រាជធានីភ្នំពេញ ៖ សំណុំរឿងពុករលួយរបស់អតីតឯកអគ្គរាជទូតកម្ពុជាប្រចាំប្រទេសកូរ៉េខាងត្បូង លោក ស៊ុត ឌីណា ត្រូវបានសាលាដំបូងរាជធានីភ្នំពេញ លើកយកមកបើកសវនាការនៅថ្ងៃទី០៤ ខែវិច្ឆិកា ឆ្នាំ២០១៦ ខាងមុខនេះ។ គួររំលឹកថាលោក ស៊ុត ឌីណា ត្រូវបានអង្គភាពប្រឆាំងអំពើពុករលួយឃាត់ខ្លួនកាលពីថ្ងៃទី០៤ ខែមេសា ឆ្នាំ២០១៦ ដោយជាប់ពាក់ព័ន្ធអំពើពុករលួយលើទឹកប្រាក់ចំនួន ៧,២លានដុល្លារអាមេរិក និងមានមាស៣៣៩តម្លឹង ឬស្មើនឹងជិត១៣គីឡូក្រាម។
ប៉ុន្តែករណីនេះ ក្រុមគ្រួសាររបស់លោក ស៊ុត ឌីណា បានច្រានចោលការលើកឡើងនេះ។ ក្នុងសេចក្ដីប្រកាសព័ត៌មានរបស់អង្គភាពប្រឆាំងអំពើពុករលួយឲ្យដឹងថា យោងតាមការចុះស៊ើបអង្កេតរបស់ ACU នៅក្នុងប្រទេស និងនៅក្នុងប្រទេសកូរ៉េខាងត្បូងព្រមទាំងចម្លើយសារភាពរបស់លោក ស៊ុត ឌីណា និងសាក្សីជាច្រើនទៀត អង្គភាពបានរកឃើញថាលោក ស៊ុត ឌីណា មានលុយនៅក្រៅធានាគារចំនួន៧,២លានដុល្លារ និងមានមាស១២,៤៧គីឡូក្រាមនោះ។
ចំនួនទឹកប្រាក់នេះបានបង្ហាញថា កំណើនសាច់ប្រាក់របស់លោក ស៊ុត ឌីណា ក្នុងរយៈពេល៣ឆ្នាំមានចំនួន៣លានដុល្លារ ដោយក្នុងឆ្នាំ២០១៣ លោកមានប្រាក់ចំនួន៤,២លានដុល្លារអាមេរិក។ សេចក្ដីប្រកាសព័ត៌មានដដែលបញ្ជាក់ថា ចាប់ពីថ្ងៃទី៧ ខែកុម្ភៈ ឆ្នាំ២០១៤ ដែលជាពេលលោកចាកចេញទៅធ្វើជាឯកអគ្គរាជទូតប្រចាំប្រទេសកូរ៉េខាងត្បូង រហូតមកដល់បច្ចុប្បន្ន លោក ស៊ុត ឌីណា បានធ្វើដំណើរទៅមករវាងប្រទេសកូរ៉េ និងប្រទេសកម្ពុជាចំនួន២១លើក ក្នុងរយៈពេល២៥ខែនោះ មានន័យថាស្ទើរតែ១ខែ១លើក។ អង្គភាពប្រឆាំងអំពើពុករលួយមានភស្តុតាងគ្រប់គ្រាន់ដើម្បីកសាងសំណុំបែបបទបញ្ជូនលោក ស៊ុត ឌីណា ទៅតុលាការ។
អាស្រ័យដោយពេលវេលាមានតែ៤៨ម៉ោង អង្គភាពបានសម្រេចចិត្តកសាងសំណុំរឿង ២បទល្មើសបញ្ជូនទៅសាលាដំបូងដើម្បីឃុំខ្លួនលោក ស៊ុត ឌីណា ជាបណ្តោះអាសន្ន។ ការឃាត់ខ្លួន លោក ស៊ុត ឌីណា ធ្វើឡើងតាមពាក្យបណ្តឹង របស់ពលករខ្មែរនៅប្រទេស កូរ៉េខាងត្បូង និងពាក្យបណ្តឹងរបស់មន្ត្រីក្រសួងការបរទេសកម្ពុជា និង កំណត់ហេតុ សវនកម្ម នៃប្រតិភូចម្រុះក្រសួងសេដ្ឋកិច្ច និងក្រសួងការបរទេសដែល អង្គភាពបានអះអាងថា លោក ស៊ុត ឌីណា បានឃើញ និងឯកភាពកាលពីថ្ងៃទី១៩ ខែមករា ឆ្នាំ ២០១៦។ លោក ស៊ុត ឌីណា ត្រូវបានតុលាការចោទប្រកាន់ពីបទរំលោភអំណាច មានប្រសិទ្ធិភាព និងបទការកេងយកប្រយោជន៍ដោយខុសច្បាប់៕
ចែករំលែកព័តមាននេះ