ខេត្តសៀមរាប ៖ ក្រុមមន្ត្រីអាជ្ញាធរជាតិអប្សរាដែលយាមនៅក្នុងបរិវេណប្រាសាទអង្គរវត្តបានរងការចោទប្រកាន់ថាបាននាំគ្នាព្រួតវាយធ្វើបាបក្មេងប្រុសម្នាក់រួចចងដៃទាំង២ទៅក្រោយទុកចោលកណ្ដាលព្រៃ ។ ហេតុការណ៍នេះបានកើតឡើងកាលពីថ្ងៃទី២៣ ខែកញ្ញា ឆ្នាំ២០១៦ ស្ថិតនៅក្នុងបរិវេណប្រាសាទអង្គរវត្ត ខាងត្បូងឆៀងខាងលិចវត្តរការខាងត្បូង ក្នុងភូមិសាស្ត្រខេត្តសៀមរាប ។
បើតាមប្រភពឃើញហេតុការណ៍នៅកន្លែងកើតហេតុបានប្រាប់ឱ្យដឹងថា មុនថ្ងៃកើតហេតុ គេឃើញក្មេងប្រុសម្នាក់នោះត្រូវបាននគរបាលមិនអនុញ្ញាតឱ្យចូលមកក្នុងបរិវេណប្រាសាទអង្គរវត្តទេ ខណៈនោះក្មេងដែលមានសតិមិនគ្រប់បានហែលទឹកកស្សិណអង្គរឆ្លងទៅឆ្លងមក រហូតដល់រូបគេអាចចូលបាន ។
ប្រភពផ្សេងទៀតពីក្មេងក្នុងវត្តនៅក្បែកន្លែងកើតហេតុបានឱ្យដឹងថា គេឃើញក្មេងរូបនោះមានលក្ខណៈសតិមិនគ្រប់ ហើយជាជនអនាថាបានដើរចូលមកក្នុងវត្តដើម្បីរកបាយហូប ហើយក្មេងរូបនោះបានបោកចានបាយបែក អស់ចំនួនមួយ បន្ទាប់មកបានរត់ចេញទៅក្រៅវិញ ស្រាប់តែមានក្រុមមន្ត្រីរបស់អាជ្ញាធរជាតិអប្សរាមួយក្រុមបានស្ទាក់ខាងមុខចាប់យកទៅកន្លែងស្ងាត់នៅក្នុងព្រៃជិតប្រាសាទតារាជ្យវ៉ៃរហូតដល់សន្លប់ រួចចងស្លាបសេកទុកចោលក្នុងព្រៃ ។
ប្រភពបន្តថា ក្រោយមកទើបមានមន្ត្រីនគរបាល និងមន្ត្រីអប្សរា បានលើកដាក់ម៉ូតូដឹកយកទៅតាមផ្លូវព្រលានយន្តហោះ ដោយយកស្បង់ចីវររុំមុខថែមទៀតផង ។
ជុំវិញករណីចោទប្រកាន់ខាងលើនេះ លោក ឡុង កុសល អ្នកនាំពាក្យរបស់អាជ្ញាធរជាតិអប្សរា បានឱ្យដឹងដែរថា ករណីនេះលោកនៅមិនទាន់បានទទួលព័ត៌មានច្បាស់ទេ កំពុងឱ្យគេស៊ីបសួរ ។ លោកបន្តថា បើមន្ត្រីរបស់អាជ្ញាធរអប្សរា អ្នកទាំងអស់ហ្នឹងគាត់មានការងារ មានវិជ្ជាជីវៈ មានការទទួលខុសត្រូវ មិនអាចចេះតែធ្វើអ៊ីចឹងកើតទេ ។ លោកបានបញ្ជាក់ថា បើមានឃើញករណីនេះមែន គេមានក្រុមប្រឹក្សាវិន័យ មានចំណាត់ការតាមបែបបទរដ្ឋបាល ហើយបើមានអ៊ីចឹងមែននោះនឹងត្រូវធ្វើតាមច្បាប់ជាក់ជាមិនខានឡើយ ៕
ចែករំលែកព័តមាននេះ