រាជធានីភ្នំពេញ ៖ កមរមាស់ ជាជំងឺមួយប្រភេទក្នុងចំណោមជំងឺសើស្បែក ដែលតែងជួបញឹកញាប់នៅប្រទេសកម្ពុជាយើង ជាជំងឺដែលមានចេញកន្ទួល និងពងទឹក ហើយរមាស់ពាសពេញខ្លួនប្រាណ ដែលបណ្តាលមកពីពពួក
រាជធានីភ្នំពេញ ៖ កមរមាស់ ជាជំងឺមួយប្រភេទក្នុងចំណោមជំងឺសើស្បែក ដែលតែងជួបញឹកញាប់នៅប្រទេសកម្ពុជាយើង ជាជំងឺដែលមានចេញកន្ទួល និងពងទឹក ហើយរមាស់ពាសពេញខ្លួនប្រាណ ដែលបណ្តាលមកពីពពួកប៉ារ៉ាស៊ីតឬចៃ ។ ដកស្រង់ប្រសាសន៍លោកស្រីវេជ្ជបណ្ឌិតថាវ សុថាវី ឯកទេសជំងឺសើស្បែក កាមរោគ នៃមន្ទីរពេទ្យកាល់ម៉ែត ដែលបានធ្វើការកត់សម្គាល់ថា ការចម្លងជំងឺនេះកើតឡើងតាមរយៈ ៖
-ការប៉ះពាល់ផ្ទាល់រវាងអ្នកជា និងអ្នកជំងឺ
-ប៉ះពាល់ជាមួយសម្ភារប្រើប្រាស់ (សម្លៀកបំពាក់ ស្រោមពូក…) ដែលមានមេរោគ
– ការរស់នៅផ្តុំគ្នា ឬរស់នៅជាមួយគ្នា ។
ក-រោគសញ្ញា ៖
-ច្រើនកើតនៅកន្លែងណាដែលមានរាងត្រង់ផ្នត់ៗ ឬក្រវិចក្រវៀននៃស្បែក ចង្វែកម្រាមដៃ កដៃ ចង្កេះ គូថ ផ្ទៃខាងក្នុងប្រអប់ភ្លៅ និងកជើង ដែលស្តែងចេញជាកន្ទួល ឬពងទឹក (ពងទឹកមិនសូវប្រទះឃើញទេ ព្រោះវាត្រូវបំផ្លាញយ៉ាងលឿនដោយការអេះត្រដុសរបស់អ្នកជំងឺ) ។
-ចំពោះស្ត្រីវិញ គេឃើញច្រើនកើតមាននៅលើក្បាលដោះ រីឯបុរសភាគច្រើនកើតនៅលើលិង្គ និងលើស្បែកពងស្វាស ។
-ជំងឺនេះកម្រកើតមាននៅលើផ្ទៃមុខមនុស្សពេញវ័យណាស់ ប្រសិនបើក្មេងតូចៗ និងអ្នកមានមេរោគហ៊ីវ(HIV+) គេសង្កេតឃើញមាននៅលើផ្ទៃមុខ បាតដៃ បាតជើង រួមទាំងខ្លួនប្រាណផងដែរ ។ ការកើតមានទាំងនេះ បង្កឲ្យមានការរមាស់យ៉ាងខ្លាំង ជាពិសេសនៅពេលយប់ ។ ជាទូទៅតែងមានឃើញស្នាមអេះ និងស្នាមក្រហូងដាច់រលាត់ស្បែក ការឆ្លងរោគ ជាមួយនឹងការកកើតពងខ្ទុះ និងក្រមរធំៗ ត្រូវបានជួបញឹកញាប់គួរសមដែរ ។
ខ-ការវិវឌ្ឍ៖ ជំងឺកមរមាស់ ដែលមិនបានព្យាបាល អាចក្លាយជាជំងឺរ៉ាំរ៉ៃរួមជាមួយនឹងការថយចុះកម្រិតរមាស់ ។ ការបាត់រមាស់មិនមែនមានន័យថា ពពួកប៉ារ៉ាស៊ីត ឬចៃនោះបាត់ឬស្លាប់ឡើយ ។ ការលាប់ឡើងវិញដែលបណ្តាលពីការព្យាបាលមិនត្រឹមត្រូវកើតមានជារឿយៗ ហើយវាត្រូវបានបិទបាំងរោគសញ្ញាផ្សេងៗ ដោយការលាបពពួកគ័រទីគួអីុត (ថ្នាំលាបឲ្យស្បែកស ឬស្បែករលោង) ច្រើនពេក ។
គ-ការព្យាបាល៖
-ត្រូវព្យាបាលក្រុមគ្រួសារទាំងមូលរួមគ្នាក្នុងពេលតែមួយ ដើម្បីជៀសវាងការឆ្លងសាចុះសាឡើង ឬលាប់ឡើងវិញ
-ត្រូវលាបថ្នាំដែលមានការណែនាំដោយគ្រូពេទ្យជំនាញឯកទេស
-មុជទឹក ហើយដុសកន្លែងដែលកើតមានជំងឺនេះ ជាមួយបន្ទះក្រណាត់ស្អាត នៅពេលយប់
-លាបថ្នាំឱ្យពេញខ្លួនទាំងអស់ តាំងពីករហូតដល់ចុងជើង(គ្រប់កន្លុកកន្លៀតទាំងអស់)
-ទុកឲ្យស្ងួត ហើយរក្សាវាឲ្យនៅលើស្បែកខ្លួនមួយយប់ទល់ភ្លឺ(១២ម៉ោង)
-មុជទឹកជម្រះកាយវិញបាននៅពេលព្រឹក
-ធ្វើដូចខាងលើម្តងទៀតនៅយប់ទី២ ទី៣ រហូតដល់មួយសប្តាហ៍
-ផ្លាស់ប្តូរ ហើយបោកគក់ សម្លៀកបំពាក់ កម្រាលពូក ភួយ មុង ដែលមានមេរោគ ជាមួយសាប៊ូ ស្រុសទឹកក្កៅ និងហាលថ្ងៃឲ្យបានស្ងួត «សូមណែនាំក្រុមគ្រួសារ ឬអ្នកនៅជុំវិញខ្លួនដែលជាប់ពាក់ព័ន្ធជាពិសេសអ្នកមានផ្ទៃពោះបើសិនជាមានរោគសញ្ញាដូចខាងលើ ។ ក្រុមគ្រូពេទ្យឯកទេសនៃមន្ទីរពេទ្យកាល់ម៉ែត រង់ចាំទទួលជួបពិគ្រោះ និងផ្តល់ជូនព័ត៌មានគ្រប់ស្ថានភាពជំងឺ ដើម្បីជៀសវាងបញ្ហាផ្សេងៗដែលបង្កឲ្យមានផលប៉ះពាល់ ពិសេសដល់ទារកក្នុងផ្ទៃ» ៕
ចែករំលែកព័តមាននេះ