រាជធានីភ្នំពេញ ៖ លោកវេជ្ជបណ្ឌិត កៅ វណ្ណារិទ្ធ ឯកទេសជំងឺមហារីកនិងជំងឺឈាមបានឲ្យដឹងថា គ្រាប់ឈាមក្រហមមានមុខងារដឹកអុកស៊ីសែនសម្រាប់ផ្គត់ផ្គង់និងចិញ្ចឹមគ្រប់សរីរាង្គកាយរបស់មនុស្ស ។ វាត្រូវបាន
រាជធានីភ្នំពេញ ៖ លោកវេជ្ជបណ្ឌិត កៅ វណ្ណារិទ្ធ ឯកទេសជំងឺមហារីកនិងជំងឺឈាមបានឲ្យដឹងថា គ្រាប់ឈាមក្រហមមានមុខងារដឹកអុកស៊ីសែនសម្រាប់ផ្គត់ផ្គង់និងចិញ្ចឹមគ្រប់សរីរាង្គកាយរបស់មនុស្ស ។ វាត្រូវបានផលិតចេញពីខួរឆ្អឹង ក្រោមឥទ្ធិពលនៃការរួមផ្សំរបស់ អ័រម៉ូន និងអង់ហ្ស៊ីមមួយចំនួនដែលមាននៅក្នុងសរីរាង្គផ្សេងៗ ។ កង្វះគ្រាប់ឈាមក្រហម គឺជាមូលហេតុ ដែលអាចប៉ះពាល់ដល់បញ្ហាសុខភាព និងអាចបង្កឲ្យមានគ្រោះថ្នាក់ធ្ងន់ធ្ងរដល់អាយុជីវិត ។
១-រោគសញ្ញា ៖
-ស្លេកស្លាំងខុសពីធម្មតា
-ហេវហត់ អស់កម្លាំង ល្ហិតល្ហៃ
-ឧស្សាហ៍វិលមុខ ធេងធោង ឈឺក្បាល
-ហ៊ឹងត្រចៀក
– ស្រវាំងភ្នែក
-ញ័រដើមទ្រូង បេះដូងលោតញាប់ ចុកទ្រូង -ដង្ហក់ឆាប់ហត់ខុសពីធម្មតា ។
២ មូលហេតុ៖
ក-ការបាត់បង់គ្រាប់ឈាមក្រហមដោយសារ
-ការហូរឈាមបណ្តាលមកពីមូលហេតុផ្សេងៗ ដូចជាគ្រោះថ្នាក់ចរាចរណ៍ របួស ការហូរឈាមតាមសរីរាង្គនានា ក្នុងនិងក្រៅខ្លួន ។ល។
-ជំងឺគ្រាប់ឈាមក្រហម (Hemoglobinopathy) ធ្វើឲ្យគ្រាប់ឈាមមិនមានគុណភាព និងងាយបែកខូច
-ការរលាកផ្សេងៗដោយសារបាក់តេរី វីរុស ប៉ារ៉ាស៊ីត ឬពពួកផ្សិត
-ចំពោះស្ត្រីអាចបណ្តាលមកពីវិបត្តិអ័រម៉ូន ដែលធ្វើឲ្យមានការធ្លាក់ឈាមរដូវច្រើន និងយូរខុសពីប្រក្រតី
-ស្ត្រីមានគភ៌ ។
ខ-ការផលិតគ្រាប់ឈាមក្រហមថយចុះ
-ជំងឺខ្សោយខួរឆ្អឹងដែលបណ្តាលមកពីសារជាតិពុលមួយចំនួនដូចជាសំណ ថ្នាំសម្លាប់សត្វល្អិត ថ្នាំបាញ់ដំណាំផ្សេងៗ ការប្រើប្រាស់ឱសថព្យាបាលមិនត្រឹមត្រូវតាមក្បួនវេជ្ជសាស្ត្រជាពិសេសថ្នាំផ្សះ
-កង្វះអាហារូបត្ថម្ភផ្សេងៗដូចជា ខ្វះជាតិដែក ខ្វះវីតាមីន B12 ។ល។
លោកវេជ្ជបណ្ឌិត កៅ វណ្ណារិទ្ធ បានរំឭកថា៖
-ជំងឺក្រពេញអ័រម៉ូនទីរ៉ូអីុដ Hypothyroïdie
-ជំងឺខ្សោយតម្រងនោម(kidney failure)
-ជំងឺមហារីកគ្រាប់ឈាម
-ជំងឺមហារីកផ្សេងៗ
៣-ដំណោះស្រាយ លោកអ្នកគួរតែមកពិគ្រោះជំងឺជាមួយក្រុមគ្រូពេទ្យជំនាញនៅមន្ទីរពេទ្យកាល់ម៉ែត ដើម្បីរកពីមូលហេតុនៃជំងឺបង្កពិតប្រាកដ តាមរយៈការធ្វើតេស្តឈាម ឬករណីខ្លះអាចនឹងឈានទៅដល់ការបឺតខួរឆ្អឹងយកទៅពិនិត្យនៅមន្ទីរពិសោធន៍ ដើម្បីឈានទៅរកការព្យាបាលដ៏ត្រឹមត្រូវ ។ ចំពោះការព្យាបាលកង្វះគ្រាប់ឈាមក្រហម មិនមែនគ្រាន់តែជាការដាក់បញ្ចូលឈាមឬឲ្យថ្នាំជាតិដែកនោះទេ ។
ការធ្វើរោគវិនិច្ឆ័យត្រឹមត្រូវ និងព្យាបាលទៅតាមមគ្គុទេ្ទសក៍ព្យាបាលជាសកល (Universal Guideline) ទើបអាចឲ្យអ្នកជំងឺទទួលបាននូវការជាសះស្បើយបាន ។ “រកឃើញទាន់ពេល ព្យាបាលដោយក្រុមគ្រូពេទ្យជំនាញ ឆាប់ជាសះស្បើយ” ៕
ចែករំលែកព័តមាននេះ