តារាចម្រៀងចាស់វស្សាអ្នកនាង ម៉េង កែវពេជ្ជតា បានខកខានមិនបានច្រៀងរាំនៅស្រុកខ្មែរនាឱកាសចូលឆ្នាំប្រពៃណីខ្មែរនាឆ្នាំនេះឡើយ ដោយសារតែនាងមានការចាំបាច់មួយដែលត្រូវឲ្យនាងធ្វើដំណើរទៅកាន់ប្រទេសបារាំង និងស្នាក់នៅទីនោះរយៈពេលប្រមាណជាង២ខែ
រាជធានីភ្នំពេញ ៖ តារាចម្រៀងចាស់វស្សាអ្នកនាង ម៉េង កែវពេជ្ជតា បានខកខានមិនបានច្រៀងរាំនៅស្រុកខ្មែរនាឱកាសចូលឆ្នាំប្រពៃណីខ្មែរនាឆ្នាំនេះឡើយ ដោយសារតែនាងមានការចាំបាច់មួយដែលត្រូវឲ្យនាងធ្វើដំណើរទៅកាន់ប្រទេសបារាំង និងស្នាក់នៅទីនោះរយៈពេលប្រមាណជាង២ខែ។
ការទៅកាន់ប្រទេសបារាំងនាពេលនេះរបស់អ្នកនាង ម៉េង កែវពេជ្ជតា គឺក្នុងគោលបំណងទៅមើលកូនប្រុសដែលកំពុងរស់នៅ និងបន្តការសិក្សានៅទីនេះ ខណៈពេលដែលអ្នកនាងក៏នឹងឆ្លៀតពេលចេញច្រៀងឲ្យបងប្អូនខ្មែរនៅបារាំងបានសប្បាយរីករាយនារដូវកាលចូលឆ្នាំខ្មែរផងដែរ។
អ្នកនាង ម៉េង កែវពេជ្ជតា បានប្រកាសតាមបណ្តាញហ្វេសប៊ុករបស់ខ្លួនថា សង្ក្រាន្តឆ្នាំនេះនាងខ្ញុំមិនបាននៅច្រៀងជូនទេ ដោយសារនាងខ្ញុំត្រូវមកមើលកូនរៀនឯស្រុកបារាំង ។ សូមអភ័យទោស និងសូមអរគុណដល់បណ្តាក្រុមហ៊ុន ម្ចាស់ពិធីនានាដែលផ្តល់កិត្តិយសអញ្ជើញនាងខ្ញុំ។
អ្នកនាងបញ្ជាក់ថា ចូលឆ្នាំ អ្នកសិល្បៈគ្រប់គ្នាគេនៅកើបលុយក្នុងស្រុក ប្លែកតែខ្ញុំ ឆ្នាំនេះបែរជាចេញក្រៅទៅវិញ តើមកពីក្នុងស្រុកខ្ញុំអត់ការងារធ្វើឬយ៉ាងម៉េច? ចម្លើយ ៖ មិនមែនទេ បុព្វហេតុគឺដើម្បីកូន កូនប្រុសដែលនៅរៀនម្នាក់ឯង បើទោះជាមានអ៊ំពូមីង មានលោកតាលោកយាយ ក៏គេនៅតែត្រូវការម្តាយដែរ ។
អ្នកនាងថា ខ្ញុំមកនេះមិនមែនមកកើបលុយទុកខ្លួនឯងទេ ក៏មិនមែនមកដើរលេងដែរ តែខ្ញុំមកផ្តល់ភាពកក់ក្តៅអោយកូន សូមអរគុណបងប្អូនទស្សនិកជន និងហ្វ៊ែន ២ខែទៀតពេជ្ជតាវិលទៅស្រុកខ្មែរវិញហើយ ចាំទទួលផងណា៎អលណព្វ។
ជាការកត់សម្គាល់ កូនប្រុសរបស់អ្នកនាង ម៉ែង កែវពេជ្ជតា បាននិងកំពុងស្នាក់នៅប្រទេសបារាំង ដើម្បីបន្តការសិក្សានៅទីនោះ ក្រោមការមើលថែយ៉ាងយកចិត្តទុកដាក់បំផុតពីបុរសម្នាក់ ដែលគេសង្ស័យថា បុរសខ្មែរអាណិកជនរូបនោះជាគូស្នេហ៍របស់នាង។
គេនៅចាំបានថា កាលពីអំឡុងដើមឆ្នាំ២០២២ នេះ អ្នកនាង ម៉េង កែវពេជ្ជតា ក៏ធ្លាប់បានចេញទៅប្រទេសបារាំង ដើម្បីមើលស្ថានភាពរស់នៅ និងការសិក្សារបស់កូនប្រុសម្តងរួចមកហើយ ខណៈពេលដែលអ្នកនាងបានខកខានមិនបានទៅជួបកូនប្រុសអស់រយៈពេល២ឆ្នាំ ដោយសារការរីករាលដាលនៃជំងឺកូវីដ១៩។
អ្នកនាង ម៉េង កែវពេជ្ជតា ធ្លាប់បានពោលពាក្យយ៉ាងចាក់ដោតទៅកាន់កូនប្រុសដែលកំពុងសិក្សានៅប្រទេសបារាំងនាពេលនេះថា ម៉ែដឹងថាកូនក៏លំបាកក្នុងការសិក្សានៅប្រទេសគេ ព្រោះមិនមែនជាភាសារជាតិយើង ។ ដើម្បីដេញអោយទាន់គេកូនត្រូវខំប្រឹងទ្វេដង ពិតជាមិនងាយស្រួលទេ គេដើរ យើងរត់ ។ ប៉ុន្តែម៉ែជឿជាក់លើប្រាជ្ញា និងការប្រឹងប្រែងរបស់កូនថា កូនអាចធ្វើបាន ។ កូនប្រុសមាសម្តាយ ! សូមកូនរីករាយចំពោះភ័ព្វសំណាងខ្ពង់ខ្ពស់របស់កូនប្រកបដោយក្តីសង្ឃឹម ។
កូនបានទទួលការគាំទ្រ ជំរុញលើកតម្កើងបង្កើនសមត្ថភាពដល់កូនប្រកបដោយក្តីស្រលាញ់ថ្នាក់ថ្នមយ៉ាងល្អបំផុតអំពីចាស់ទុំ បើទោះជាលោកមិនមែនជាឪពុកបង្កើត ប៉ុន្តែទឹកចិត្តរបស់លោកពិតជាធំធេងខ្លាំងណាស់ មួយទៀតចូរកូនកុំភ្លេចពាក្យទូន្មានប្រៀនប្រដៅទាំងប៉ុន្មានរបស់ចាស់ទុំ និងម៉ែ គឺសុំអោយកូនតស៊ូខំរៀន ប្រព្រឹត្តខ្លួនជាមនុស្សនិស្ស័យល្អ ធ្វើតែអ្វីល្អៗ កាន់ចិត្តសច្ចៈ ទៀងត្រង់ ហើយកូនត្រូវតែមោះមុត ព្រោះអនាគតកូនប្រុសគឺជាបង្គោលដ៏រឹងមាំសម្រាប់គ្រួសារ និងសង្គមជាតិ ។ ម៉ែសូមជូនពរកូនប្រុសម៉ែ សូមកូនមានក្តីសុខសំណាងល្អ សុខភាពល្អ ព្រះតាមថែរក្សា មានអារម្មណ៍ភ្លឺថ្លាប្រាជ្ញាវាងវៃ និងមានជោគជ័យទាំងក្នុងការរៀនសូត្រ ទាំងក្នងឆាកជីវិតរបស់កូន ។ ម៉ែ និងប្អូននឹកកូនគ្រប់វេលា រតនៈ៕
ចែករំលែកព័តមាននេះ