ដេប៉ូខ្សាច់ដ៏ធំមួយកន្លែងរបស់អ្នកមានម្នាក់ នៅក្បែរស្ពានព្រែកសំរោង កំពុងបំផ្លាញផ្លូវ និងប៉ះពាល់សុខភាពពលរដ្ឋ ខណៈក្រុមឡានដឹកខ្សាច់រាប់រយគ្រឿង ដឹកចេញពីដេប៉ូខ្សាច់នោះ ដូចហែបុណ្យកឋិន ទាំងថ្ងៃ ទាំងយប់ ពោលគឺ
ខេត្តកណ្តាល ៖ ដេប៉ូខ្សាច់ដ៏ធំមួយកន្លែងរបស់អ្នកមានម្នាក់ នៅក្បែរស្ពានព្រែកសំរោង កំពុងបំផ្លាញផ្លូវ និងប៉ះពាល់សុខភាពពលរដ្ឋ ខណៈក្រុមឡានដឹកខ្សាច់រាប់រយគ្រឿង ដឹកចេញពីដេប៉ូខ្សាច់នោះ ដូចហែបុណ្យកឋិន ទាំងថ្ងៃ ទាំងយប់ ពោលគឺ២៤ម៉ោងតែម្តង ។ ទីតាំងដេប៉ូខ្សាច់ដ៏ធំមួយនោះ នៅតាមបណ្តោយផ្លូវ២១ ស្ថិតក្នុងភូមិព្រែកសំរោង សង្កាត់ព្រែកសំរោង ក្រុងតាខ្មៅ ខេត្តកណ្តាល ។
បើតាមពលរដ្ឋរស់នៅក្បែរនោះ សុំមិនបញ្ចេញឈ្មោះ បានប្រាប់អោយដឹងថា រាល់ថ្ងៃអស់រយៈពេលជាច្រើនឆ្នាំមកហើយ ពិបាករស់នៅខ្លាំងណាស់ ពេលថ្ងៃហុយ ពេលយប់ថ្លង់សម្លេង បើក្រុមឡានដឹកជញ្ជូនមួយថ្ងៃរាប់រយឡានឯណោះ។
ពួកគាត់បន្ថែមថា មិនដឹងថា តើត្រូវធ្វើយ៉ាងម៉េចទៀតទេ? បើជម្រាបប្រាប់អាជ្ញាធរ ដូចចាក់ទឹកលើក្បាលទា នៅតែដដែល មិនដឹងថា ម្ចាស់ដេប៉ូមានបុណ្យសក្តិ ខ្សែធំប៉ុណ្ណានោះទេ ។ បើនិយាយរឿងសម្លេងវិញ យប់ឡើងដេកមិនបាននោះទេ សម្លេងថ្លង់អាអ៊ិចកាយខ្សាច់ផង ក្រុមឡានដឹកខ្សាច់ផង បញ្ចេញសំឡេងរកដេកពួនអត់បានសោះ។
ដោយឡែកផ្លូវវិញមាន ខ្សាច់ទឹកហូរពេញផ្លូវ ធ្វើអោយខ្សាច់ ដី កកពូនលើផ្លូវក្លាយជាភក់រអិលដល់អ្នកធ្វើដំណើរខ្លាំងណាស់ វាងាយនឹងធ្វើអោយកើតឡើងគ្រោះថ្នាក់ចរាចរណ៍ថែមទៀតផង ។ ពួកគាត់សង្ឃឹមថា លោក គង់ សោភណ្ឌ អភិបាលខេត្តកណ្តាល នឹងដោះស្រាយបញ្ហាខាងលើនេះ ដើម្បីក្តីសុខរបស់ប្រជាពលរដ្ឋ ។ ប៉ុន្តែមានមតិខ្លះថា ដូចជាមិនសង្ឃឹមលើម្ចាស់ទឹកម្ចាស់ដីខេត្តកណ្តាល ហ៊ានអារកាត់ឡើយ ព្រោះសង្ស័យត្រូវគ្នា ។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ