ្យដឹងទៀតថា អ្នកជំងឺទឹកនោមផ្អែមកើតឡើងច្រើនបំផុតទៅលើមនុស្សវ័យចំណាស់ ចាប់ពីអាយុ៥៥ឆ្នាំឡើងទៅ ហើយក៏ជាអ្នកដែលងាយរងគ្រោះ និងមានបញ្ហាស្ទះសរសៃឈាមច្រើនជាងគេផងដែរ។
បើយោងតាមអង្គការសុខភាពពិភពលោក (WHO) ជារៀងរាល់១០នាទីមានមនុស្សម្នាក់នៅទូទាំងពិភពលោកបានបាត់បង់ជីវិត ដោយសារជំងឺទឹកនោមផ្អែមនេះ។ ចំណែកឯការស្ទង់មតិ STEPS ដែលធ្វើឡើងដោយក្រសួងសុខាភិបាលនៅឆ្នាំ២០១០ ក៏បង្ហាញឲ្យឃើញដែរថា ការរាតត្បាតនៃជំងឺសម្ពាធឈាមខ្ពស់មានប្រមាណ២,៣ភាគរយនៅតំបន់ជនបទ និង៥,៦ភាគរយនៅទីប្រជុំជន។ ក្រុមមនុស្សដែលមានអាយុចន្លោះ៦៥ និង៦៩ឆ្នាំ ជាក្រុមមនុស្សដែលរងការប៉ះពាល់ខ្លាំងជាងគេដែលមានអាត្រាកើតជំងឺ៦ភាគរយ។ ចំពោះតួលេខទាំងនេះ កើនឡើងឥតឈប់ឈរពីមួយឆ្នាំទៅមួយឆ្នាំ៕
ចែករំលែកព័តមាននេះ