ខេត្តកំពត ៖ រមណីយដ្ឋានទេសចរណ៍ ធម្មជាតិ«កោះតាដាទឹកធ្លាក់»ជាទីពេញនិយមទៅទៅកម្សាន្តរបស់អ្នកទេសចរ ។
ពេលនេះគ្រឿងចក្រកំពុងឈូសឆាយផ្លូវទៅកាន់ជ្រលងភ្នំផ្សេងៗ ស្ថិតក្នុងភូមិសាស្ត្រភូមិស្នំប្រាំពីរ ឃុំមាក់ប្រាង្គ ស្រុកទឹកឈូ ខេត្តកំពត ជាទីតាំងនៃតំបន់ទេសចរណ៍នោះ។ ជារៀងរាល់ថ្ងៃសៅរ៍ និងអាទិត្យ ភ្ញៀវជាតិ និងអន្តរជាតិតែងតែនាំគ្នាទៅកម្សាន្តកៅកោះតាដាទឹកធ្លាក់ថ្មដាតាសច្ចំ និងទឹកធ្លាក់តាដារូងចន្ទ ។
យុវជនឈ្មោះខូវ ប៊ុនឃីន អាយុ២០ឆ្នាំ រស់នៅក្រុងកំពង់សោមដែលទៅកម្សាន្តនៅរមណីយដ្ឋានកោះតាដាទឹកធ្លាក់កាលពីពេល ថ្មីៗកន្លងមកនិយាយថា «ទីនេះខ្ញុំមិនដែលមកទេ ខ្ញុំពិតជាសប្បាយណាស់ » ។ ចំណែកស៊ូ ប៊ុនធឿន ជាមន្ត្រីនគរបាលខេត្តកំពត បាននាំគ្រួសាររបស់ខ្លួនទៅកម្សាន្តនៅទីនោះដែរ ។
អ្នកទស្សនាទាំងឡាយតែងតែរីករាយចំពោះការងូតទឹកលេងកម្សាន្ត និងទស្សនាធម្មជាតិដ៏ប្រណីតគាប់ភ្នែក ។
លោកបណ្ឌិតញឹម វណ្ណដា មានប្រសាសន៍ថា រមណីយដ្ឋានថ្មីនេះលោកកំពុងយកគ្រឿងចក្រឈូសឆាយផ្លូវទៅកាន់ទីកន្លែង ផ្សេងៗដើម្បីងាយស្រួលធ្វើដំណើរសម្រាប់អ្នកទេសចរ។ កន្លែងទេសចរណ៍នេះជាកន្លែងធម្មជាតិ ពិតៗ។ ការចំណាយទុនធ្វើផ្លូវទៅកាន់កន្លែងថ្មីបំផុតទៅដល់ជ្រលងភ្នំប៉ែកខាងកើតរមណីយដ្ឋានភ្នំបូកគោនេះដើម្បីឱ្យកាន់តែទាក់ទាញភ្ញៀវជាតិ និងអន្តរជាតិចាប់អារម្មណ៍កាន់តែខ្លាំងឡើង ។
លោកសយ ស៊ីណូល ប្រធានមន្ទីរទេសចរណ៍ខេត្តកំពតឱ្យដឹងថា ភ្ញៀវទេសចរទៅកម្សាន្តនៅកោះតាដាទឹកធ្លាក់ក្នុងរដូវវស្សាឆ្នាំនេះច្រើនជាងកាលពីឆ្នាំមុន ៕
ចែករំលែកព័តមាននេះ