ខេត្តកំពងស្ពឺ ៖ គិតត្រឹមរសៀលថ្ងៃទី២៦ តុលា ២០១៦ នេះ ករណីរថយន្តឡិចស៊ីសមួយគ្រឿង ដែលត្រូវបានជនមិនស្គាល់មុខ ជិះមកប្លុងចោលនៅមុខផ្ទះពលរដ្ឋនោះ ត្រូវបានស្គាល់អត្តសញ្ញាណហើយ ដោយសមត្ថកិច្ចស្រាវជ្រាវរកឃើញថា គឺមិនមានជាប់ពាក់ព័ន្ធលើបទល្មើសអ្វីនោះទេ ។
ប្រភពឱ្យដឹងទៀតថា ម្ចាស់រថយន្តឡិសស៊ីសខាងលើនេះ គឺជាជនជាតិចិន ធ្វើការនៅក្រុមហ៊ុនកិនថ្ម នៅភ្នំក្អែកទុំ ។ ចំពោះមូលហេតុដែលទុករថយន្តនៅកន្លែងនោះ គឺបណ្តាលមកពីរថយន្តខូច ។
ទោះបីជាយ៉ាងណា ជនជាតិចិនដែលជាម្ចាស់រថយន្តនេះ មិនត្រូវបានស្គាល់ឈ្មោះនោះទេ ។ ពេលនេះ គេបានមកយករថយន្តទៅជួសជុលហើយ ។
គួររំលឹកថា រថយន្តឡិចស៊ីសមួយគ្រឿង ត្រូវបានជនមិនស្គាល់មុខ បានយកមកប្លុងចោលនៅមុខផ្ទះរបស់ឈ្មោះណុប អាយុ៤០ឆ្នាំ ភេទប្រុស នៅភូមិជ្រៃ ឃុំជង្រុក ស្រុកគងពិសី ខេត្តកំពង់ស្ពឺ បង្កការភ្ញាក់ផ្អើលដល់សមត្ថកិច្ចចុះមកពិនិត្យ និងស្រាវជ្រាវរកម្ចាស់។
ការប្រទះឃើញរថយន្តនេះ កើតឡើងកាលពីវេលាម៉ោង១០ និង១៦នាទីព្រឹកថ្ងៃ២៦ តុលា ២០១៦ ស្ថិតនៅភូមិព្រៃដី ឃុំជង្រុកស្រុកគងពិសី ខេត្តកំពង់ស្ពឺ ។
ម្ចាស់ផ្ទះខាងលើបានរៀបរាប់ថា កាលពីយប់គាត់បានឮសំឡេងរថយន្តមកឈប់មុខផ្ទះ ហើយក៏ស្ងាត់បាត់ទៅ លុះព្រឹកឡើងក៏ឃើញចតនៅមុខផ្ទះ ដោយសង្ស័យខ្លាចក្រែងមានក្រុមជនសង្គមងងឹត ធ្វើសកម្មភាពដែលផ្ទុយពីច្បាប់ និងខ្លាចក្រែងមានបញ្ហាដល់ ក៏រាយការណ៍ឱ្យសមត្ថកិច្ចចុះមកពិនិត្យតែម្តង ។
នគរបាលស្រុកគងពិសីបានប្រាប់ថា តាមការស្រាវជ្រាវជំហានដំបូង រថយន្តនេះត្រូវម្ចាស់ ឬក្រុមជនសង្ស័យ យកមកប្លុងចោលតាំងពីម៉ោង២រំលងអធ្រាត្រ ឈានចូលថ្ងៃទី២៦ តុលា លុះដល់ភ្លឺម្ចាស់ផ្ទះឃើញ រួចក៍រាយការណ៍ប្រាប់សមត្ថកិច្ចប៉ុស្តិ៍ជង្រុកឱ្យចុះមកពិនិត្យ ។
ប្រភពបន្តថា នៅរសៀលថ្ងៃដដែលនេះ គណៈកម្មការចម្រុះ រួមទាំងស្ថាប័នតុលាការផង នឹងចុះមកត្រួតពិនិត្យស្រាវជ្រាវបន្តថា ជារថយន្តមានពាក់ព័ន្ធនឹងបទល្មើស ឬមួយយ៉ាងណា ។ នៅព្រឹកថ្ងៃដដែលនេះ សមត្ថកិច្ចកំពុងតែឃ្លាំមើល ព្រមទាំងអង្កេតបឋមសិន ។
ចែករំលែកព័តមាននេះ