រាជធានីភ្នំពេញ ៖ តារាចម្រៀងនាង សុវត្ថិឌី ធារិកា បានសម្តែងក្តីរំភើបឥតឧបមា ក្រោយពេលឃើញប្រមុខដឹងនាំសម្តេចតេជោ ហ៊ុន សែន បានថ្លែងសារចូលរួមរំលែកទុក្ខ និងលើកទឹកចិត្ត ក្រោយមរណភាពរបស់ឪពុកម្តាយនាង ដោយសារគ្រោះថ្នាក់ចរាចរណ៍។
តារាចម្រៀងរូបនេះ បានចាត់ទុកការចូលរួមពីសំណាក់សម្តេចតេជោនាពេលនេះ គឺជាការផ្តល់កិត្តិយសដ៏ធំធេងសម្រាប់រូបនាង និងបានយល់អារម្មណ៍របស់នាងក្នុងពេលបាត់បង់គ្រួសារត្រឹមមួយប៉ប្រិចភ្នែកបែបនេះ។ ហើយមរណភាពឪពុកម្តាយរបស់តារាចម្រៀងនាង សុវត្ថិឌី ធារិកា ដោយសារគ្រោះថ្នាក់ចរាចរណ៍នេះ បានក្លាយជាដំណឹងផ្ទុះយ៉ាងកក្រើកពេញផ្ទៃប្រទេស ខណៈពេលដែលមហាជន និងសិល្បករជាច្រើនបានសម្តែងការភ្ញាក់ផ្អើល និងសម្តែងក្តីក្តុកក្តួលយ៉ាងខ្លាំង ចំពោះរឿងរ៉ាវដែលបានកើតឡើង និងនឹកស្មានមិនដល់នេះ។
មិនត្រឹមតែធ្វើមហាជនសម្តែងក្តីសោកស្តាយ និងរំលែកទុក្ខសម្រាប់តារាចម្រៀងរូបនេះឡើយ ប៉ុន្តែដំណឹងដ៏សោកសៅនេះ ក៏បានធ្វើអោយថ្នាក់ដឹកនាំសម្តេចតេជោ ហ៊ុន សែន បានចូលរួមសម្តែងការសោកស្តាយ និងរំលែកទុក្ខដល់ សុវត្ថិឌី ធារិកា ផងដែរ។
សម្តេចតេជោ បានចូលទៅខំមិនពីក្រោមរូបភាពជុំវិញការបង្ហោះរឿងរ៉ាវមរណភាពឪពុកម្តាយ សុវត្ថិឌី ធារិកា ថា «សូមចូលរួមមរណទុក្ខជាមួយចៅស្រី»។ សម្តេចក៏បានលើកទឹកចិត្ត សុវត្ថិឌី ធារិកា ដែរថា «រឹងមាំឡើងចៅ ផ្លូវដែលចៅត្រូវធ្វើដំណើរនៅវែងឆ្ងាយទៀត។ តានិងយាយយល់ពីទុក្ខសោក និងអារម្មណ៍របស់ចៅនៅពេលនេះ ព្រោះពេលថ្មីៗនេះ តា និងយាយក៏ទើបតែបាត់បង់បងប្រុសដែលបែកគ្នាមិនបានលាគ្នា និងនិយាយគ្នាសូម្បីមួយម៉ាត់ ដូចករណីចៅស្រីដែរ»។
ជាការកត់សម្គាល់ ក្រោយពីឃើញការចូលរួមរំលែកទុក្ខពីសម្តេចតេជោនាពេលនេះ សុវត្ថិឌី ធារិកា បានសម្តែងក្តីរំភើបឥតឧបមា និងបានឆ្លើយតបវិញថា «ក្នុងនាមខ្ញុំជាកូន លោកឪពុក មាស សុវត្ថិឌី និងអ្នកម្តាយ ពៅ ពុទ្ធារី មានក្តីរំភើបឥតឧបមា ដែលសម្តេចពុកនិងសម្តេចម៉ែ បានផ្តល់មហាកិត្តិយសជាសាររំលែកទុក្ខ និងបានយល់ពីអារម្មណ៍បាត់បង់របស់ខ្ញុំ និងក្រុមគ្រួសារក្នុងគ្រានេះ»។
នាងបញ្ជាក់ថា «សម្តេចពុកនិងសម្តេចម៉ែ ជាថ្នាក់ដឹកនាំដែលយល់ពីទុក្ខធុរៈ និងការលំបាករបស់រាស្ត្រគ្រប់ស្រទាប់វណ្ណៈ។ ជាមួយគ្នានេះ នាងខ្ញុំសូមថ្លែងអំណរព្រះគុណ ដល់សម្តេចពុកនិងសម្តេចម៉ែ ជាអនេកប្បការ សូមជូនពរសម្តេចទាំងទ្វេរជួបតែពុទ្ធពរទាំងបួនប្រការ ៖ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ» ៕
ចែករំលែកព័តមាននេះ