ខេត្តស្វាយរៀង ៖ ក្រុមការងារនៃអគ្គនាយកដ្ឋានសុខភាពសត្វ និងផលិតកម្មសត្វនៃក្រសួងកសិកម្មរុក្ខាប្រមាញ់ និងនេសាទ ចុះបង្ក្រាបក្រុមឈ្មួញដែលលួចនាំជ្រូកយួនឆ្លងដែន ដោយខុសច្បាប់ចូលមករដ្ឋបាលខេត្តស្វាយរៀង បម្រុងចូលវ៉ៃប៉ាស្ព័យដឹកទៅរាជធានីភ្នំពេញ ត្រូវបង្ក្រាប ។
ករណីនេះបានកើតឡើង នៅវេលម៉ោង១០និង១០នាទីយប់ នាថ្ងៃទី២៥ ខែឧសភានេះ នៅលើកំណាត់ផ្លូវជាតិលេខ៣១៤ ស្ថិតក្នុងភូមិតាណ សង្កាត់ស្វាយតឿ ក្រុងស្វាយរៀង ។
បើតាមសមត្ថកិច្ចបានឲ្យដឹងថា ដោយមានការសម្របសម្រួលនីតិវិធីពីឯកឧត្តមព្រះរាជអាជ្ញានៃអយ្យការអមសាលាដំបូងខេត្តស្វាយរៀង ឲ្យក្រុមការងារអន្តរាគមន៍បង្ក្រាបបទល្មើសចលនាសត្វនៃអគ្គនាយកដ្ឋានសុខភាពសត្វ និងផលិតកម្មសត្វ សហការជាមួយការិយាល័យផលិតកម្ម និងបសុព្យាបាលនៃមន្ទីរកសិកម្មរុក្ខាប្រមាញ់ និងនេសាទខេត្តស្វាយរៀង ចុះស្ទាក់ចាប់រថយន្ត០១គ្រឿង ម៉ាក Ssangyong istana ពណ៌ទឹកប្រាក់ ជាប្រភេទរថយន្តដឹកឣ្នកដំណើរ១៥កៅឣី ពាក់ស្លាកលេខភ្នំពេញ2N -5634 ដែលដឹកសត្វជ្រូករស់ចំនួន២០ក្បាល ដោយនាំចូលពីប្រទេសវៀតណាមមកកាន់ប្រទេសកម្ពុជា តាមច្រករបៀងនៃប៉ុស្តិ៍វរៈការពារព្រំដែនប្រាសាទ សង្កាត់ប្រាសាទ ក្រុងបាវិត ខេត្តស្វាយរៀង បម្រុងនឹងយកទៅចែកចាយនៅក្រុងស្វាយរៀង ដោយគ្មានលិខិតអនុញ្ញាតិអ្វីទាំងអស់ ។
ប្រភពបន្តថា ក្រុមការងារបានចុះល្បាតក៏ប្រទះឃើញរថយន្តដឹកជ្រូករស់១គ្រឿង មានការសង្ស័យជ្រូកនាំចូលពីប្រទេសវៀតណាមដោយខុសច្បាប់ទើបឃាត់នៅលើផ្លូវជាតិលេខ៣១៤ ភូមិតាណរ សង្កាត់ស្វាយតឿ ក្រុងស្វាយរៀង ខេត្តស្វាយរៀង ដើម្បីសាកសួរ ក៏ប៉ុន្តែក្រុមឈ្មួញ និងអ្នកបើកបររថយន្តល្មើសបាននាំគ្នាបើកទ្វារថយន្តរត់គេចខ្លួនបាត់ភ្លាមៗបន្សល់ទុករថយន្ត និងសត្វជ្រូកនៅលើរថយន្ត ។
ក្រុមការងារបានរាយការណ៍ជូនឯកឧត្តមព្រះរាជអាជ្ញនៃអយ្យការអមសាលាដំបូងខេត្តស្វាយរៀងដើម្បីសុំគោលការណ៍ ។ បន្ទាប់មកលោកព្រះរាជអាជ្ញារង នៃអយ្យការអមសាលាដំបូលខេត្តបានដឹកនាំកម្លាំងចុះទៅនាំយកបទល្មើស និងវត្ថុតាងទាំងនោះ «រថយន្ត និងសត្វជ្រូក»ទៅរក្សាទុកនៅទីតាំងចត្តាឡីស័កសត្វរបស់មន្ទីរកសិកម្មរុក្ខាប្រមាញ់ និងនេសាទខេត្តស្វាយរៀង ដើម្បីចាត់ការទៅតាមនីតិវិធីច្បាប់ ។
លោកប៉ែន ចន្ធី ប្រធានការិយាល័យផលិតកម្ម និងបសុព្យាបាលនៃមន្ទីរកសិកម្មរុក្ខាប្រមាញ់ និងនេសាទខេត្តបានមានប្រសាសន៍នៅព្រឹកថ្ងៃទី២៦ ឧសភានេះថា ម្ចាស់ជ្រូកបានរត់គេចខ្លួនបាត់ ដូច្នេះមន្ត្រីជំនាញបានយកសត្វជ្រូករស់២០ក្បាលទៅរក្សាទុកនៅទីតាំងចត្តាឡីសក័សត្វនៃមន្ទីរកសិកម្មខេត្ត ដើម្បីបូមឈាមយកសំណាកបញ្ជូនទៅមន្ទីរពិសោធន៍រាជធានីភ្នំពេញ បើមានរោគសញ្ញាមានជម្ងឺ គឺយកទៅដុតកម្ទេចចោល ប្រសិនបើគ្មានជម្ងឺត្រូវប្រកាស់រកម្ចាស់ជ្រូកមកទទួលខុសត្រូវធ្វើការផាកពិន័យតាមច្បាប់ រួចប្រគល់ឲ្យម្ចាស់វិញក៏ប៉ុន្តែបើគ្មានអ្នកចូលមកដោះស្រាយនោះទេ គឺមន្ទីរសុំគោលការណ៍ទៅលោកព្រះរាជអាជ្ញា ដើម្បីលក់ឡាយឡុងយកថវិកាចូលរដ្ឋ ។
ទាក់ទិនករណីនេះដែរ មហាជនដែលរស់នៅជិតព្រំដែន ប៉ុស្តិ៍វរៈការពារព្រំដែនប្រាសាទ សង្កាត់ប្រាសាទបានឲ្យដឹងថា ឈ្មួញបានត្រូវគ្នាជាមួយសមត្ថកិច្ចប្រចាំការប៉ុស្តិ៍វរៈការពារព្រំដែនប្រាសាទ លួចបើកឲ្យឈ្មួញ០៣ក្រុម នាំជ្រូកពីប្រទេសយួនឆ្លងដែនចូលមកតាមច្រករបៀងប្រាសាទនេះ រយៈពេលកន្លះខែមកហើយ គឺដឹកទាំងយប់ទាំងថ្ងៃបីពេលស្មើបីជើង ។
ដោយក្នុង១ថ្ងៃចាប់ពី២០០ក្បាលទៅ៥០០ក្បាល យកទៅចែកចាយតាមឡដ៏សត្តឃាដ ក្នុងខេត្តខ្លះសាងរថយន្តដឹកទៅរាជធានីភ្នំពេញ។ហើយពេលសត្វជ្រូករស់ទាំងនោះឡើងលើរថយន្តធុនធំរួច គឺជារបស់ក្រុមហ៊ុនមានច្បាប់ដោយប្រាប់គេថា ជ្រូកប្រមូលទិញពីអ្នកស្រុកចិញ្ចឹមតាមផ្ទះដោយបោកគេស្រស់ៗតែម្តង ។
ព័ត៌មានបន្ថែមមានផ្សាយនៅលើកាសែតកោះសន្តិភាព ៕
ចែករំលែកព័តមាននេះ