ជំនន់ទឹកភ្លៀងកំពុងវាយប្រហារផ្លូវជាតិលេខ៣ និងស្រុកបាទី
ខេត្តតាកែវ ៖ ជំនន់ទឹកភ្លៀងបាននិងកំពុងគំរាមកំហែងតំបន់នានាក្នុងប្រទេសកម្ពុជា ពិសេសផ្ទះសម្បែង ស្រែចម្ការ និងផ្លូវ ថ្នល់ ធ្វើឲ្យរាជរដ្ឋាភិបាលមានការព្រួយបារម្ភ …
ខេត្តតាកែវ ៖ ជំនន់ទឹកភ្លៀងបាននិងកំពុងគំរាមកំហែងតំបន់នានាក្នុងប្រទេសកម្ពុជា ពិសេសផ្ទះសម្បែង ស្រែចម្ការ និងផ្លូវ ថ្នល់ ធ្វើឲ្យរាជរដ្ឋាភិបាលមានការព្រួយបារម្ភយ៉ាងខ្លាំង ។ ចំពោះគ្រោះធម្មជាតិនេះខេត្តតាកែវក៏ទទួលរងផលប៉ះពាល់មិនតិចដែរ តែពុំទាន់មានការរងគ្រោះធ្ងន់ធ្ងរគួរឲ្យចាប់អារម្មណ៍នៅឡើយទេ ។
លោក ណុប នី ប្រធានមន្ទីរសាធារណការ និងដឹកជញ្ជូនខេត្តតាកែវ ដែលចុះពិនិត្យទឹកជំនន់នៅផ្លូវជាតិលេខ៣បានឲ្យដឹងថា គិតត្រឹមថ្ងៃទី១៩ ខែតុលា ឆ្នាំ២០១៦នេះ ជំនន់ទឹកភ្លៀងបានធ្វើឲ្យប៉ះពាល់ដល់ផ្ទះប្រជាពលរដ្ឋ ផ្លូវលំ ស្រែចម្ការនៅក្នុងភូមិឃុំមួយចំនួន ក្នុងស្រុកបាទី មានឃុំតាំដូង ឃុំកុមារាជា ឃុំក្រាំងលាវ ឃុំលំពង់ និង ឃុំសូរភី ជាដើម ។
លោកប្រធានមន្ទីរបានបន្តទៀតថា ផ្លូវលំទំនប់ភ្នំតូចនៅក្នុងឃុំសូរភីត្រូវបានទឹកជំនន់កាត់ផ្ដាច់ប្រវែង១៥ម៉ែត្រ ចំណែកផ្លូវជាតិលេខ៣ ត្រង់ចន្លោះគីឡូម៉ែត្រលេខ៣៧-៣៨ក្នុងឃុំតាំងដូងត្រូវបានទឹកជំនន់ហូរកាត់ថ្នល់ និងចន្លោះគីឡូម៉ែត្រលេខ៤៥-៤៦ក្នុងឃុំសូរភីទឹកក៏បានហូរកាត់ថ្នល់ជាតិផងដែរ ចំពោះផ្លូវលេខ១២២ ពីផ្លូវជាតិលេខ២ ទៅដល់ផ្លូវជាតិលេខ៣ ប្រវែងជាង៣គីឡូម៉ែត្រ ទឹកក៏បានហូរកាត់ថ្នល់ផងដែរ ។
លោកបប្រធានមន្ទីរបានបញ្ជាក់ថា ទន្ទឹមនឹងទឹកបានលិចផ្លូវជាតិ និងបាក់ទំនប់នេះ ទឹកជំនន់បានធ្វើឲ្យខូចខាតដល់ស្រូវប្រជាពលរដ្ឋចំនួន២៥៧ហិតាផងដែរ ។ ប៉ុន្តែស្ថានភាពនេះមិនមានសភាពធ្ងន់ធ្ងរគួរឲ្យព្រួយបារម្ភនៅឡើយទេ ហើយអាជ្ញាធរបានបើកទ្វារទឹកប៉ែកខាងក្រោមៗដើម្បីឲ្យទឹកហូរ ចៀសវាងទឹកជន់លិចបន្ថែមទៀត ដែលអាចឲ្យខូចខាតដល់ផលដំណាំរបស់ប្រជាពលរដ្ឋ ៕
ចែករំលែកព័តមាននេះ