រាជធានីភ្នំពេញ ៖ តារាសម្តែងជើងចាស់តាំងពីទសវត្សន៍ឆ្នាំ៨០ និង៩០ លោក រិទ្ធ សារី កំពុងតែញាំញីដោយសារជំងឺ និងភាពចាស់ជរា ខណៈពេលលោកក៏កំពុងជួបនឹងបញ្ហាជីវភាពខ្វះខាតសម្រាប់ចំណាយលើការព្យាបាលផងដែរ។ ស្ថិតក្នុងស្ថានភាពដ៏លំបាកនេះ អតីតតារាសម្តែង លោក ស៊ុក សុភា ក៏បានចេញមុខប្រកាសស្វែងរកថវិកាពីសប្បុរសជននានា ដើម្បីជួយឧបត្ថម្ភទៅដល់តារាជើងចាស់លោក រិទ្ធ សារី។
លោក ស៊ុក សុភា បានបង្ហោះសារតាមហ្វេសប៊ុក ដោយអមភ្ជាប់ជាមួយនឹងរូបភាពលោក រិទ្ធ សារី កំពុងសម្រាកព្យាបាលនៅមន្ទីរពេទ្យថា តារាភាពយន្ដជើងចាស់ដ៏ល្បី លោកពុក រិទ្ធ សារី សព្វថ្ងៃមានអាយុ៨០ជាងឆ្នាំ ហើយលោកពុកកំពុងមានជំងឺសម្រាកព្យាបាលនៅមន្ទីពេទ្យខេត្តបាត់ដំបង ។ ហើយនៅពេលនេះ លោកពុកអស់លទ្ធភាពក្នុងការព្យាបាលជំងឺ ហើយលោកពុកសុំមកសម្រាកនៅផ្ទះវិញ អាណិតលោកពុកណាស់លោកអើយ។
លោក ស៊ុក សុភា បង្ហោះទៀតថា ខ្ញុំបាទនឹងភរិយាព្រមទាំងកូនៗ បានជូនថវិកាលោកពុកខ្លះដែរ ហើយប្រសិនបើបងប្អូនចង់ចូលរួមជាថវិកាជូនគាត់ អាចទាក់ទងមកខ្ញុំបាទបាន ។
គួរបញ្ជាក់ថា ដោយសារឃើញភាពលំបាកតារាសម្តែងជើងចាស់លោក រិទ្ធ សារី សម្តេចតេជោនាយករដ្ឋមន្ត្រី ក៏បានផ្តល់ថវិកាចំនួន១ម៉ឺនដុល្លារដល់លោក រិទ្ធ សារី ផងដែរ។
ជាការកត់សម្គាល់នេះ នេះមិនមែនជាលើកទីមួយទេ ដែលលោក រិទ្ធ សារី បានចូលមកសម្រាកព្យាបាលនៅមន្ទីរពេទ្យ ពោលគឺកន្លងមក លោកក៏ធ្លាប់ចូលសម្រាកព្យាបាលនៅក្នុងមន្ទីរពេទ្យបាត់ដំបងផងដែរ។ ក្នុងភាពចាស់ជរា លោក រិទ្ធ សារី បានពើប្រទះនូវជំងឺត្បៀតសរសៃឈា.មខួរក្បាល ជំងឺរលាលក្រពះ និងជំងឺមួយចំនួនទៀត ខណៈពេលជំងឺទាំងអស់នេះបានញាំញីរូបលោកអស់ជាច្រើនឆ្នាំមកហើយ។ បន្ទាប់ពីក៏សម្រេចចិត្តចាកចេញពីអាជីពសិល្បៈក្នុងអំឡុងឆ្នាំ២០១២មក លោក រិទ្ធ សារី ក៏បានធ្វើដំណើរមករស់នៅក្នុងខេត្តបាត់ដំបងជាមួយភរិយាទី២ របស់លោកនៅទីនេះ។
ជីវភាពនៅក្នុងខេត្តបាត់ដំបងនេះ លោកត្រូវរស់ដោយពឹងផ្អែកទាំងស្រុងទៅលើកូនៗក្រោយរបស់លោកដែលភាគច្រើនជាអ្នកធ្វើការជាជាងសំណង់។ កាលលោកនៅមានកម្លាំងនោះលោកក៏ធ្លាប់ត្រូវបានផលិតករមួយចំនួនហៅថតម្តងម្កាលដែរ ប៉ុន្តែការថតនោះមិនសូវជាទទួលបានកម្រៃច្រើនឡើយ។ យ៉ាងណាកន្លងមក លុយដែលបានពីការថត និងការជួយពីសប្បុរសជននានានោះ លោកតែងតែផ្សែផ្សំទុកដាក់សម្រាប់ថ្លៃព្យាបាលជំងឺរបស់លោក ដែលរហូតមកទល់ពេលនេះ ថវិកាទាំងអស់នោះបានចំណាយគ្មានសល់អ្វីឡើយ។
បញ្ហាខាងលើនេះ បានធ្វើអោយលោកសម្តែងក្តីបារម្ភយ៉ាងខ្លាំង ព្រោះស្ថានភាពជំងឺលោកត្រូវចំណាយថវិកាច្រើនសម្រាប់ព្យាបាល ខណៈពេលលោកកំពុងតែខ្វះខាត។ ទោះជាយ៉ាងណា គេរំពឹងសប្បុរសជនទាំងក្នុង និងក្រៅប្រទេស ដែលទទួលបានដំណឹងខាងលើនេះ អាចនឹងចេញជួយលោក រិទ្ធ សារី ជាបន្តបន្ទាប់ ដើម្បីអោយលោកបានបន្តរស់ក្នុងជីវិតដែលនៅសេសសល់ចុងក្រោយនេះ៕
ចែករំលែកព័តមាននេះ