រាជធានីភ្នំពេញ ៖ ដើម្បីជំរុញឲ្យផលិតផលថៃកាន់តែទទួលបានការគាំទ្រ និងប្រើប្រាស់កាន់តែច្រើននៅទីក្រុង និងតាមបណ្តាខេត្តនានានៅក្នុងប្រទេសកម្ពុជាសម្រាប់ពេលបច្ចុប្បន្ន និងទៅថ្ងៃអនាគត ខាងអគ្គនាយកជំរុញពាណិជ្ជកម្មថៃ
រាជធានីភ្នំពេញ ៖ ដើម្បីជំរុញឲ្យផលិតផលថៃកាន់តែទទួលបានការគាំទ្រ និងប្រើប្រាស់កាន់តែច្រើននៅទីក្រុង និងតាមបណ្តាខេត្តនានានៅក្នុងប្រទេសកម្ពុជាសម្រាប់ពេលបច្ចុប្បន្ន និងទៅថ្ងៃអនាគត ខាងអគ្គនាយកជំរុញពាណិជ្ជកម្មថៃ គ្រោងនឹងនាំយកក្រុមហ៊ុនថៃចំនួន១១០ មករៀបចំពិព័រណ៍ពាណិជ្ជកម្មថៃ ថប់ថៃប្រែន នៅខេត្តសៀមរាប នាដើមខែវិច្ឆិកា ខាងមុខ ។
ក្រុមហ៊ុនថៃទាំង១១០ នឹងតាំងបង្ហាញនូវផលិតផលរបស់ខ្លួនដូចជា សម្ភារសំណង់ អាហារនិងភេសជ្ជៈ សម្លៀកបំពាក់និងវាយនភណ្ឌ សុខភាព សម្ផស្សនិងគ្រឿងសម្អាង សម្ភារប្រើប្រាស់ក្នុងផ្ទះនិងសម្ភារផ្ទះបាយ វត្ថុអនុស្សាវរីយ៍និងតុងតែងផ្ទះ សម្ភារធ្វើពីស្បែកនិងស្បែក គ្រឿងបន្លាស់រថយន្ត និងទំនិញOPOP ជាដើម ។
លោកស្រី ជីរ៉ាណាន់ វង្សមង្គល បានមានប្រសាសន៍ក្នុងសន្និសីទសារព័ត៌មាននៅភោជនីយដ្ឋានទន្លេបាសាក់២ កាលពីថ្ងៃទី១៩ តុលា ថា គោលបំណងក្នុងការរៀបចំពិព័រណ៍ពាណិជ្ជកម្មថៃ ថប់ថៃប្រែនឆ្នាំ២០១៦នេះ គឺដើម្បីផ្សព្វផ្សាយផលិតផលថៃ ដែលជាផលិតផលមានគុណភាពល្អ តម្លៃសមរម្យ និងស្វែងរកការគាំទ្រពីអតិថិជនទៅលើទំនិញថៃ ហើយម្យ៉ាងទៀតសម្រាប់រឹតចំណងមិត្តភាពរវាងប្រទេសនិងប្រជាពលរដ្ឋទាំងពីរកម្ពុជា-ថៃ ឱ្យកាន់តែល្អប្រសើរថែមទៀត ។
លោក ជីរ៉ាវុឍ សុវណ្ណអាត អគ្គទីប្រឹក្សាពាណិជ្ជកម្មប្រចាំស្ថានទូតថៃនៅកម្ពុជា (ថ្មី) មានប្រសាសន៍ថា ៖ « យើងមានគម្រោងជាច្រើនដើម្បីជំរុញការធ្វើពាណិជ្ជកម្មរួមគ្នារវាងកម្ពុជា-ថៃ នាពេលខាងមុខ ។ គម្រោងដែលគ្រោងរៀបចំនៅកម្ពុជានៅឆ្នាំនេះ ក្រៅពីពិព័រណ៍ពាណិជ្ជកម្មថៃ ថប់ថៃប្រែន គឺនៅខែធ្នូខាងមុខក្រសួងពាណិជ្ជកម្មថៃនឹងបញ្ជូនពាណិជ្ជករថៃមកចូលរួមតាំងពិព័រណ៍ជាមួយក្រសួងពាណិជ្ជកម្មកម្ពុជា ចំនួន៥០ស្តង់ ។ ដោយឡែក នៅឆ្នាំ២០១៧ យើងនឹងត្រៀមរៀបចំពិព័រណ៍ថប់ថៃប្រែននៅក្រុងភ្នំពេញ និងពិព័រណ៍ផ្សេងទៀតនៅខេត្តប៉ៃលិន » ។
ក្រៅពីការរៀបចំពិព័រណ៍នៅកម្ពុជា នៅប្រទេសថៃវិញ ក៏នឹងមានការរៀបចំពិព័រណ៍ពាណិជ្ជកម្មខ្នាតអន្តរជាតិជាច្រើន និងបានអនុញ្ញាតឱ្យពាណិជ្ជករកម្ពុជាចូលរួមតាំងបង្ហាញផលិតផលរបស់ខ្លួន តាមរយៈការគាំទ្រកិច្ចសហប្រតិបតិ្តការ និងឧបត្ថម្ភពីភាគីថៃផងដែរ ។
លោកបន្តថា ៖ « សម្រាប់គម្រោងដែលខ្ញុំលើកឡើងនេះ នឹងជួយជំរុញការធ្វើពាណិជ្ជកម្មរវាងប្រទេសយើងឱ្យមានការរីកចម្រើនបន្ថែមទៀត » ។
យោងតាមមន្ត្រីស្ថានទូតថៃប្រចាំកម្ពុជា បានឱ្យដឹង ការធ្វើពាណិជ្ជកម្មទ្វេភាគីរវាងកម្ពុជា-ថៃ នៅក្នុងរយៈពេល៨ខែដើមឆ្នាំ២០១៦ មានទំហំទឹកប្រាក់សរុបប្រមាណ៣.៥៤៧លានដុល្លារ ក្នុងនោះថៃនាំចេញមកកម្ពុជាមានទឹកប្រាក់២.៧៦១លានដុល្លារ ធ្លាក់ចុះ១៧% រីឯកម្ពុជានាំចេញទៅថៃ មានទឹកប្រាក់៧៨៦លានដុល្លារ កើនឡើងដល់៦៣% បើធៀបនឹងរយៈពេលដូចគ្នាកាលពីឆ្នាំ២០១៥កន្លងទៅ ៕
ចែករំលែកព័តមាននេះ