ខេត្តព្រៃវែង ៖ ប្រជាពលរដ្ឋដែលរស់នៅក្នុងក្រុងព្រៃវែងបានត្អូញត្អែថា ការអភិវឌ្ឍហេចដ្ឋារចនាសម្ព័ន្ធក្នុងក្រុងព្រៃវែងនៅតែចោទជាបញ្ហានូវឡើយ ជាពិសេសប្រព័ន្ធលូដែលអាជ្ញាធរបានរៀបចំដាក់នៅតាមដងផ្លូវសំខាន់ៗជាបន្តបន្ទាប់ដែរ ក៏ប៉ុន្តែការធ្វើនោះហាក់មានសភាពយឺតយ៉ាវណាស់ គឺរាប់ឆ្នាំមកហើយនៅតែធ្វើមិនហើយ ជាហេតុធ្វើឲ្យដងផ្លូវមួយចំនួន រួមទាំងផ្ទះអ្នកស្រុកផងនោះត្រូវទឹកជន់លិចគ្រប់ពេលឲ្យតែមានភ្លៀងធ្លាក់ ។
ប្រជាពលរដ្ឋនៅភូមិលេខ៨ សង្កាត់កំពង់លាវ ក្រុងព្រៃវែង បានបញ្ជាក់ថា រៀងរាល់ឆ្នាំ នៅរដូវវស្សាគឺជារដូវដែលពួកគាត់ត្រូវពិបាកចិត្តគ្រប់ៗគ្នា ព្រោះពេលមានភ្លៀងធ្លាក់ចាប់ពី១ម៉ោងឡើងទៅកម្ពស់ទឹកមានការកើនឡើង និងជន់លិចស្ទើរគ្រប់កន្លែង ព្រោះប្រព័ន្ធលូចាស់ដែលមានស្រាប់វាតូចពេក ហើយកន្លែងខ្លះបានស្ទះជិតរន្ធថែមទៀត ចំណែកឯខាងអាជ្ញាធរក៏ឃើញថា កំពុងខ្នះខ្នែងរៀបចំដាក់លូថ្មីឲ្យដែរ តែការងារយឹតពេក មិនដឹងថាឆ្នាំណាទើបដាក់មកដល់ក្នុងភូមិពួកគាត់ទេ ។
ជុំវិញការត្អូញត្អែររបស់បងប្អូនប្រជាពលរដ្ឋក្នុងក្រុងព្រៃវែងនេះ មិនអាចសុំការបំភ្លឹពីលោក លាត ភារុណ អភិបាលក្រុងព្រៃវែងបានទេ ដោយសារតែទូរសព្ទ័របស់លោកខលចូលហើយគ្មានអ្នកទទួល ។
ដោយឡែក លោក នួន ចំរ៉ុង ប្រធានមន្ទីរសាធារណការ និងដឹកជញ្ចូន បានឲ្យដឹងថា ការរៀបចំដាក់ប្រព័ន្ធលូមានការយឺតយ៉ាវ ដោយសារតែកត្តាអាកាសធាតុ គឹមានភ្លៀងធ្លាក់មកញឹកញាប់ពេក ធ្វើការសាងសង់ត្រូវអាក់ខានជាញឹកញាប់ ប៉ុន្តែលោកបានអះអាងថា ទោះជាយ៉ាងណាក៏ដោយក្រុមការងារដាក់ប្រព័ន្ធលូនេះនឹងខិតខំធ្វើឲ្យរួចនៅក្នុងរយៈពេលតែ៣ខែទៀតប៉ុណ្ណោះ ហេតុដូចនេះសូមបងប្អូនប្រជាពលរដ្ឋមេត្តាយោគយល់ និងជួយសហការផង ។
ចំពោះការលើកឡើងរបស់លោកប្រធានមន្ទីរនេះធ្វើឲ្យប្រជាពលរដ្ឋជាច្រើនមានចម្ងល់ថា ហេតុអ្វីបានជាផែនការថ្នាក់ជាតិទម្លាក់ថវិកាធ្វើផ្លូវ ធ្វើលូមិនព្រមដាក់ធ្វើខែប្រាំង បែរជាដាក់ឲ្យធ្វើចំតែខែរដូវស្សា ដល់ធ្វើមិនទាន់តាមផែនការ សំណង់គ្មានគុណភាព នាំគ្នាបន្ទោសថា មកពីកត្តាអាកាសធាតុ ហេតុអ្វីទៅ?
ចែករំលែកព័តមាននេះ