រាជធានីភ្នំពេញ ៖ ក្រុមគ្រួសាររបស់លោកកវី គង្គ ប៊ុនឈឿន បានសម្តែងការពិតមិនពេញ និងព្រមានចាត់វិធានការតាមផ្លូវច្បាប់ជុំវិញការយកបទម្ចាស់ដើម ដែលមានចំណងជើងថា «សែនឈឺចិត្ត ឬម្តាយក្មេកមកលេង» មកកាឡៃសាច់ភ្លេង និងទំនុកច្រៀងថ្មី ដែលធ្វើអោយខូចទម្រង់ដើម និងនាំឲ្យមហាជនមានការភាន់ច្រឡំ។
ប្រតិកម្មរបស់ក្រុមគ្រួសារលោក គង្គ ប៊ុនឈឿន នាពេលនេះ បានធ្វើឡើង បន្ទាប់ពីមានឆាណែលយូធូបមួយបានបង្ហោះបទចម្រៀង «សែនឈឺចិត្ត» មកកាឡៃទំនុកភ្លេងថ្មី ខណៈពេលក៏មានបេក្ខជនមួយរូប ក៏បានកាឡៃបទដូចគ្នានេះ ដោយបានប្តូរចំណងជើងថា «ខ្ចីលុយម៉ែក្មេក» មកប្រឡងនៅក្នុងកម្មវិធីលំដាប់ពិភពលោករបស់ស្ថានីយទូរទស្សន៍ក្នុងស្រុកមួយ។
យ៉ាងណា ក្រុមគ្រួសាររបស់លោក គង្គ ប៊ុនឈឿន បានស្នើឲ្យម្ចាស់ឆាណែលយូធូបទាំងនោះ ត្រូវដកសាច់ភ្លេង និងទំនុកច្រៀងចេញ មុននឹងឈានដល់វិធានការផ្លូវច្បាប់កម្មសិទ្ធិបញ្ញា។
កូនស្រីរបស់កវី គង្គ ប៊ុន ឈឿន គឺអ្នកស្រី ប៊ុនឈឿន សូរីវិល័យ បានបង្ហោះសារលើបណ្តាញសង្គមហ្វេសប៊ុកពាក់ព័ន្ធនឹងបញ្ហាខាងលើនេះថា «យើងខ្ញុំជាក្រុមគ្រួសារ សូមសំណូមពរម្ដងហើយម្ដងទៀត បញ្ឈប់ការយកស្នាដៃមរតកដើមយកមកច្រៀងបំពានបំផ្លាញសិទ្ធិស្នាដៃកវីស្ទឹងសង្កែ គង្គ ប៊ុនឈឿន បទ «សែនឈឺចិត្ត» (ម្តាយក្មេកមកលេង) ម្ចាស់សំនៀង រស់ សេរីសុទ្ធា ច្រៀងមានដាក់ក្នុងប្រលោមលោក «រឿងពិតរបស់ខ្ញុំ» យកមកក្រឡៃដាក់ពាក្យថ្មី (ខ្ចីលុយម៉ែក្មេក )» ។
លោកស្រីបន្តថា «អ្នកដំបូងដែលយកបទមកក្រឡៃ រហូតមានអ្នកមិនដឹងយកមកប្រលង ក្នុងកម្មវិធីលំដាប់ថ្នាក់ពិភពលោក ធ្វើអោយក្មេងជំនាន់ក្រោយកាន់តែយល់ច្រឡំ បទចម្រៀង មិនគិតពីម្ចាស់ដើម រួមទាំងការលួចរាប់រយបទផ្សេងទៀតរៀបរាប់មិនអស់ សូមឆាប់ដកសាច់ភ្លេង ទំនុកច្រៀងចេញពីយូធូប ឬអ្វីផ្សេងទៀត ពួកខ្ញុំមិនអនុញ្ញាតិទេ បើពុំនោះទេ ត្រូវប្រឈមនឹងច្បាប់កម្មសិទ្ធិបញ្ញា»។
លោកស្រីបន្តទៀតថា «សូមបញ្ជាក់ថា ពួកខ្ញុំគាំទ្រស្នាដៃកូនខ្មែរបង្កើតថ្មី រក្សាទំរង់ដើមតែមិនក្រឡៃបទ ម្ចាស់ដើម . កន្លងមក ដូចជា រឿងនាយចឺមច្រៀង បទ «នឹកភូមិភ្នំធំ» ដែលយកមកកាឡៃថ្មី ធ្វើអោយក្រុមគ្រួសារខ្ញុំចេញមុខតវ៉ា ។ កាលនោះ មានមនុស្សជាច្រើនគិតថា ម្តាយខ្ញុំបានប្ដឹង បានលុយ បានអី ហើយដើររករឿងគេ គ្រាន់តែយកបទចម្រៀងមកច្រៀងថ្មីសោះ ។ តាមការពិតក្រុមគ្រួសារខ្ញុំមិនដែលប្ដឹងអ្នកណា ឬបានសំណងពីនរណាម្នាក់ទេ។ តើខុសទេ ដែលម្ចាស់ដើមទាមទារថែរក្សាកម្មសិទ្ធិ បទចម្រៀងរបស់ខ្លួន?»។
ជាការកត់សម្គាល់ បទ «សែនឈឺចិត្ត» ត្រូវបាននិពន្ធបទភ្លេង និងទំនុកច្រៀងដោយលោក គង្គ ប៊ុនឈឿន និងសម្រួលតន្ត្រីដោយលោក ហាស់ សាឡន និងបកស្រាយដោយលោកស្រី រស់ សេរីសុទ្ធា ខណៈពេលដែលបទនេះ ក៏ជាបទមួយក្នុងចំណោមបទជាច្រើនទៀតដែលមានកម្មសិទ្ធិបញ្ញាផងដែរ។
គួរបញ្ជាក់ថា ក្រសួងវប្បធម៌ និងវិចិត្រសិល្បៈ បានប្រគល់បទចម្រៀងចំនួន៤១បទ ដែលជាស្នាដៃនិពន្ធរបស់លោក គង្គ ប៊ុនឈឿន ជូនអ្នកស្រី គា គីមលន ជាសិទ្ធិគ្រប់គ្រងមរតកសាសន៍បទចម្រៀង ដើម្បីផ្តល់លាភការ សម្រាប់ម្ចាស់ស្នាដៃពិតប្រាកដ ព្រមទាំងបន្សល់ទុក ទៅកូនចៅជំនាន់ក្រោយៗ។ ប្រការនេះ ធ្វើឡើងចៀសវាងការលួចចម្លង ដោយគ្មានការអនុញ្ញាតត្រឹមត្រូវ។
ចែករំលែកព័តមាននេះ