រាជធានីភ្នំពេញ ៖ ខណៈមានវិនិយោគិនពីបណ្ដាប្រទេសនានាជាច្រើនចូលមកវិនិយោគនៅក្នុងប្រទេសកម្ពុជា ជាពិសេស លើវិស័យអចលនទ្រព្យ ដែលជាវិស័យមួយថ្មី និងទើបតែដើរតាមក្រោយបណ្ដាប្រទេសជិតខាង កម្ពុជាបានសម្រួល និងបើកឱកាសឱ្យវិនិយោគិនទាំងនោះវិនិយោគលើវិស័យជាច្រើន ។
លោក សុក ស៊ីផាណា ទីប្រឹក្សារាជរដ្ឋាភិបាលកម្ពុជា បានមានប្រសាសន៍ក្នុងវេទិកា ស្តីពីបច្ចុប្បន្នភាពឧស្សាហកម្មអចលនទ្រព្យនៅក្នុងប្រទេសកម្ពុជាកន្លងមកថា កម្ពុជាបានសម្រួលការងាយស្រួលដល់បណ្ដាវិនិយោគិនខាងក្រៅច្រើន ដើម្បីលើកទឹកចិត្តដល់ការវិនិយោគរបស់ពួកគេក្នុងប្រទេសកម្ពុជា ។ លោកថា ៖ « យើងក្រឡេកទៅមើលប្រទេសជិតៗយើង លក្ខខណ្ឌនៃការវិនិយោគពីបណ្ដាអ្នកវិនិយោគក្រៅប្រទេស គឺមានភាពស្មុគស្មាញច្រើន ។ អ្នកវិនិយោគទុនអាចចូលមកវិនិយោគក្នុងប្រទេសកម្ពុជា ដោយគ្មានការហាមឃាត់ណាមួយឡើយ ។ តែបើយើងមើលទៅប្រទេសជិតខាងយើងវិញ មានប្រទេសខ្លះមិនបានបើកឱ្យធ្វើពាណិជ្ជកម្មសេរីឡើយ ហើយប្រទេសខ្លះទៀត ពេលអ្នកវិនិយោគយកលុយចូលវិនិយោគមិនជាមានបញ្ហាទេ តែនៅពេលយកលុយចេញទៅវិញ អាចនឹងមានបញ្ហា។
ប្រទេសមួយចំនួនទៀត ពេលអ្នកវិនិយោគចង់ធ្វើពាណិជ្ជកម្មលើវិស័យផ្សេងៗ ត្រូវបានគេកំណត់ភាគរយក្នុងការវិនិយោគ គឺត្រូវតែមានភាគហ៊ុនពីម្ចាស់ទឹក ម្ចាស់ដី ។ ចំណែកប្រទេសខ្លះទៀត នៅពេលដែលវិនិយោគិនចង់វិនិយោគ គឺត្រូវរក្សាទុក៣០% ឱ្យម្ចាស់ទឹក ម្ចាស់ដី » ។
លោកបន្តថា ទាំងនេះគឺជាបរិបទរបស់កម្ពុជា ហើយចាប់តាំងពីកម្ពុជាចូលជាសមាជិកអង្គការពាណិជ្ជកម្មពិភពលោកក្នុងឆ្នាំ២០០៤ និងបន្ទាប់ពីសភានោះផ្ដល់សច្ចាប័នដល់កម្ពុជា ឃើញថា លំហូរវិនិយោគទុនចូលមកកម្ពុជាមានកាន់តែច្រើនឡើងៗ ។ ម្យ៉ាងវិញទៀត បន្ទាប់ពីវិបត្តិហិរញ្ញវត្ថុពិភពលោកក្នុងឆ្នាំ២០០៨ កម្ពុជាមានភាពយ៉ាប់យឺន១ឆ្នាំប៉ុណ្ណោះ គឺក្នុងឆ្នាំ២០០៩ តែបន្ទាប់ពីនោះមក កម្ពុជាមានស្ថានភាពល្អប្រសើរឡើងវិញ ។ លោកមានប្រសាសន៍ថា ៖ « ធនាគារពិភពលោក ដែលមានការិយាល័យនៅគ្រប់ប្រទេសទាំងអស់ ក៏បានវិភាគឃើញថា នៅលើពិភពលោកមានតែប្រទេសចំនួន៦ប៉ុណ្ណោះដែលមានកំណើនសេដ្ឋកិច្ចមធ្យម២០ឆ្នាំ លើស៧% ក្នុងនោះក៏មានប្រទេសកម្ពុជាផងដែរ ។ ដោយសារតែកំណើនសេដ្ឋកិច្ចនេះដែរ កាលពីខែមុននេះ ធនាគារពិភពលោកក៏បានចេញរបាយការណ៍មួយទៀត ដែលមានតែប្រទេស៤ប៉ុណ្ណោះបានទាញទម្លាក់អត្រាភាពក្រីក្រ ក្នុងនោះកម្ពុជាបានទម្លាក់អត្រាភាពក្រីក្រពី៥៣%កាលពី២០ឆ្នាំមុន មកនៅត្រឹមតែ១៤%ប៉ុណ្ណោះនាពេលបច្ចុប្បន្ន » ។
លោកបន្ថែមថា បច្ចុប្បន្ន ដើម្បីបង្កលក្ខណៈងាយស្រួលដល់ការវិនិយោគពីខាងក្រៅ កម្ពុជាបានសាងសង់កំពង់ផែបន្ថែមទៀតនៅខេត្តព្រះសីហនុ ហើយក៏ត្រៀមសាងសង់កំពង់ផែនៅខេត្តកំពតផងដែរ ។ ក្រៅពីនោះ ព្រលានយន្តហោះអន្តរជាតិ ក៏បានពង្រីកជាបន្តបន្ទាប់ ទាំងព្រលានអន្តរជាតិពោធិចិនតុង និងព្រលានយន្តហោះកងកេងជាដើម ហើយក្រុមហ៊ុនទេសចរណ៍ទៀតសោត ក៏បានពង្រីកការហោះហើររបស់ខ្លួនត្រង់មកកាន់កម្ពុជាផងដែរ ។
លោកថា ៖ « បើសិនជាមិនមានកំណើនទេសចរណ៍ មិនមានកំណើនអ្នកវិនិយោគរបស់ជនជាតិគេមកកាន់កម្ពុជាទេនោះ តើក្រុមហ៊ុនអន្តរជាតិទាំងនោះនឹងបើកការហោះហើរត្រង់មកកាន់កម្ពុជាដែរទេ វាពិតជាគ្មាននោះទេ ហើយនៅពេលបើកការហោះហើរត្រង់របស់ក្រុមហ៊ុនអន្តរជាតិទាំងនោះ វារឹតតែធ្វើឱ្យកំណើនអ្នកវិនិយោគ និងកំណើនទេសចរណ៍កាន់តែច្រើនមកកាន់កម្ពុជា ។ ដូចនេះ កម្ពុជាក៏ត្រូវត្រៀមខ្លួនសម្រាប់ទទួលពួកគេដែរដូចជា ផ្នែកបម្រើសេវាកម្មផ្សេងៗជាដើម » ។
គួរបញ្ជាក់ថា បើតាមរបាយការណ៍របស់ក្រសួងរៀបចំដែនដីនគរូបនីយកម្ម និងសំណង់កាលពីឆ្នាំមុននេះថា ទុនវិនិយោគក្នុងវិស័យសំណង់រយៈពេល១៤ឆ្នាំ ចាប់ពីឆ្នាំ២០០០ ដល់ឆ្នាំ២០១៤ គិតជាមធ្យមមានប្រមាណ១.៥០០លានដុល្លារអាមេរិក ។ នេះគ្រាន់តែទុនវិនិយោគក្នុងវិស័យសំណង់មួយប៉ុណ្ណោះ ហើយនៅមានវិនិយោគិនក្រៅប្រទេសជាច្រើនបានចូលមកចាប់ដៃគូវិនិយោគក្នុងវិស័យផ្សេងៗទៀតជាមួយវិនិយោគិនក្នុងស្រុក ៕
ចែករំលែកព័តមាននេះ