ឃីកបុកស៊ីងកម្ពុជារកឃើញកីឡាករម្នាក់ទៀតហើយឡើងទៅដណ្ដើមមេដាយមាសស៊ីហ្គេម
- ភ្នំពេញ
រាជធានីភ្នំពេញ ៖ អបអរសាទរ ឃីកបុកស៊ីងកម្ពុជា បានរកឃើញកីឡាករជើងខ្លាំងម្នាក់ទៀតហើយដែលត្រូវបន្ត
រាជធានីភ្នំពេញ ៖ អបអរសាទរ ឃីកបុកស៊ីងកម្ពុជា បានរកឃើញកីឡាករជើងខ្លាំងម្នាក់ទៀតហើយដែលត្រូវបន្តដំណើរឡើងទៅប្រកួតដណ្ដើមយកមេដាយមាសនៃព្រឹត្តិការណ៍កីឡាស៊ីហ្គេមលើកទី៣១ឆ្នាំ២០២២នៅប្រទេសវៀតណាមគឺកីឡាករ ឈឿន ល្វៃ ក្រោយពីបានយកឈ្នះកីឡាករហ្វីលីពីនAtonio Honorio Arioនៅវគ្គពាក់កណ្ដាលផ្ដាច់ព្រ័ត្រ កាលពីថ្ងៃទី១១ ឧសភា កន្លងមកនេះ។
ឈឿន ល្វៃ ដែលបានយកឈ្នះកីឡាករហ្វីលីពីននៅវគ្គពាក់កណ្ដាលផ្ដាច់ព្រ័ត្រលើកនេះ គឺប្រកួតលើវិញ្ញាសាផ្នែកបុរសប្រភេទទម្ងន់៧១គីឡូក្រាម ។ តាមរយៈជ័យជម្នះនេះធ្វើឱ្យរូបគេក្លាយជាកីឡាករឃីកបុកស៊ីងទី៤របស់កម្ពុជាដែលត្រូវឡើងទៅប្រកួតនៅវគ្គផ្ដាច់ព្រ័ត្រដណ្ដើមយកមេដាយមាសមកជូនជាតិមាតុភូមិ ។ សម្រាប់អ្នកគាំទ្រកម្ពុជាវិញក៏បានជូនពរដល់ក្រុមកីឡាករជម្រើសជាតិឃីកបុកស៊ីងកម្ពុជាឱ្យទទួលបានជោគជ័យទាំងអស់គ្នា។
បើសិនជាពួកគេអាចសម្រេចគោលដៅនោះ វាជាប្រវត្តិសាស្ត្រហើយសម្រាប់ប្រភេទកីឡាឃីកបុកស៊ីងកម្ពុជា ដែលទើបតែបង្ហាញខ្លួនជាលើកដំបូងនៅក្នុងព្រឹត្តិការណ៍កីឡាស៊ីហ្គេម។
គួររំលឹកផងដែរថា ចាប់តាំងពីបើកឆាកប្រកួតនៅក្នុងព្រឹត្តិការណ៍កីឡាស៊ីហ្គេមលើកទី៣១នៅប្រទេសវៀតណាមរហូតមកទល់ពេលនេះ ប្រភេទកីឡាឃីកបុកស៊ីងកម្ពុជាមានតែវិញ្ញាសាផ្នែកបុរសប៉ុណ្ណោះដែលមានឱកាសបន្តដំណើររហូតដល់វគ្គផ្ដាច់ព្រ័ត ឯផ្នែកនារីវិញធ្លាក់តាំងពីវគ្គប្រកួតជម្រុះដំបូងម៉្លេះ ។ សម្រាប់ផ្នែកបុរសដែលត្រូវបន្តដំណើរទៅកាន់វគ្គផ្ដាច់ព្រ័ត្រដណ្ដើមយកមេដាយមាសទាំង៤រូបនេះរួមមាន កីឡាករ កាន់ ម៉េងហុង ប្រកួតក្នុងប្រភេទទម្ងន់៥៤កីឡូក្រាម កីឡាករទូច រ៉ាឆាន់ ក្នុងប្រភេទទម្ងន់៥៧គីឡូក្រាម កីឡាករលន់ បញ្ញា ក្នុងប្រភេទទម្ងន់៦៧គីឡូក្រាមនិងកីឡាករឈឿន ល្វៃ ក្នុងប្រភេទទម្ងន់៧១គីឡូក្រាម ៕
ចែករំលែកព័តមាននេះ