ផលិតករដែលមានស្នាដៃលោក ហ្វៃ សំអាង បានប្រកាសត្រៀមផលិតខ្សែភាពយន្តខ្នាតធំ ជាការបើកទំព័រថ្មី ជាមួយនឹងការសម្រិតសម្រាំងជ្រើសរើសតួអង្គសំខាន់ៗប្រមាណជាង៤០នាក់ឲ្យចូលរួមសម្តែង ខណៈពេលដែលដំណើរការថតរឿងខាងលើនេះ នឹងចាប់ផ្តើម
រាជធានីភ្នំពេញ ៖ ផលិតករដែលមានស្នាដៃលោក ហ្វៃ សំអាង បានប្រកាសត្រៀមផលិតខ្សែភាពយន្តខ្នាតធំ ជាការបើកទំព័រថ្មី ជាមួយនឹងការសម្រិតសម្រាំងជ្រើសរើសតួអង្គសំខាន់ៗប្រមាណជាង៤០នាក់ឲ្យចូលរួមសម្តែង ខណៈពេលដែលដំណើរការថតរឿងខាងលើនេះ នឹងចាប់ផ្តើមនាពាក់កណ្តាលឆ្នាំ២០២២ ខាងមុខនេះ។
បើយោងតាមប្រកាសរបស់លោក ហ្វៃ សំអាង នៅលើបណ្តាញសង្គមហ្វេសប៊ុកកាលពីម្សិលមិញ បានឲ្យដឹងថា ជម្រាបសួរបងប្អូនដែលជាទស្សនិកជនគាំទ្រផលិតកម្មហង្សមាស និងរស្មីហង្សមាស ក៏ដូចជាបងប្អូនដែលនិយមគាំទ្រស្នាដៃ ដឹកនាំសម្ដែងរបស់ខ្ញុំ នៅក្នុងឱកាសថ្ងៃខួបកំណើតរបស់ខ្ញុំ ថ្ងៃទី១០ ខែមេសា ឆ្នាំ២០២២នេះ ខ្ញុំមានទឹកចិត្តសប្បាយរីករាយ សូមបង្ហាញជូននូវវណ្ណកម្មថ្មីដែលជាខ្សែភាពយន្តខ្នាតធំ និពន្ធឡើងដោយអ្នកនិពន្ធពីររួមគ្នា គឺលោក យូ សុភា និងលោក ហ្វៃ សំអាង ជាខ្សែភាពយន្តដែលបង្ហាញពីអត្តសញ្ញាណជាតិ មានទាំងអត្ថរស និងអត្ថន័យ។
លោកបញ្ជាក់ថា ក្រុមការងារផលិតកំពុងសម្រិតសម្រាំងតួសម្តែងដែលមានតួអង្គសំខាន់ៗជាង៤០នាក់ តើតារាប្រុសស្រីណាខ្លះដែលលោកអ្នកស្រឡាញ់ ពេញចិត្តចង់ឲ្យមានវត្តមាននៅក្នុងខ្សែភាពយន្តខ្នាតធំមួយនេះ? សូមចូលរួមបញ្ចេញយោបល់ និងប្រាប់ឈ្មោះតារាដែលនៅក្នុងចិត្តរបស់លោកអ្នកមក… យើងនឹងបើក Camera នាពាក់កណ្តាលឆ្នាំ២០២២នេះ ហើយ ។ តើតារាដួងណាខ្លះនឹងលេចវត្តមាននៅក្នុងខ្សែភាពយន្តខ្នាតធំរបស់ផលិតកម្មហង្សមាសនេះ? ជួបគ្នានៅក្នុងរោងភាពយន្ត រឿង «អប្សរាមហាអង្គរ» ។
យ៉ាងណា គេនៅមិនទាន់ដឹងទេថា ភាពយន្តខ្នាតធំដែលលោក ហ្វៃ សំអាង ត្រៀមនឹងថតនេះ ប្រើរយៈពេលប៉ុន្មាន និងត្រៀមដាក់បញ្ចាំងនាអំឡុងពេលណានោះឡើយ ប៉ុន្តែតាមរយៈការផ្សព្វផ្សាយដំណឹងខាងលើនេះ ទស្សនិកជន ជាពិសេសអ្នកនិយមគាំទ្រស្នាដៃផលិតរបស់លោកបានសម្តែងការគាំទ្រ និងទន្ទឹងរង់ចាំទស្សនាស្នាដៃថ្មីរបស់លោកនាពេលនេះ។
ជាការកត់សម្គាល់ នៅមុនពេលប្រកាសពីការត្រៀមផលិតភាពយន្តខ្នាតធំខាងលើនេះ លោក ហ្វៃ សំអាង ធ្លាប់បានបញ្ជាក់ប្រាប់សារព័ត៌មាននៅក្នុងស្រុកមួយថា រូបលោកកំពុងខិតខំសរសេររឿងខ្មែរបុរាណមួយឲ្យចប់សព្វគ្រប់ ដែលរឿងនេះ លោកបានគិតជាយូរមកហើយ។
លោកថា ខ្សែភាពយន្ដថ្មីនេះគឺអស្ចារ្យ និងប្លែកជាងរឿងណាៗទាំងអស់ ក្នុងចំណោមស្នាដៃរបស់លោកកន្លងមក ខណៈពេលស្នាដៃថ្មីមួយនេះ លោកសង្ឃឹមថា នឹងទទួលបានការគាំទ្រច្រើន ដូចទៅនឹងស្នាដៃផលិតរឿងរបស់លោកកន្លងមកដែរ៕
ចែករំលែកព័តមាននេះ