ខេត្តកំពង់ស្ពឺ ៖ កម្លាំងនគរបាលការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តកំពង់ស្ពឺ ដោយមានការសម្របសម្រួលពីលោកកែវ សុធា ព្រះរាជអាជ្ញាសាលាដំបូងខេត្តកំពង់ស្ពឺ បានចុះធ្វើការឆែកឆេរត្រួតពិនិត្យរកករណីចែកចាយបារី៥៥៥ខុសច្បាប់ កាលពីរសៀលថ្ងៃទី២៧ តុលា ស្ថិតនៅភូមិពាណិជ្ជកម្ម ក្នុងសង្កាត់រកាធំ ក្រុងច្បារមន ខេត្តកំពង់ស្ពឺ ។
ប្រភពឱ្យដឹងថា នៅវេលាម៉ោង០៤រសៀលថ្ងៃទី២៧ តុលា ២០១៦ កម្លាំងនគរបាលការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តកំពង់ស្ពឺ ដឹកនាំដោយលោកវរសេនីយ៍ទោ ម៉ាត់ ធុច នាយការិល័យប្រឆាំងបទល្មើសសេដ្ឋកិច្ចខេត្ត បានចុះធ្វើការឆែកឆេរត្រួតពិនិត្យជាក់ស្តែង លើទីតាំងផ្ទះយីហោលី ទូច ដែលមានម្ចាស់ឈ្មោះលី ទូច អាយុ៥៥ឆ្នាំ ស្ថិតក្នុងភូមិពាណិជ្ជកម្ម សង្កាត់រកាធំ ក្រុងច្បារមន ខេត្តកំពង់ស្ពឺ ពាក់ព័ន្ធករណីចែកចាយបារី ៥៥៥ ខុសច្បាប់ ។
ប្រតិបត្តិការនេះ មានការសម្របសម្រួលពីលោកកែវ សុធា ព្រះរាជអាជ្ញាអមសាលាដំបូងខេត្តកំពង់ស្ពឺ និងមានការដឹកនាំបញ្ជាផ្ទាល់ ដោយលោក អ៊ូ ផាត ព្រះរាជអាជ្ញារង ហើយសមត្ថកិច្ចបានរកឃើញនិងដកហូតបារី៥៥៥ ខុសច្បាប់ចំនួន៣៦សុង និងបានបង្គាប់ឱ្យម្ចាស់ចូលខ្លួនទៅបំភ្លឺនៅពេលក្រោយ ។
ចំពោះបារីដែលខុសច្បាប់នេះ ងាយស្រួលក្នុងការសម្គាល់ គឺពុំមានសារ ព្រមានសុខភាពជាភាសាខ្មែរស្របតាមច្បាប់កំណត់ និងពុំមានតែមពន្ធបិទ នៅលើកញ្ចប់ដែរ ហើយនេះគឺជាសារដល់បងប្អូនប្រជាពលរដ្ឋ ក៏ដូចជាអាជីវករ សូមឈប់លក់ចែកចាយនូវបារីខុសច្បាប់នេះតទៅទៀត ព្រោះវានាំអោយប្រឈមខ្លាំងជាមួយផ្លូវច្បាប់ ដែលអាចដល់មានទោសទណ្ឌទៅទៀត ។
ចែករំលែកព័តមាននេះ