រាជធានីភ្នំពេញ ៖ ធនាគារអភិវឌ្ឍន៍អាស៊ី ហៅកាត់ថា (ADB) បានបញ្ចេញរបាយការណ៍ថ្មីមួយថា ការអភិវឌ្ឍសេដ្ឋកិច្ចក្នុងប្រទេសកម្ពុជានៅឆ្នាំ២០១៦ បានបង្ហាញឱ្យឃើញយ៉ាងច្បាស់តាមការរំពឹងទុក ។
រាជធានីភ្នំពេញ ៖ ធនាគារអភិវឌ្ឍន៍អាស៊ី ហៅកាត់ថា (ADB) បានបញ្ចេញរបាយការណ៍ថ្មីមួយថា ការអភិវឌ្ឍសេដ្ឋកិច្ចក្នុងប្រទេសកម្ពុជានៅឆ្នាំ២០១៦ បានបង្ហាញឱ្យឃើញយ៉ាងច្បាស់តាមការរំពឹងទុក ។ នៅក្នុងបច្ចុប្បន្នភាពនៃអត្ថបទបោះពុម្ពផ្សាយប្រចាំឆ្នាំចម្បងមួយអំពីបញ្ហាសេដ្ឋកិច្ច ដែលមានឈ្មោះថា «ការព្យាករអំពីការអភិវឌ្ឍនៅអាស៊ី » ធនាគារអភិវឌ្ឍន៍អាស៊ីបានរក្សាការព្យាកររបស់ខ្លួនចំពោះកំណើនសេដ្ឋកិច្ចកម្ពុជាថា មានអត្រា៧%ក្នុងឆ្នាំនេះ និង៧,១%ក្នុងឆ្នាំ២០១៧ ។
លោក Samiuela Tukuafu ប្រធានធនាគារអភិវឌ្ឍន៍អាស៊ីប្រចាំកម្ពុជា មានប្រសាសន៍ថា ៖ « បន្ទាប់ពីទទួលបានឋានៈជាប្រទេសមានប្រាក់ចំណូលមធ្យមកម្រិតទាបក្នុងខែកក្កដា ការព្យាករសម្រាប់សេដ្ឋកិច្ចកម្ពុជា នៅតែបន្តរឹងមាំ ដោយការនាំចេញឧស្សាហកម្មសម្លៀកបំពាក់ និងស្បែកជើងបានកើនឡើងចំនួន៩,៤%ក្នុងឆមាសទី១ឆ្នាំនេះ ។ បើទោះបីជាកំណើនឥណទានជូនដល់វិស័យឯកជនបានថយចុះមកត្រឹម២៨,១% បើធៀបនឹងឆ្នាំមុនក្នុងខែមិថុនាក៏ដោយ ប៉ុន្តែវានៅតែបង្ហាញឱ្យឃើញអំពីតម្រូវការក្នុងស្រុកមានកម្រិតខ្ពស់ ។ កត្តាអាកាសធាតុមានលក្ខណៈប្រសើរជាងមុនចាប់ពីខែមិថុនា បន្ទាប់ពីគ្រោះរាំងស្ងួតអូសបន្លាយ គប្បីអាចជួយឱ្យវិស័យកសិកម្មមានភាពធូរស្រាលឡើងវិញបន្តិច » ។
លោកបន្តថា ធនាគារអភិវឌ្ឍន៍អាស៊ី ត្រៀមខ្លួនរួចជាស្រេចក្នុងការគាំទ្រដល់កំណើនសេដ្ឋកិច្ចប្រកបដោយបរិយាប័ន្នរបស់ប្រទេសកម្ពុជា តាមរយៈការវិនិយោគសំខាន់ៗនៅក្នុងផ្នែកផលិតកម្ម កសិកម្ម ការដឹកជញ្ជូននិងភស្តុភារ ការអប់រំនិងការបណ្តុះបណ្តាលបច្ចេកទេសវិជ្ជាជីវៈ និងការអភិវឌ្ឍវិស័យហិរញ្ញវត្ថុ ។
តាមរបាយការណ៍លើកឡើងថា គោលនយោបាយហិរញ្ញវត្ថុ ត្រូវបានគេមើលឃើញថា គាំទ្រដល់កំណើនសេដ្ឋកិច្ច ដោយការចំណាយរបស់រាជរដ្ឋាភិបាលបានកើនឡើង១៥,៦%ក្នុងឆមាសទី១ឆ្នាំ២០១៦ ដោយសារកំណើននៃបៀវត្សរ៍ សេវាសាធារណៈ និងប្រាក់ចំណូលបានកើនឡើង២៤,១% អាស្រ័យដោយរាជរដ្ឋាភិបាលបន្តកែលម្អលើការប្រមូលពន្ធ។ ឱនភាពថវិកាមិនរាប់បញ្ចូលហិរញ្ញប្បទានឥតសំណង មានគោលដៅពង្រីកផលិតផលក្នុងស្រុកសរុប៤,៣% ។ តម្រូវការក្នុងស្រុកមានភាពរឹងមាំ និងការកើនឡើងនៃតម្លៃស្បៀងអាហារបានធ្វើឱ្យអតិផរណាជាមធ្យមកើនឡើងខ្ពស់ជាងការរំពឹងទុកចំនួន២,៧% ក្នុងរយៈពេល៦ខែដំបូងនៃឆ្នាំ២០១៦ បើធៀបនឹងឆ្នាំមុន ក្រោយពេលមាននិន្នាការធ្លាក់ចុះមកត្រឹម១,២%កាលពីឆ្នាំមុន ។ ការព្យាករអំពីអតិផរណាបានកើនឡើងបន្តិច ដោយអត្រាជាមធ្យមមានចំនួន៣,៤%ក្នុងឆ្នាំ២០១៧ ដែលការព្យាករបែបនេះស្របនឹងការរំពឹងទុកថា នឹងមានការកើនឡើងនៃតម្លៃប្រេងសកល ។
ការនាំចេញទំនិញបានកើនឡើងក្នុងកម្រិតប៉ាន់ប្រមាណចំនួន១២,៣%ក្នុងរយៈពេល៦ខែដំបូង ដែលអត្រានេះលឿនជាង៩,៤%ក្នុងឆមាសទី១ឆ្នាំ២០១៥ ។ កំណើនការនាំចូលទំនិញបានធ្លាក់ចុះពី១៧,០% មកត្រឹម៧,៣%។ ឱនភាពគណនីចរន្ត ដោយមិនរាប់បញ្ចូលការផ្ទេរជាផ្លូវការ នៅតែត្រូវបានគេមើលឃើញថា ប្រែប្រួលបន្តិចបន្តួចក្នុងឆ្នាំនេះ បើធៀបនឹងឆ្នាំ២០១៥ និងត្រូវបានគេរំពឹងថា នឹងរួមតូចក្នុងឆ្នាំ២០១៧ ដែលជាហេតុនាំឱ្យរក្សាបាននូវជំហរខាងក្រៅមួយដ៏ល្អសម្រាប់ប្រទេសកម្ពុជា ៕
ចែករំលែកព័តមាននេះ