រាជធានីភ្នំពេញ ៖ បុរសជាកម្មករសំណង់ម្នាក់បានរងរបួសយ៉ាងធ្ងន់ធ្ងរ ដោយផុងលលាដ៍ក្បាល ហើយត្រូវគេបញ្ជូនទៅកាន់មន្ទីរពេទ្យ ដើម្បីសង្គ្រោះភ្លាមៗ ក្រោយពីផឹកស្រាថ្នាំជុំគ្នាជាមួយកម្មកររួមការងារចំនួន៥នាក់ ចាប់តាំងពីព្រឹករហូត ដល់យប់ ប៉ុន្តែក្រោយពេលស្រវឹងរៀងៗខ្លួន អ្នកផឹក៣នាក់បាននាំគ្នាចូលដេក ចំណែកបុរសរងគ្រោះនោះ ស្រវឹងអួតអាងពីក្បាច់គុនចុះឡើងៗ ក៏មានទំនាស់ពាក្យសម្ដីជាមួយ និងយុវជនឡើង.កម្នាក់ទៀត ដែលធ្លាប់ចេញចូលទៅធ្វើការនៅប្រទេសថៃ បានបបួលយុវជននោះសាកក្បាច់គុន ក៏ត្រូវបានជននោះទាញញញួរ វាយសំពងក្បាល បណ្ដាលឱ្យបែកផុងលលាដ៍តែម្ដង ។
ហេតុការណ៍នេះកើតឡើង កាលពីវេលាម៉ោង០៦ និង៤០នាទីយប់ថ្ងៃទី២៣ តុលា ស្ថិតនៅតាមផ្លូវបេតុង ក្នុងភូមិតាឡី សង្កាត់ដង្កោ ខណ្ខដង្កោ រាជធានីភ្នំពេញ ។
ជនដៃដល់ខាងលើឈ្មោះតី ទីន អាយុ២៤ឆ្នាំ ជាកម្មករសំណង់ ស្នាក់នៅក្នុងកាដ្ឋានខាងលើ មានស្រុកកំណើតនៅក្នុងភូមិពោធិ៍ស្ទាង ឃុំសណ្ដែក ស្រុកបាធាយ ខេត្តកំពង់ចាម ។ ចំណែកជនរងគ្រោះឈ្មោះប៉ុល សារឿង អាយុ៤២ឆ្នាំ ជាកម្មករសំណង់ ស្នាក់នៅក្នុងកាដ្ឋាន សំណង់ជាមួយគ្នានោះដែរ កំពុងសម្រាកព្យាបាលរបួសនៅមន្ទីរពេទ្យរុស្ស៊ី ។
ប្រភពឱ្យដឹងថា នៅមុនពេលកើតហេតុ នៅវេលាម៉ោង១០ព្រឹកថ្ងៃដដែល បុរសរងគ្រោះរួមជាមួយជនដៃដល់ ព្រមទាំងមិត្ត៣នាក់ទៀត បាននាំគ្នាបង្កើតកម្មវិធី ផឹកស៊ីជុំគ្នា នៅក្នុងការដ្ឋានសំណង់ ដោយបានទិញស្រាថ្នាំផឹក ។ ពួកគេបានផឹករហូតដល់វេលាម៉ោង៦និង៤០នាទីយប់ ទើបមិត្តភក្ដិ៣នាក់បានក្រោកទៅរកកន្លែងដេក នៅសល់តែជនរងគ្រោះនិងជនដៃដល់ នៅផឹកបង្ហើយស្រា ហើយខណៈនោះជនរងគ្រោះ ដែលជាមនុស្សចាស់ជាង បានអួតអាងពីខ្លួនចេះក្បាច់គុន រហូតបង្កឲ្យមាន ទំនាស់គ្នាជាមួយជនដៃដល់ ព្រមទាំងបានបបួលជនដៃដល់ សាកក្បាច់គុនគ្នាថែមទៀត។
ភ្លាមៗនោះជនដៃ ដល់ដែលជាអ្នកលេង ធ្លាប់ឆ្លងដែនទៅធ្វើការនៅប្រទេសថៃម្នាក់ដែរ បានទាញញញួរវាយសំពងក្បាលបុរស រងគ្រោះនោះបណ្ដាលឲ្យ បែកផុងលលាដ៏ របួសយ៉ាងធ្ងន់ធ្ងរនិងត្រូវបានគេបញ្ជូនទៅសង្គ្រោះបន្ទាន់ នៅមន្ទីរពេទ្យមិត្តភាព ខ្មែរ សូវៀត ហៅមន្ទីរពេទ្យរុស្ស៊ី ។
ប្រភពដដែលបានបន្តទៀតថា ក្រោយពេលកើតហេតុ ជនដៃដល់បានរត់គេចខ្លួនបាត់ភ្លាមៗ រហូត ដល់វេលាម៉ោង១២ និង៣០នាទីរំលងអធ្រាត្រ ឈានចូលថ្ងៃទី២៤ តុលា ទើបត្រឡប់ ទៅកន្លែងដែលខ្លួនស្នាក់វិញ ក្នុងបំណងយកអីវាន់ និងលិខិតឆ្លងដែនរបស់ខ្លួនគេចខ្លួនទៅកាន់ប្រទេសថៃ ប៉ុន្តែខណៈនោះត្រូវបានក្រុមកម្មករសំណង់នៅទីនោះ នាំគ្នាព័ទ្ធចាប់បាន និងបានយកខ្សែចង រួចទើបហៅឲ្យកម្លាំងនគរបាល ទៅយកនាំទៅធ្វើការសរនាំ និងកសាងសំណុំរឿងចាត់ការតាមច្បាប់៕
ចែករំលែកព័តមាននេះ