ថ្ងៃទី២៥ វិច្ឆិកា ២០១៦ នឹងមានកាត់ទោសលោកសម រង្ស៊ី និងសហការី
រាជធានីភ្នំពេញ ៖ ប្រភពព័ត៌មានច្បាស់ការពីសាលាដំបូងរាជធានីភ្នំពេញបានឲ្យដឹងថា នៅថ្ងៃទី២៥ ខែវិច្ឆិកា ឆ្នាំ២០១៦ខាងមុខ ក្រុមប្រឹក្សាតុលាការនឹងកាត់ទោសលោក សម រង្ស៊ី
រាជធានីភ្នំពេញ ៖ ប្រភពព័ត៌មានច្បាស់ការពីសាលាដំបូងរាជធានីភ្នំពេញបានឲ្យដឹងថា នៅថ្ងៃទី២៥ ខែវិច្ឆិកា ឆ្នាំ២០១៦ខាងមុខ ក្រុមប្រឹក្សាតុលាការនឹងកាត់ទោសលោក សម រង្ស៊ី រួមទាំងសហការីរបស់គាត់២នាក់ទៀតពាក់ព័ន្ធករណីក្លែងបន្លំផែនទីកម្ពុជា ហើយបង្ហោះនៅលើបណ្ដាញសង្គមរបស់គាត់។
យោងតាមសេចក្ដីជូនដំណឹងរបស់សាលាដំបូងរាជធានីភ្នំពេញបានឲ្យដឹងថា ក្រុមប្រឹក្សាតុលាការដែលត្រូវជំនុំជម្រះសំណុំរឿងលោក សម រង្ស៊ីនោះរួមមាន លោកចៅក្រម លាង សំណាត់ ចៅក្រម នូ វាសនា ចៅក្រម អ៊ឹម វណ្ណៈ និងតំណាងអយ្យការលោកព្រះរាជអាជ្ញារង សៀង សុខ។ ចំណែកមេធាវីការពារផ្លូវច្បាប់ឲ្យលោកសម រង្ស៊ី គឺលោកមេធាវី សម សុខគង់។ ក្នុងសំណុំរឿងលេខ ៣១២០ ចុះថ្ងៃទី១៥ ខែសីហា ឆ្នាំ ២០១៥ ដែលតុលាការត្រូវជំនុំជម្រះនេះមានជនជាប់ចោទទី១. គឺលោក សម រង្ស៊ី ទី២. ឈ្មោះ អ៊ឹង ជុងលាង ហៅម៉ាប់ ហៅកូនជ្រូក ទី៣.ឈ្មោះសត្យា សម្បត្តិ ឬសម្បត្តិ សត្យា ។
ជនជាប់ចោទទាំង៣នាក់ត្រូវបានតុលាការចោទប្រកាន់ពីបទ សមគំនិតក្នុងអំពើក្លែងបន្លំឯកសារសាធារណៈ បទប្រើប្រាស់ឯកសារសាធារណៈក្លែង និងបទញុះញង់ឲ្យមានភាពវឹកវរធ្ងន់ធ្ងរដល់សង្គមជាតិ ។ បច្ចុប្បន្នជនជាប់ចោទទាំង៣នាក់កំពុងរត់គេចខ្លួននៅបរទេស ក្រោយពីមានដីការស្វែងរកចាប់ខ្លួនរបស់តុលាការ ។
អង្គហេតុសំខាន់ដែលនាំឲ្យមានការចោទប្រកាន់លើលោកសម រង្ស៊ី និងសហការីរបស់គាត់ ២នាក់ទៀតនេះគឺយោងទៅតាមចម្លើយសារភាពរបស់លោក ហុង សុខហួរ ដែលបានឆ្លើយបំភ្លឺក្នុងសវនាការ២លើករួចមកហើយពាក់ព័ន្ធនឹងបញ្ហាផែនទីក្លែងក្លាយ រួមទាំងឯកសារមួយចំនួនធំស្ដីអំពីផែនទី បន្ទាត់ព្រំដែនគោក ទឹក ដែលលោក ហុង សុខហួរ បានយកទៅបង្ហោះ នៅក្នុងPage និងAccount របស់លោក សម រង្ស៊ី បង្កឲ្យមានការយល់ច្រឡំពីមជ្ឈដ្ផានមហាជនគ្រប់ស្រទាប់វណ្ណៈ ។
នៅក្នុងចម្លើយសារភាពរបស់លោក ហុង សុខហួរ បានបញ្ជាក់ថា លោកជាអ្នកបញ្ជាឲ្យអ្នកបច្ចេកទេសគ្រប់គ្រងគណនីហ្វេសប៊ុកលោក សម រង្ស៊ី ឈ្មោះ អ៊ឹង ជុងលាង និងសម្បត្តិ សត្យា រៀបចំផែនទី និងឯកសារស្ដីពីព្រំដែន ដាក់បង្ហោះក្នុង Account Facebook របស់លោក សម រង្ស៊ី ដោយសារតែហ្វេសប៊ុកលោក សម រង្ស៊ីមាន friends ច្រើនលាននាក់ចូលអាន។ ដោយយោងលើចម្លើយសារភាពរបស់លោក ហុង សុខហួរ បែបនេះហើយទើបតុលាការបានបំបែកសំណុំរឿងចោទប្រកាន់បន្ថែមលើលោកសម រង្ស៊ី និងសហការីរបស់គាត់ ដែលក្នុងខណៈនោះដែរ ជនសង្ស័យទាំង៣នាក់ បានរត់គេចខ្លួនទៅបរទេសបាត់ដល់បច្ចុប្បន្ន ។
ចំពោះសំណុំរឿងលោក ហុង សុខហួរ នេះដែរ សាលាដំបូងរាជធានីភ្នំពេញមិនទាន់បានកាត់ក្ដីចប់នៅឡើយទេ ដោយសារមេធាវីការពារផ្លូវច្បាប់ឲ្យលោក ហុង សុខហួរ បានស្នើឲ្យចាត់របៀបដើម្បីដាក់បញ្ចូលឧបករណ៍អេឡិចត្រូនិចក្នុងការទាញយកសារពីប្រភពដើមដែលជនជាប់ចោទទាញយកមកប្រើប្រាស់ផ្សព្វផ្សាយនៅក្នុហ្វេសប៊ុកលោក សម រង្ស៊ី៕
ចែករំលែកព័តមាននេះ