ខេតស្ទឹងត្រែង ៖ ជាធម្មតាតាមការកត់សម្គាល់នៅពេលមានភ្លៀងធ្លាក់កក់ខែថ្មីៗជោកជាំ ធ្វើឱ្យសត្វហ៊ីងដែលនៅសំងំក្នុងដីសើមនិងក្រោមស្លឹកឈើងាប់ វារត់ចេញមកក្រៅនិងយំសម្លេងទ្រហឹងតគ្នា ហើយត្រូវគេដើឆ្លុះនិងចាប់នៅពេលយប់ យកទៅលក់លើទីផ្សារឱ្យអ្នបរិភោគ ។
សត្វហ៊ីងចេញនៅរដូវធ្លាក់ភ្លៀងកក់ខែថ្មីៗ គឺមានពងពេញៗពោះដោយមិនទាន់បើកមាត់ចាប់សត្វល្អិតផ្សេងៗធ្វើជាចំណី គឺគេពេញនិយមទិញទៅធ្វើជាម្ហូបបំផុត ទោះបីតម្លៃថ្លៃបន្តិចក៏ដោយ ។ ចំណែកសត្វហ៊ីងដែលបើកមាត់និងជម្រុះពងអស់ក៏គេមិនសូវទិញ និងយកទៅបរិភោគដែរ ។ សត្វហ៊ីងជាធម្មតានៅពេលធ្លាក់ភ្លៀងពេលយប់ពួកវារត់ចេញមកក្រៅ ហើយអ្នកដើរចាប់ក៏ស៊ូដើរចាប់ចាប់នៅពេលយប់ផងដែរ នៅពេលថ្ងៃពួកវាសំងំមិនសូវចេញពីចេញនោះទេ។
ការដើរឆ្លុះចាប់ហ៊ីងយកមកលក់ គឺមិនមានអ្វីជាការលំបាកទេ គេគ្រាន់តែប្រើអាគុយពាក់គោមលើចិញ្ចើមនិងកាន់ការ៉ុងមួយដើររក នៅតាមវាលស្រែ ថ្លុក ត្រពាំង ស្វែងរកចាប់វាពេលមេឃកំពុងតែធ្លាក់ភ្លៀងតែប៉ុណ្ណោះ។អ្នកចាប់ហ៊ីងលក់ឆ្នាំនេះថា ហ៊ីងមានតម្លៃខ្ពស់ជាងឆ្នាំណាៗទាំងអស់ ជាក់ស្តែង ហ៊ីងដែលគេដាក់លក់នៅផ្សារស្ទឹងត្រែង គឺមានតម្លៃចាប់ពីជាង៣ម៉ឺនរៀលឡើងទៅក្នុងមួយគីឡូក្រាម។
ក្រៅពីនោះ ចំពោះឈ្មួញកណ្តាលដែលបានទិញយកលក់បន្ត ចេញទៅក្រៅខេត្តគឺ ឡើងទៅដល់៥ម៉ឺនរៀលក្នុងមួយគីឡូក្រាម។ខុសពីឆ្នាំមុនដោយក្នុងសត្វហ៊ីងមួយគីឡូក្រាមលក់បានត្រឹមតែ១៥.០០០រៀលប៉ុណ្ណោះ។ រីឯវិធីធ្វើម្ហូបគឺភាគច្រើនគេយកទៅលាងជាមួយទឹកអំបិលដាក់នៅក្នុងធុងទាំងរស់ ឬស្ងោរជាមួយស្លឹកអំពិល រួចយកទៅហាលថ្ងៃឲ្យស្ងួត ហើយយកទៅអាំងជ្រលក់ទឹកត្រី ឬបំពងខ្លាញ់យកទៅស្ងោរតាមចំណង់ចំណូលចិត្តរបស់អ្នកបរិភោគម្នាក់ៗ។
លោកស្រី សមវិចិត្រ នាយខណ្ឌរដ្ឋបាលជលផលស្តីទីខេត្តស្ទឹងត្រែងឲ្យដឹងថា មូលហេតុដែលនាំឲ្យសត្វហ៊ីងធម្មជាតិឡើងថ្លៃដល់រាប់ម៉ឺនរៀលបែបនេះ គឺដោយសារតែមានតម្រូវការបរិភោគកើនឡើងកាន់តែច្រើន ។លោកស្រី សមវិចិត្ត បន្ថែមទៀតថា ឆ្នាំកន្លងមកមនុស្សភាគច្រើនជាពិសេស យុវវ័យនៅខេត្តផ្សេងៗ គឺមិនសូវបានស្គាល់ពីសត្វហ៊ីង និងរសជាតិរបស់វាទេ ប៉ុន្តែថ្មីៗនេះដោយសារគេឃើញមានការផ្សព្វផ្សាយតាមបណ្តាញសង្គមហ្វេសប៊ុក គឺធ្វើឲ្យមនុស្សភាគច្រើនបានស្គាល់ហើយចង់បរិភោគវា។ ប៉ុន្តែក៏មានអ្នកខ្លះហាក់មានការខ្ពើមរអើមមិនហ៊ានប្រថុយបរិភោគចំពោះសត្វហ៊ីងនេះដែរ។
សត្វហ៊ីងគឺជាសត្វមួយប្រភេទសន្ដាននឹងកង្កែបដែរ តែវាមានមាឌត្រមុល បំប៉ោងខ្លួនបាន,វាចូលចិត្តបង្កប់ខ្លួននៅក្នុងដីសើមឬក្រោមគំនរស្លឹកឈើសើមៗ។ នៅពេលណាមានភ្លៀងធ្លាក់ វាចេញមកខាងក្រៅស្រែកយំឮសូរខ្លាំងហួសមាឌ។ សត្វហ៊ីងមាន៣ប្រភេទគឺ ហ៊ីងកណ្ដោល ឬហ៊ីងក្រូត មាឌធំជាងហ៊ីងឯទៀត វាយំឮក្រេតក្រូតៗ, ហ៊ីងជ័រ មានមាឌតូចជាងហ៊ីងកណ្ដោល មានជ័រស្អិតនៅលើស្បែក វាយំឮសូរតូច និងហ៊ីងចំបក់ មានមាឌតូចជាងហ៊ីងជ័រ វាយំឮសូរខ្សោយជាងហ៊ីងជ័រ ៕
ចែករំលែកព័តមាននេះ