រាជធានីភ្នំពេញ ៖ បុរសម្នាក់ឈ្មោះ ចាយ សុខឃី អាយុ៣៦ឆ្នាំ ជាកសិកររស់នៅភូមិអន្លង់ ឃុំព្រែកតាមាក់ ស្រុកខ្សាច់កណ្ដាល ខេត្តកណ្ដាល ដែលមានជំងឺផុងលលាដ៍ក្បាលធ្ងន់ធ្ងរស្ទើរតែបាត់បង់ជីវិតដោយសារគ្រោះថ្នាក់ចរាចរណ៍ត្រូវបានសង្គ្រោះជីវិតឲ្យរស់រានឡើងវិញ ក្រោមការឧបត្ថម្ភការព្យាបាលទាំងស្រុង ព្រមទាំងមានការឧបត្ថម្ភផ្សេងៗទៀតរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តាមរយៈលោកជំទាវ ពេជ ចន្ទមុន្នី ហ៊ុនម៉ាណែត ។
ស្ត្រីឈ្មោះ សុខ សំអឿន ជាប្រពន្ធបានរៀបរាប់ឲ្យដឹងថា ប្តីរបស់គាត់បានជួបគ្រោះថ្នាក់ចរាចរណ៍កាលពីថ្ងៃទី១៧ ខែមិថុនា ឆ្នាំ២០១៦ នៅពេលដែលដើរឆ្លងថ្នល់ត្រូវរថយន្តបុកពីក្រោយបណ្តាលឲ្យបែកលលាដ៍ក្បាលធ្ងន់ធ្ងរ ដែលត្រូវវះកាត់ជាបន្ទាន់លើកទី១ ដើម្បីយកលលាដ៍ក្បាលមកចិញ្ចឹមក្នុងពោះ ។ ដើម្បីសង្គ្រោះជីវិតប្តី គាត់ត្រូវបង្ខំចិត្តលក់ដី និងផ្ទះសម្បែងដើម្បីបានប្រាក់វះកាត់លើកទី១ ។
ស្ត្រីរូបនោះបានបន្តថា គាត់និងក្រុមគ្រួសារបានរស់នៅជាមួយពិការភាព និងអស់សង្ឃឹមព្រោះគ្មានប្រាក់ដើម្បីបន្តការព្យាបាល ហើយមានកូន២នាក់នៅក្នុងបន្ទុកទៀតដែលបញ្ហានេះបានធ្វើឱ្យជីវភាពគ្រួសាររបស់គាត់មានការលំបាកបំផុតព្រោះមិនអាចប្រកបរបរអ្វីបាន។ ជាភ័ព្វសំណាង បងស្រី និងក្រុមគ្រួសារបានជួបជាមួយក្រុមការងារសមាគមគ្រូពេទ្យស្ម័គ្រចិត្តយុវជនសម្តេចតេជោនាំយកមកវះកាត់ និងព្យាបាលនៅមន្ទីពេទ្យ Jeremiah’s Hope កាលពីថ្ងៃទី២៤ ខែសីហា ឆ្នាំ២០១៦ ក្រោមការជួយឧបត្ថម្ភទាំង ស្រុងពីសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ។ ដោយមានការយកចិត្តទុកដាក់ពីក្រុមគ្រូពេទ្យស្ម័គ្រចិត្តយុវជនសម្តេចតេជោ បងប្រុស ចាយ សុខឃី បានធូរស្រាលប្រសើរជាងមុន គាត់អាចកម្រើកដៃជើង និងអាចនិយាយបាន ។
ក្រុមគ្រួសារបងប្រុស ចាយ សុខឃី បានបង្ហាញគុណូបការគុណ និងគោរពថ្លែងអំណរគុណចំពោះការឧបត្ថម្ភដ៏ថ្លៃថ្លាបំផុតប្រកប ដោយទឹកចិត្តសប្បុរសធម៌ និងមនុស្សធម៌ដ៏មានតម្លៃមិនអាចកាត់ថ្លៃបានរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសមាគមគ្រូពេទ្យស្ម័គ្រចិត្តយុវជនសម្តេចតេជោ ដែលបានផ្តល់ជីវិតថ្មី ក្តីសង្ឃឹមថ្មីនិងបានធ្វើឲ្យជីវភាពគ្រួសារមានលក្ខណៈប្រសើរជាងមុនដល់ក្រុមគ្រួសារគាត់ ។
បើតាមការបញ្ជាក់របស់លោកវេជ្ជបណ្ឌិតបានឲ្យដឹងថា ករណីនេះមានលក្ខណៈលំបាកស្មុគស្មាញ បើមិនមានការព្យាបាលទាន់ពេលវេលានោះទេ អ្នកជំងឺអាចពិការភាពមួយជីវិត ឬអាចបាត់បង់ជីវិតទៀតផង ។ នេះមិនមែនជាករណីធ្ងន់ធ្ងរទីមួយទេដែលក្រុមការងារគ្រូពេទ្យស្ម័គ្រចិត្តយុវជនសម្តេចតេជោបានជួយសង្គ្រោះជីវិតនោះ គឺក្រុមការងារនៃសមាគមនេះបានវះកាត់ និងព្យា បាលសង្គ្រោះជីវិតប្រជាពលរដ្ឋជាច្រើននាក់មកហើយ ៕
ចែករំលែកព័តមាននេះ