លោក Orlando Bloom បុរសពោះម៉ាយកូនមួយមានបំណងចង់រៀបការជាមួយនាង Katy Perry តារាចម្រៀងដ៏ល្បីឈ្មោះ ប៉ុន្តែខាងស្រីនៅមានការអល់អែកចំពោះអាពាហ៍ពិពាហ៍ដែលនាងមិនធ្លាប់ឆ្លងដល់ត្រើយក្នុងពេលអតីតកាល ។ គូស្នេហ៍នោះមានភាពល្អូកល្អិនផ្អែមល្អែមនឹងគ្នា ។ លោក Orlando Bloom បាននាំនាង Katy Perry ទៅជួប Fylnn ជាកូនប្រុសរបស់ខ្លួន និងនាំនាងទៅសម្រាកលំហែកាយជាមួយគ្នាទៀតផង ។
សារព័ត៌មាន «People» ផ្សាយកាលពីពេល ថ្មីៗកន្លងមកថា តារាសម្តែងរូបនោះហាក់ដូចជាចង់រៀបការជាមួយនាង Katy Perry ដោយនិយាយថា «ខ្ញុំចង់រួមរស់ជាមួយ Katy Perry ហើយក៏ចង់មានកូនជាមួយនាងដែរ» ។
គូស្នេហ៍នោះនៅមិនទាន់ភ្ជាប់ពាក្យទេ ប៉ុន្តែហាក់ដូចជាមានតម្រុយកើតឡើងច្រើន ព្រោះខាងប្រុសនិយាយថា «ខ្ញុំរមែងនិយាយថា Katy Perry ជាស្ត្រីមានចំណុចពិសេសជា រឿយៗកន្លងមក ។ ពីមុនខ្ញុំមិនធ្លាប់មានទំនុកចិត្តជាមួយស្ត្រីណាម្នាក់ឡើយ» ។
ស្របពេលជាមួយគ្នានេះ មិត្តភក្តិរបស់ Katy Perry បញ្ជាក់ថា មើលទៅតារាចម្រៀងរូបនេះហាក់ដូចជាមិនទាន់ត្រៀមខ្លួនលើការរៀបការទេ និងតាមសម្តីមិត្តភក្តិរបស់នាងបញ្ជាក់ថា «នាងនៅមិនទាន់សម្រេចចិត្តរៀបអាពាហ៍ពិពាហ៍ទេ លុះត្រាតែនាងបានជួបនរណាម្នាក់ដែលស្មោះស្ម័គ្រ ម្យ៉ាងការបែកបាក់របស់នាងជាមួយលោក Russell Brand ហាក់ដូចជាច្របូកច្របល់ក្នុងអារម្មណ៍របស់នាងបំផុត» ៕
ចែករំលែកព័តមាននេះ