រាជធានីភ្នំពេញ ៖ ក្នុងកិច្ចសហការជាមួយក្រសួងសុខាភិបាល អង្គការគ្រូពេទ្យគ្មានព្រំដែន (MSF) និងមន្ទីរពេទ្យព្រះកុសុមៈ បានផ្តួចផ្តើមកម្មវិធីថ្មីមួយក្នុងព្រះរាជាណាចក្រកម្ពុជា គឺការផ្តល់ការព្យាបាលរលាកថ្លើមប្រភេទសេដោយឥតគិតថ្លៃ ។
ក្នុងគម្រោងច្រើនឆ្នាំរបស់ខ្លួន កម្មវិធីនេះ នឹងធ្វើទៅតាមដំណាក់កាលផ្សេងៗគ្នា ដើម្បីឈានដល់ការព្យាបាល ជាមួយនឹងគោលបំណងធ្វើឱ្យមានភាពងាយស្រួលលើការធ្វើរោគវិនិច្ឆ័យ និងការព្យាបាលរលាកថ្លើមប្រភេទសេ ។ កម្មវិធីនេះ ចាប់ផ្តើមនៅក្នុងរាជធានីភ្នំពេញ ហើយនឹងពង្រីកខ្លួនចេញពីរាជធានីភ្នំពេញ ទៅតាមបណ្តាខេត្តផ្សេងៗក្នុងព្រះរាជាណាចក្រកម្ពុជា ។
ក្នុងដំណាក់កាលដំបូងនេះ ការពិគ្រោះជំងឺ និងការព្យាបាលសម្រាប់អ្នកជំងឺរលាកថ្លើមប្រភេទសេ នឹងប្រព្រឹត្តទៅនៅក្នុងកន្លែងរៀបចំថ្មីមួយនៅក្នុងមន្ទីរពេទ្យព្រះកុសុមៈ ។
នៅពេលអ្នកជំងឺបានចុះឈ្មោះ នៅផ្នែកពិគ្រោះជំងឺហើយ អ្នកជំងឺនឹងមានការពិគ្រោះប្រភេទជំងឺនៅក្នុងផ្នែកថ្លើម ក្រពះ ពោះវៀន ចំពោះករណីសង្ស័យថាមានឆ្លងមេរោគរលាកថ្លើមប្រភេទសេ នឹងត្រូវបញ្ជូនបន្តទៅកន្លែងព្យាបាលរលាកថ្លើមប្រភេទសេ សម្រាប់ការធ្វើតេស្តផ្សេងទៀត និងការព្យាបាលដោយឥតគិតថ្លៃ ។
អ្នកជំងឺ ឬអ្នកណាម្នាក់ចង់ដឹងព័ត៌មានបន្ថែមដើម្បីសុំការណាត់ជួប សូមទាក់ទងទៅផ្នែកពិគ្រោះជំងឺ នៅមន្ទីរពេទ្យព្រះកុសុមៈ ឬធ្វើការទំនាក់ទំនងទៅលោក ថន មាឃ ជំនួយការប្រធានបេសកកម្ម តាមរយៈអីុម៉ែលៈ MSFCambodiaHepC@gmail.com.
ជំងឺរលាកថ្លើមប្រភេទសេ ត្រូវបានគេទទួលស្គាល់ថា ជាបព្ហាាសុខភាពសាធារណៈចម្បងទូទាំងពិភពលោក ដែលមានអត្រាស្លាប់ប្រចាំឆ្នាំប្រមាណ៥០០.០០០នាក់ ។ ពីរភាគបីនៃប្រជាជនដែលបានឆ្លងមេរោគរលាកថ្លើមប្រភេទសេ រស់នៅកន្លែងដែលមានធនធាននៅទាប នៅក្នុងប្រទេសតំបន់អាហ្វ្រិក ឬអាស៊ី ដែលមានការធ្វើរោគវិនិច្ឆ័យ ឬការព្យាបាល បានតិចតួច ឬមិនមានតែម្តង ។ នៅក្នុងប្រទេសដែលមានប្រាក់ចំណូលទាប ឬមធ្យម ការចម្លងមេរោគរលាកថ្លើមប្រភេទសេ គឺសំខាន់តាមរយៈបញ្ចូលឈាម ឬការចាក់ថ្នាំដែលមិនមានសុវត្ថិភាព ។
អង្គការគ្រូពេទ្យគ្មានព្រំដែន បានមានវត្តមាននៅក្នុងប្រទេសកម្ពុជាអស់រយៈពេល៣៧ឆ្នាំមកហើយ ។ កម្មវិធីដំបូងរបស់អង្គការគ្រូពេទ្យគ្មានព្រំដែនបារាំងនៅប្រទេសកម្ពុជា បានចាប់ផ្តើមនៅឆ្នាំ១៩៧៩ នៅជំរំជនភៀសខ្លួន នៅតាមបណ្តោយព្រំដែនកម្ពុជា-ថៃ ដោយផ្តល់នូវជំនួយវេជ្ជសាស្ត្រដល់ប្រជាជនដែលភៀសខ្លួនចេញពីសង្គ្រាមស៊ីវិល ។ អង្គការនេះ ក៏ត្រូវបានគេហៅតាមភាសាក្នុងស្រុកថាជាគ្រូពេទ្យបារាំង។ មួយទសវត្សក្រោយមក អង្គការគ្រូពេទ្យគ្មានព្រំដែន ដើរតួនាទីយ៉ាងសំខាន់ក្នុងការគាំទ្រក្រសួងសុខាភិបាលដែលត្រូវរៀបចំប្រព័ន្ធជាថ្មី ។
វត្តមានរបស់អង្គការគ្រូពេទ្យគ្មានព្រំដែនច្រើនឆ្នាំនៅប្រទេសកម្ពុជា បានថយចុះដោយសារសមត្ថភាពរបស់ប្រព័ន្ធសុខាភិបាល មានការរីកចម្រើន ហើយអង្គការគ្រូពេទ្យគ្មានព្រំដែន ក៏បានងាកមកផ្ដោតលើជំងឺឆ្លងវិញ ។ ប៉ុន្មានឆ្នាំកន្លងមកនេះ អង្គការគ្រូពេទ្យគ្មានព្រំដែន បានធើ្វកម្មវិធីដោយផ្តោតទៅលើអ្នកជំងឺដែលឆ្លងមេរោគអេដស៍ និងមេរោគរបេង ៕
ចែករំលែកព័តមាននេះ