រាជធានីភ្នំពេញ ៖ ជំនាញនៃសតវត្សទី២១ គឺជាជំនាញដែលជួយពង្រឹង និងអភិវឌ្ឍសមត្ថភាពសិស្សានុសិស្ស ដើម្បីទទួលបានជោគជ័យក្នុងអាជីពការងារនាសម័យបច្ចេកវិទ្យាទំនើបនេះ ។ នេះជាការលើកឡើងរបស់លោក គង់ សំនៀង នាយកប្រតិបត្តិនៃក្រុមហ៊ុន វេសឡាញ អេដ្យូខេសិន គ្រុប ក្នុងកិច្ចប្រជុំបូកសរុបការងារប្រចាំឆ្នាំ ។ លោកបានបន្ថែមទៀតថា ជំនាញនៃសតវត្សទី២១ ត្រូវបានបែកជា៣បំណិនរួមមាន ទី១-បំណិននៃការសិក្សារៀនសូត្រ ទី២-បំណិននៃការទទួលព័ត៌មានថ្មីៗ និងទី៣-បំណិនជីវិត ដែលបំណិនទាំងនេះមានសារសំខាន់ណាស់សម្រាប់សិស្សានុសិស្ស ជាពិសេសក្នុងសម័យកាលសេដ្ឋកិច្ចដែលពឹងផ្អែកលើបច្ចេកវិទ្យាព័ត៌មាន ។
លោកសង្កត់ធ្ងន់ថា នៅពេលបុគ្គលិកចង់អភិវឌ្ឍអាជីពការងាររបស់ខ្លួន ពួកគេត្រូវយល់ដឹងឲ្យបានច្បាស់ពីរបៀបធ្វើជំនួញ ត្រូវមានផែនការកំណត់ទិសដៅ ការចុះសម្រុងជាមួយមិត្តរួមការងារ ការបំពេញការងារប្រកបដោយភាពឈ្លាសវៃ ការបំពេញការងារប្រកបដោយប្រសិទ្ធភាព ភាពរហ័សរហួន និងភាពស្មោះត្រង់ ដែលជំនាញមួយចំនួនក្រុមហ៊ុនបានបញ្ចូលក្នុងកម្មវិធីសិក្សារួចហើយ និងមួយចំនួនទៀតគ្រោងនឹងបញ្ចូលក្នុងកម្មវិធីសិក្សាបន្ថែម ។
គួរបញ្ជាក់ថា ជំនាញនៃសតវត្សទី២១ ត្រូវបានបែងចែកជា៣បំណិនរួមមាន ទី១-បំណិននៃការសិក្សារៀនសូត្រ ផ្ដោតលើការត្រិះរិះពិចារណា ការគិតដោយមានភាពច្នៃប្រឌិត ការសហការ និងការទំនាក់ទំនង ។
ទី២-បំណិននៃការទទួលព័ត៌មានថ្មីៗ ដូចជាសិស្សត្រូវមានចំណេះដឹងផ្នែកព័ត៌មានវិទ្យា ចំណេះដឹងផ្នែកប្រព័ន្ធផ្សព្វផ្សាយ និងចំណេះដឹងផ្នែកបច្ចេកវិទ្យា ។ ទី៣-បំណិនជីវិត ផ្តោតលើការចេះរស់នៅចុះសម្រុងជាមួយអ្នកដទៃ ការចេះផ្តួចផ្តើមគំនិត ភាពជាអ្នកដឹកនាំ និងផលិតភាពការងារ ។ ហើយជំនាញនៃសតវត្សទី២១ត្រូវបានប្រទេសជាច្រើនលើពិភពលោកបញ្ចូលក្នុងកម្មវិធីសិក្សា ដើម្បីឆ្លើយតបនឹងស្ថានភាបវិវឌ្ឍឥតឈប់ឈរនៃប្រព័ន្ធបច្ចេកវិទ្យាព័ត៌មាន និងការរស់នៅប្រចាំថ្ងៃ ។
ទោះបីក្រុមហ៊ុន វេសឡាញ ត្រូវបានទទួលស្គាល់ថាជាគ្រឹះស្ថានដែលមានគុណភាពលើផ្នែកអប់រំល្អក៏ដោយ ក៏គ្រឹះស្ថាននៅតែធ្វើកិច្ចសហការជាមួយគ្រឹះស្ថានអន្ដរជាតិជាច្រើន និងដាក់បញ្ចូលកម្មវិធីល្អៗបន្ថែមទៀត ដូចជាកម្មវិធីទម្លាប់ទាំង៧ (The 7 habits for Effective Teens) ជាកម្មវិធីមួយដែលអប់រំអត្តចរិត ឥរិយាបថរៀបចំផែនការផ្សេងៗ មានទំនួលខុសត្រូវដើម្បីក្លាយជាមនុស្សមានឯករាជ្យភាព និងពោរពេញដោយសក្តានុពល ។ កម្មវិធី Money Treeបង្រៀនកុមារឲ្យទទួលចំណេះដឹងផ្នែកហិរញ្ញវត្ថុ និងមានទំនួលខុសត្រូវខ្ពស់ក្នុងការគ្រប់គ្រង និងប្រើប្រាស់ហិរញ្ញវត្ថុប្រកបដោយប្រសិទ្ធភាព ។ លើសពីនេះ ក្រុមហ៊ុនបានសហការជាមួយសាលាតន្ដ្រី ALLEGO នៅប្រទេសម៉ាឡេស៊ី ដើម្បីរៀបចំកម្មវិធីតន្ដ្រីសិស្សសាលា និងបានសហការជាមួយវិទ្យាស្ថានអប់រំអន្ដរជាតិលើការទទួលបានសិទ្ធិផ្ដល់សេវាកម្មប្រឡង TOEFL ITP ដើម្បីឱ្យសិស្ស-និស្សិតមានឱកាសទទួលបានការសិក្សានៅក្រៅប្រទេស។
ក្រុមហ៊ុនវេសឡាញ អេឌ្យូសិន គ្រុប ត្រូវបានបងើ្កតឡើងក្នុងឆ្នាំ២០០៨ ។ រហូតមកដល់បច្ចុប្បន្ននេះ ក្រុមហ៊ុនមានគ្រឹះស្ថានអប់រំចំនួន៥ គឺសាលារៀនវ៉េស្ទឡាញន៍ចំនួន៧សាខា សាលារៀនណត្សឡាញន៍ចំនួន១សាខា សាលាអន្តរជាតិអេបផលទ្រីចំនួន១សាខា សាលាអន្តរជាតិហ្វររ៉េសហៀលចំនួន២សាខា និងវិទ្យាស្ថានអភិវឌ្ឍវិស័យអប់រំចំនួន១សាខា ហើយមានសិស្សានុសិស្សជិត១ម៉ឺននាក់ និងបុគ្គលិក គ្រូបង្រៀនជិត១ពាន់នាក់ ៕
ចែករំលែកព័តមាននេះ