សហការមិនឱ្យក្រុមជួញគ្រឿងញៀ.ននិងឧក្រិដ្ឋកម្មព្រៃឈើយកព្រំដែនធ្វើជម្រក
រាជធានីភ្នំពេញ ៖ នៅក្នុងជំនួបសម្ដែងការគួរសមជាមួយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា លោក ចាន់ សាម៉នចាន់ញ៉ាឡាត
រាជធានីភ្នំពេញ ៖ នៅក្នុងជំនួបសម្ដែងការគួរសមជាមួយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា លោក ចាន់ សាម៉នចាន់ញ៉ាឡាត រដ្ឋមន្ដ្រីក្រសួងការពារជាតិប្រទេសឡាវ មានប្រសាសន៍ជម្រាបជូនសម្ដេចតេជោនាយករដ្ឋមន្ដ្រីថា ដំណើរទស្សនកិច្ចរបស់លោកមកកាន់ព្រះរាជាណាចក្រកម្ពុជានៅពេលនេះ គឺដើម្បីពង្រឹងកិច្ចសហប្រតិបត្ដិការរវាងកងទ័ពប្រទេសទាំងពីរឱ្យកាន់តែរឹងមាំថែមទៀត ។
លោក អា៊ង សុផល្លែត ជំនួយការសម្ដេចតេជោ ហ៊ុន សែន បានប្រាប់អ្នកសារព័ត៌មានថា ជំនួបសម្តែងការគួរសមនេះបានប្រព្រឹត្ដទៅនារសៀលថ្ងៃទី២២ ខែកញ្ញា នៅវិមានសន្ដិភាព ។
លោករដ្ឋមន្ត្រីការពារជាតិឡាវ មានប្រសាសន៍ទៀតថា កងទ័ពទាំងពីរកន្លងមកបានទទួលនូវការគាំទ្រគ្នាទៅវិញទៅមកយ៉ាងជិតស្និទ្ធ ហើយនៅពេលនេះទៀតកំពុងសហការគ្នា ដើម្បីធ្វើយ៉ាងណាជំរុញនិងធ្វើការងារដែលថ្នាក់ដឹកនាំកំពូលនៃប្រទេសទាំងពីរបានចុះហត្ថលេខា និងឯកភាពគ្នារួចមកហើយ ។
ជាការឆ្លើយតប សម្ដេចអគ្គមហាសេនាបតីតេជោ ហ៊ុន សែន បានសម្ដែងនូវក្តីរីករាយចំពោះកិច្ចសហប្រតិបត្ដិការនេះ និងបានផ្ដល់អនុសាសន៍ឱ្យយកចិត្ដទុកដាក់ទៅលើការបង្ក្រាបការជួញដូរគ្រឿងញៀន ឧក្រិដ្ឋកម្មព្រៃឈើ ជាពិសេសកុំឱ្យក្រុមអ្នកជួញដូរគ្រឿងញៀន អ្នកប្រព្រឹត្ដឧក្រិដ្ឋកម្មព្រៃឈើនោះយកព្រំដែនធ្វើជាជម្រក ។
បន្ទាប់មក នារសៀលថ្ងៃដដែលនោះដែរ សម្តេចតេជោនាយករដ្ឋមន្ត្រី ក៏បានអនុញ្ញាតឲ្យលោក Truong Minh Tuan រដ្ឋមន្ដ្រីក្រសួងព័ត៌មាននិងសារគមនាគមន៍វៀតណាម ចូលជួបសម្តែងការគួរសម ។
លោករដ្ឋមន្ត្រី Truong Minh Tuan មានប្រសាសន៍ជម្រាបសម្ដេចតេជោ ថា ដំណើរទស្សនកិច្ចរបស់លោកមកកាន់ព្រះរាជាណាចក្រកម្ពុជា នាពេលនេះ គឺដើម្បីពង្រឹងនិងពង្រីកទំនាក់ទំនងរវាងប្រទេសទាំងពីរ ជាពិសេសតាមរយៈក្រសួងព័ត៌មាននិងសារគមនាគមន៍វៀតណាម ជាមួយនឹងក្រសួងព័ត៌មាននិងក្រសួងប្រៃសណីយ៍ និងទូរគមនាគមន៍កម្ពុជា ។
លោករដ្ឋមន្ដ្រី ក៏បានជម្រាបជូនសម្ដេចតេជោនាយករដ្ឋមន្ដ្រីដែរថា លោកបានជួបជាមួយលោករដ្ឋមន្ដ្រីក្រសួងប្រៃសណីយ៍ និងទូរគមនាគមន៍ និងជួបជាមួយលោករដ្ឋមន្ដ្រីក្រសួងព័ត៌មាន ហើយបានពិភាក្សាគ្នានិងជំរុញការងារដែលថ្នាក់ដឹកនាំបានឯកភាពគ្នារួចមកហើយ ព្រមទាំងឯកភាពគ្នាលើការផ្លាស់ប្ដូរព័ត៌មានរវាងស្ថាប័នទាំងពីរ ។
ជាការឆ្លើយតប សម្ដេចតេជោនាយករដ្ឋមន្ត្រី ហ៊ុន សែន បានសម្ដែងនូវក្តីរីករាយចំពោះកិច្ចសហប្រតិបត្ដិការនេះ ជាពិសេសកិច្ចពិភាក្សារវាងលោករដ្ឋមន្ដ្រី Truong Minh Tuan និងរដ្ឋមន្ដ្រីក្រសួងប្រៃសណីយ៍និងទូរគមនាគមន៍ និងរដ្ឋមន្ដ្រីក្រសួងព័ត៌មានកម្ពុជា ។
សម្ដេចបានផ្ដល់អនុសាសន៍ឱ្យយកចិត្ដទុកដាក់ ទី១-ទៅលើបញ្ហាជាន់ហ្វ្រេកង់គ្នា និងទី២-ធ្វើយ៉ាងណាផ្សព្វផ្សាយព័ត៌មានដែលប្រជាជនមានជំនឿជឿជាក់ ជាពិសេសគឺជាព័ត៌មានសម្រាប់សាធារណជនផងដែរ ៕
ចែករំលែកព័តមាននេះ