ស្ត្រីជាម្តាយយំបណ្ដើររៀបរាប់ប្រាប់សមត្ថកិច្ចបណ្ដើរ
រាជធានីភ្នំពេញ ៖ នារីវ័យក្មេងអាយុ១៦ឆ្នាំម្នាក់ប្រាប់ម្តាយថាទៅជប់លៀងនៅផ្ទះមិត្តភក្តិស្រាប់តែទៅបាត់រហូតមិនឃើញប្រឡប់មកផ្ទះវិញសោះ ទោះបីខំដើររកយ៉ាងណា …
រាជធានីភ្នំពេញ ៖ នារីវ័យក្មេងអាយុ១៦ឆ្នាំម្នាក់ប្រាប់ម្តាយថាទៅជប់លៀងនៅផ្ទះមិត្តភក្តិស្រាប់តែទៅបាត់រហូតមិនឃើញប្រឡប់មកផ្ទះវិញសោះ ទោះបីខំដើររកយ៉ាងណាក៏មិនឃើញ ទើបនៅវេលាម៉ោង៥ និង២០នាទី ល្ងាច ថ្ងៃទី២៤ ខែតុលា ឆ្នាំ២០១៦ ម្តាយរបស់គាត់កាន់រូបថតកូនស្រីបណ្ដើរយំបណ្ដើរធ្វើដំណើរទៅកាន់ប៉ុស្ដិ៍នគរបាលចោមចៅ ដើម្បីដាក់ពាក្យបណ្ដឹងសុំឲ្យនគរបាលជួយអន្តរាគមន៍ស្វែងរកកូនស្រីគាត់មកវិញផង ។
នគរបាលបានឲ្យដឹងថា ស្ត្រីជាម្តាយនោះឈ្មោះ ហៀង ចាន់ណា អាយុ៣៥ឆ្នាំ មុខរបរកម្មការិនីរោងចក្រ មានប្ដី ឈ្មោះ គុយ ណាត អាយុ៣៧ឆ្នាំ មុខរបររត់ម៉ូតូឌុប ពួកគាត់មានកូនប្រុសម្នាក់ស្រីម្នាក់ ដោយឡែកកូនស្រីដែលកំពុងបាត់ខ្លួននេះឈ្មោះ ឈួន ស្រីនីត អាយុ១៦ឆ្នាំ មុខរបរកម្មការិនីរោងចក្រកាត់ដេរ ហើយនាងគឺជាកូនច្បងផងដែរ ។ សព្វថ្ងៃស្នាក់នៅផ្ទះជួលក្នុងភូមិត្រពាំងពោធិ៍ សង្កាត់ចោមចៅ ខណ្ឌពោធិ៍សែនជ័យ និងមានស្រុកកំណើតនៅក្នុងភូមិលឹង្គ ឃុំអង្គរាជ ស្រុកព្រះស្តេច ខេត្តព្រៃវែង ។
ស្ត្រីជាម្តាយបាននិយាយថា កូនស្រីរបស់គាត់បានចាកចេញពីផ្ទះកាលពីល្ងាចថ្ងៃទី២៣ ខែតុលា ដោយប្រាប់គាត់ថា ទៅចូលរួមកម្មវិធីជប់លៀងនៅផ្ទះមិត្តភក្ដិ ប៉ុន្តែនាងមិនបានប្រាប់ថា ផ្ទះមិត្តភក្ដិនោះនៅភូមិណាកន្លែងណានោះឡើយ ចំណែករូបគាត់ក៏មិនបានសួរនាំនាងពីផ្ទះមិត្តភក្ដិនៅទីណាដែរ ព្រោះកន្លងមកកូនស្រីគាត់មិនដែលដើរលេងទៅណាឆ្ងាយ ហើយមិនដែលដើរបាត់ពីផ្ទះដូចជាពេលនេះទេ ។
ស្ត្រីជាម្តាយបន្តថា លុះដល់យប់មិនឃើញកូនត្រឡប់មកផ្ទះវិញសោះ ទើបគាត់និងប្ដីនាំគ្នាតាមរកគ្រប់ទីកន្លែង ទាំងយប់ ប៉ុន្តែរកមិនឃើញឡើយ ។ លុះព្រឹកឡើងថ្ងៃទី២៤ ខែតុលា បាននាំគ្នាតាមរកទៀត ក៏នៅតែរកមិនឃើញដដែល ទើបដល់ល្ងាចឡើង ក៏សម្រេចចិត្តទៅប្ដឹងនគរបាលឲ្យជួយស្វែងរកតែម្ដង ។
បន្ទាប់ពីទទួលបានពាក្យបណ្ដឹងពីការបាត់កូនស្រីភ្លាម នគរបាលបានប្រកាសឲ្យតាមបណ្ដាគោលដៅនានាជួយពិនិត្យមើលពីក្មេងស្រីដែលមានភិនភាគដូចខាងលើនោះហើយ ប៉ុន្តែមិនទាន់មានគោលដៅណាមួយបានប្រទះឃើញនៅឡើយទេ ហើយមិនដឹងថា នាងទៅដើរលេងជាមួយមិត្តភក្ដិលង់ខ្លួនមិនហ៊ានត្រឡប់ទៅផ្ទះវិញ ខ្លាចឪពុកម្ដាយស្ដីបន្ទោស ឬក៏មានគ្រោះថ្នាក់អ្វី ឬបែបណានោះឡើយ ៕
ចែករំលែកព័តមាននេះ