ខេត្តពោធិ៍សាត់ ៖ ជនត្រូវចោទចំនួន៣នាក់ ត្រូវបានចៅក្រមស៊ើបសួរសាលាដំបូងខេត្ត សម្រេចឲ្យឃុំខ្លួនដាក់ពន្ធនាគារខេត្តជាបន្តបន្ទាប់ ពាក់ព័ន្ធនឹងករណីប្រើអំពើហិ.ង្សាមានស្ថានទម្ងន់ទោស បណ្ដាលឱ្យជនរងគ្រោះស្លា.ប់ម្នាក់ និង២នាក់ទៀតរងរបួសធ្ងន់ ។
បើតាមលោក ម៉ូ លីដា ស្នងការរងនគរបាលខេត្ត ទទួលផែនព្រហ្មទណ្ឌ បានឲ្យដឹងថា ជនត្រូវចោទទាំង៣នាក់នេះ មាន ៖ ១-ឈ្មោះ សើម រើន ភេទប្រុស អាយុ៣០ឆ្នាំ រស់នៅក្នុងភូមិបឹងស្មុគ ឃុំស្វាយស ស្រុកក្រគរ ។ ជននេះបានកា.ប់ជនរងគ្រោះឈ្មោះ យឿន ពីទី ភេទប្រុស អាយុ១៦ឆ្នាំ រស់នៅក្នុងភូមិជាមួយគ្នា បណ្ដាលឲ្យរងរបួសធ្ងន់ កាលពីថ្ងៃទី១២ ខែមេសា ឆ្នាំ២០២២ វេលាម៉ោងប្រហែល៧និង៣០នាទីយប់ នៅក្នុងភូមិ ឃុំដែលពួកគេរស់នៅខាងលើដោយសារគំនុំ ។ ជននេះត្រូវបានសាលាដំបូងខេត្ត ចេញដីកាបង្គាប់ឲ្យឃុំខ្លួនជាបណ្ដោះអាសន្ន តាមដីកាសម្រេចឲ្យឃុំខ្លួនលេខ ២៣៩ឃខ/២២ ចុះថ្ងៃទី១៥ ខែមេសា ឆ្នាំ២០២២ របស់លោកចៅក្រមស៊ើបសួរ សុន នាថធាវី ។
២-ឈ្មោះ សឿន លន ភេទប្រុស អាយុ៦៨ឆ្នាំ រស់នៅក្នុងភូមិអារ៉ងព្រួច ឃុំអន្សាចំបក់ ស្រុកក្រគរ ។ ជននេះបានប្រើដំបងវា.យជនគ្រោះឈ្មោះ មួន ហន ភេទប្រុស អាយុ៣៥ឆ្នាំ រស់នៅក្នុងភូមិកំពង់ស្ទឹង ឃុំអន្សាចំបក់ ស្រុកក្រគរ បណ្ដាលឲ្យរងរបួសធ្ងន់ កាលពីថ្ងៃទី១៤ ខែមេសា ឆ្នាំ២០២២ វេលាម៉ោងប្រហែល៧និង៣០នាទីយប់ នៅចំណុចមាត់ទឹកក្នុងភូមិដែលជនរងគ្រោះរស់នៅ ។ ករណីនេះកើតឡើងដោយសារទំនាស់ពាក្យសម្ដីនៅពេលស្រវឹង ហើយត្រូវ
បានសាលាដំបូងខេត្ត ចេញដីកាបង្គាប់ឲ្យឃុំខ្លួនជាបណ្ដោះអាសន្ន តាមដីកាសម្រេចឲ្យឃុំខ្លួនលេខ២៣៧ឃខ/២២ ចុះថ្ងៃទី១៥ ខែមេសា ឆ្នាំ២០២២ របស់លោកចៅក្រមស៊ើបសួរ សុន នាថធាវី ។
៣-ឈ្មោះ ស្វាយ ពៅ ភេទប្រុស អាយុ៥៤ឆ្នាំ រស់នៅក្នុងភូមិគល់ទទឹង ឃុំសន្ទ្រែ ស្រុកភ្នំក្រវាញ ។ ជននេះបានយកកូនកាំបិតកៃចាក់ជនរងគ្រោះឈ្មោះ ផាន់ កូ ភេទប្រុស អាយុ៣២ឆ្នាំ ចំក្រោមផ្ចិតបណ្ដាលឲ្យស្លា.ប់ ។ ជនរងគ្រោះមានស្រុកកំណើតក្នុងភូមិពងពស់ ឃុំរោងដំរី ស្រុកបាភ្នំ ខេត្តព្រៃវែង តែបានមកស្នាក់នៅកន្លែងកើតហេតុក្នុងភូមិក្សេតបូរី ឃុំសន្ទ្រែ ស្រុកភ្នំក្រវាញ ។
ដើមចមក្នុងករណីខាងលើនេះ គឺនៅវេលាម៉ោងប្រមាណ១១និង៥០នាទីយប់ ថ្ងៃទី១៤ ខែមេសា ឆ្នាំ២០២២ ផ្ដើមឡើងដោយសារជនដៃដល់ជិះម៉ូតូបើកភ្លើងហ្វា ធ្វើឱ្យជនរងគ្រោះចាំងភ្នែកមើលផ្លូវមិនឃើញ ជិះម៉ូតូទៅមុខមិនបាន ខណៈពេលធ្វើដំណើរបញ្ច្រាសទិសគ្នា ។ ដោយសារបែបនេះ ជនរងគ្រោះក៏ដើរសំដៅមកម៉ូតូជនដៃដល់រួចនិយាយថា «ជិះម៉ូតូបើកភ្លើងហ្វាមើលផ្លូវមិនឃើញ» ហើយបានចាប់ក្របួច.កអាវធ្វើឲ្យជនដៃដល់ខឹង ក៏ទាញយកកូនកាំបិតកៃ ដែលនៅជាប់នឹងសោម៉ូតូចាក់ជនរងគ្រោះតែម្ដង ។
ជនត្រូវចោទរូបនេះ ត្រូវបានសាលាដំបូងចេញដីកាបង្គាប់ឲ្យឃុំខ្លួនជាបណ្ដោះអាសន្ន តាមដីកាសម្រេចឲ្យឃុំខ្លួនលេខ២៤១ ចុះថ្ងៃទី១៦ ខែមេសា ឆ្នាំ២០២២ ដោយចៅក្រមស៊ើបសួរលោក យុិន សារឿន ៕
ចែករំលែកព័តមាននេះ