ខេត្តសៀមរាប ៖ កម្លាំងជំនាញផែនព្រហ្មទណ្ឌ នៃស្នងការដ្ឋាននគរបាលខេត្តសៀមរាប នាវេលាម៉ោង១៧ និង២០នាទី ថ្ងៃទី១៨ ខែឧសភា ឆ្នាំ២០២២ បានធ្វើការឃាត់ខ្លួនជនជាតិអង់គ្លេសម្នាក់…
ខេត្តសៀមរាប ៖ កម្លាំងជំនាញផែនព្រហ្មទណ្ឌ នៃស្នងការដ្ឋាននគរបាលខេត្តសៀមរាប នាវេលាម៉ោង១៧ និង២០នាទី ថ្ងៃទី១៨ ខែឧសភា ឆ្នាំ២០២២ បានធ្វើការឃាត់ខ្លួនជនជាតិអង់គ្លេសម្នាក់ នៅចំណុចមុខបន្ទប់ជួល ស្ថិតនៅភូមិបឹងដូនប៉ា សង្កាត់ស្លក្រាម ក្រុង/ខេត្តសៀមរាប ករណីបង្កហិ.ង្សាដោយចេតនា មានស្ថានទម្ងន់ទោស (យកញញួរវា.យស្ត្រីរងគ្រោះម្នាក់) ។
លោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលដឹកនាំផែនព្រហ្មទណ្ឌ បានអោយដឹងថា ជនសង្ស័យឈ្មោះ JON LEON LOV ភេទប្រុស អាយុ៥៧ឆ្នាំ ជាជនជាតិអង់គ្លេស គ្មានលិខិតឆ្លងដែនជាប់ខ្លួន គ្មានមុខរបរ ស្នាក់នៅទីតាំងកើតហេតុខាងលើ បានធ្វើសកម្មភាពយកញញួរ ក្បាលដែក ដងជ័រ វាយទៅលើជនរងគ្រោះឈ្មោះ អ៊ុយ សូរិយា ភេទស្រី អាយុ៣៨ឆ្នាំ ជនជាតិខ្មែរ ស្នាក់នៅបន្ទប់ជួលទីតាំងកើតហេតុខាងលើ ចំនួន០៣ ញញួរ (០១ញញួរ ត្រូវចំបបូរមាត់លើខាងស្តាំ បណ្តាលឲ្យបែកបបូរមាត់ហូរឈាម និងបាក់ឆ្អឹងថ្គាមខាងស្តាំ-០២ញញួរទៀត ត្រូវចំក្បាលផ្នែកខាងក្រោយ បណ្តាលអោយហើមប៉ោង ត្រូវបានក្រុមគ្រួសារ និងសមត្ថកិច្ចបញ្ជូនទៅសម្រាកព្យាបាលនៅគ្លីនិកតាព្រហ្ម(ម្តុំផ្សារលើ) ។ ចំណែកជនសង្ស័យ ត្រូវបានឃាត់ខ្លួនភ្លាមៗ ហើយបញ្ជូនមកសាកសួរនៅស្នងការដ្ឋាននគរបាលខេត្តសៀមរាប ។
បច្ចុប្បន្នជនសង្ស័យរូបនេះ ត្រូវបាន កញ្ញា វ៉ា សក្កដា ព្រះរាជអាជ្ញា(ស្តីទី) នៃអយ្យការអមសាលាដំបូងខេត្តសៀមរាប សម្រេចឲ្យឃាត់ខ្លួនជាបណ្តោះអាសន្ន នៅស្នងការដ្ឋាននគរបាលខេត្ត ដើម្បីរៀបចំកសាងសំណុំរឿងបញ្ជូនទៅសាលាដំបូងខេត្តចាត់ការបន្តតាមនីតិវិធីច្បាបបន្ត ៕
ចែករំលែកព័តមាននេះ