រាជធានីភ្នំពេញ ៖ សេចក្តីរាយការណ៍បឋមឱ្យដឹងថា មានការចាប់ខ្លួនបុរសម្នាក់ បន្ទាប់ពីបង្កហិង្សាវាយប្រពន្ធ-កូនផ្អើលពេញផ្ទះ រហូតប្រពន្ធរត់ទៅឱ្យអ្នកជិតខាងជួយ ស្រាប់តែបុរសនោះ រត់ទៅបំផ្លាញអីវ៉ាន់របស់ផ្ទះគេទៀតដែលហេតុការណ៍នេះ កើតឡើងកាលពីវេលាម៉ោង០៩ព្រឹកថ្ងៃទី២៤ សីហា ២០១៦ ស្ថិតត្រង់ចំណុចផ្ទះជួលមួយកន្លែង ក្នុងភូមិទួលសង្កែ សង្កាត់ទួលសង្កែ ខណ្ឌជ្រោយចង្វារ ។
ប្រភពឱ្យដឹងថា បុរសខាងលើឈ្មោះប៉ាង វណ្ណៈ អាយុ៤៧ឆ្នាំ ជាមន្ត្រីអង្គរក្ស មានប្រពន្ធឈ្មោះជា ស្រីមុំ អាយុ៤៣ឆ្នាំ ជាអ្នកលាងចានឱ្យគេ មានកូនប្រុស៣នាក់ ។
បើតាមប្រភពពីប្រពន្ធឱ្យដឹងថា ប្តីគាត់មានការប្រែប្រួល ក្រោយពីបានជួបគ្រោះថ្នាក់ចរាចរណ៍ប៉ះត្រង់ក្បាលមក ដែលគាត់តែងតែវាយធ្វើបាបគាត់ និងកូនដោយគ្មានដឹងហេតុផលសោះ ។ កាលពីថ្ងៃទី២៣ សីហា ម្សិលមិញ វេលាម៉ោង១០ព្រឹក ប្តីគាត់រករឿងដោយបំផ្លាញអីវ៉ាន់ក្នុងផ្ទះម្តង ហើយត្រូវគាត់ទ្រាំមិនបាន ក៏ប្តឹងឱ្យសមត្ថកិច្ចឃាត់ខ្លួននាំទៅអប់រំ ។ លុះនៅវេលាកើតហេតុ ប្តីរូបនោះ បានផ្ទុះកំហឹងមួយសារទៀត ដោយចង់វាយគាត់និងកូន រហូតដល់ខ្លាចពេក គាត់ក៏រត់ទៅឱ្យអ្នកជិតខាងជួយ ស្រាប់តែប្តីគាត់រឹតតែខឹង បានទៅវាយរបស់របរអ្នកជិតខាងនោះ ក៏ប្តឹងឱ្យចាប់ខ្លួនម្តងទៀតទៅ ។
ចែករំលែកព័តមាននេះ