រាជធានីភ្នំពេញ ៖ ក្រសួងទេសចរណ៍នៃព្រះរាជាណាចក្រកម្ពុជា និងស្ថានទូតចិនប្រចាំកម្ពុជា បានរួមគ្នារៀបចំកម្មវិធីជ្រើសរើសអ្នកនិយាយភាសាចិនឆ្នើមក្នុងវិស័យទេសចរណ៍ប្រចាំឆ្នាំ២០១៦
រាជធានីភ្នំពេញ ៖ ក្រសួងទេសចរណ៍នៃព្រះរាជាណាចក្រកម្ពុជា និងស្ថានទូតចិនប្រចាំកម្ពុជា បានរួមគ្នារៀបចំកម្មវិធីជ្រើសរើសអ្នកនិយាយភាសាចិនឆ្នើមក្នុងវិស័យទេសចរណ៍ប្រចាំឆ្នាំ២០១៦ ដើម្បីលើកកម្ពស់ ឧស្សាហកម្មទេសចរណ៍កម្ពុជា ក្នុងការត្រៀមខ្លួនទទួលស្វាគមន៍ភ្ញៀវទេសចរណ៍ចិនដែលតាមគម្រោងរបស់ក្រសួងទេសចរណ៍នៃព្រះរាជាណាចក្រកម្ពុជា គ្រោងនឹងទាក់ទាញភ្ញៀវទេសចរអោយបានកាន់តែច្រើន នៅឆ្នាំបន្តបន្ទាប់ ។
ដើម្បីសម្រេចគោលដៅរបស់ក្រសួងទេសចរណ៍ ក្រុមហ៊ុនវិនិយោគនាំចូលលើវិស័យស្មាតហ្វូនដ៏ធំមួយនៅក្នុងប្រទេសកម្ពុជា បានគាំទ្រក្នុងការផ្ដួចផ្ដើមការប្រលងនិយាយភាសាចិនឆ្នើត ក្នុងវិស័យទេសចរណ៍ ដែលកម្មវិធីឈានដល់វគ្គផ្ដាច់ព្រ័ត្រកាលពីសប្ដាហ៍មុននេះ ដែលបានធ្វើឡើងនៅស្ថានីយទូរទស្សន៍ជាតិកម្ពុជា ក្រោមការឧបត្ថម្ភធំពីសំណាក់ក្រុមហ៊ុន ហួរវៃ ប្រចាំកម្ពុជា ។
បេក្ខភាព សិស្ស និស្សិត មគ្គុទ្ទេសក៍ទេសចរណ៍ អ្នកបម្រើការងារក្នុងអង្គភាព ឬមូលដ្ឋានអាជីវកម្ម ទេសចរណ៍មានសញ្ជាតិខ្មែរ ដែលមានអភ័យឯកសិទ្ធិបន្តទៅវគ្គផ្តាច់ព្រ័ត្រនេះ មានចំនួន១០នាក់ និងបំរុង៦នាក់។ កម្មវិធីប្រកួតអ្នកនិយាយភាសាចិនឆ្នើម ឆ្នាំ២០១៦ ត្រូវបានធ្វើឡើងពីរតំបន់ខុសគ្នា គឺនៅរាជធានីភ្នំពេញ ថ្ងៃទី២៤ កក្កដា ២០១៦ និងខេត្តសៀមរាប ថ្ងៃទី៣១ កក្កដា ២០១៦។
ក្រោមការប្រកួតយ៉ាងស្វិតស្វាញអស់រយៈពេលច្រើនម៉ោងក្រោមប្រធានបទ China Ready បេក្ខជនជើងខ្លាំងក្នុងកម្មវិធីអ្នកនិយាយភាសាចិនឆ្នើមក្នុងវិស័យទេសចរណ៍កម្ពុជា ២០១៦ ត្រូវបានរកឃើញជាស្ថាពរ ក្រោមគណៈវិនិច្ឆ័យដែលរួមមានមន្ត្រីតំណាងពីក្រសួងទេសចរណ៍ ស្ថានទូតប្រជាមានិតចិនប្រចាំកម្ពុជា នាយកដ្ឋានអប់រំបណ្តុះបណ្តាលនៃក្រសួងអប់រំ យុវជន និងកីឡា និងអ្នកតំណាងរបស់ក្រុមហ៊ុន Huawei។
លោក WENG KE FENG អគ្គនាយករងក្រុមហ៊ុន Huawei Technologies (CAMBODIA) CO.,LTD បានឱ្យដឹងថា នេះជាលើកទី៣ហើយ ដែលយើងមានមោទនភាព ដោយមានចូលរួមជាផ្នែកដ៏សំខាន់ក្នុងគាំទ្រ និងជួយលើកស្ទួយវិស័យទេសចរណ៍ចិននៅកម្ពុជា តាមរយៈកម្មវិធីនេះ ស្របតាមយុទ្ធសាស្ត្រថ្មីរបស់ក្រសួងទេសចរណ៍ China Ready ។
លោក WENG KE FENG បន្ថែមថា «យើងសង្ឃឹមថា នឹងមានប្រជាជនខ្មែរកាន់តែច្រើនឡើងៗ ចេះនិយាយភាសាចិន ដែលជាមធ្យោបាយរឹតចំណងមិត្តភាពរវាងកម្ពុជា-ចិន ។ ម្ចាស់ជ័យលាភីលេខ១ នៃកម្មវិធីប្រឡងជ្រើសរើសអ្នកនិយាយភាសាចិនឆ្នើម ទទួលបាននូវទូរស័ព្ទ Huawei P9 Plus មួយគ្រឿង ទូរទឹកកកមួយគ្រឿង ម៉ាស៊ីនត្រជាក់មួយគ្រឿង និងម៉ាស៊ីនបោកខោអាវមួយគ្រឿង សរុបជាទឹកប្រាក់ចំនួន២.៥៧០ដុល្លារអាមេរិក។ ជ័យលាភីលេខ២ ទទួលបាន Huawei P9 Plus មួយគ្រឿង ទូរទស្សន៍ LED 50អ៊ីង ១គ្រឿង និង 21st Century audio-visual library សរុបជាទឹកប្រាក់ចំនួន១.៧៦៩ដុល្លារអាមេរិក ។ ជ័យលាភីលេខ៣ ទទួលបានទទួលបានទូរស័ព្ទ Huawei P9 Plus មួយគ្រឿង និងទូរទស្សន៍ LED 50អ៊ីង ១គ្រឿង សរុបជាទឹកប្រាក់ចំនួន១.៣៦៩ដុល្លារអាមេរិក ។ ដោយឡែកអ្នកជាប់លេខ៤ និងលេខ៥ ទទួលបាន កុំព្យូទ័រយួរដៃម្នាក់១គ្រឿង ចំណែកអ្នកជាប់លេខ៦ ដល់លេខ១០ ទទួលបានទូរស័ព្ទ Huawei P9 Lite ម្នាក់១គ្រឿង។ បន្ថែមពីនេះ អ្នកចូលរួមប្រកួតទាំង១០រូប ក៏ទទួលបាននូវវិញ្ញាបនប័ត្រអ្នកនិយាយភាសាចិនឆ្នើម ក្នុងវិស័យទេសចរណ៍មួយសន្លឹកម្នាក់ផងដែរ។
កញ្ញា សេង ម៉ារីណា ជ័យលាភីលេខ១ ក្នុងកម្មវិធីបានបង្ហាញចំណាប់អារម្មណ៍ថា «ខ្ញុំសប្បាយរីករាយ និងរំភើបចិត្តខ្លាំងណាស់ដែលបានឈ្នះជាជ័យលាភីលេខ១ ក្នុងការប្រឡងប្រជែងនេះ ។ ខ្ញុំនឹងប្រើប្រាស់ ជំនាញរបស់ខ្ញុំ ដើម្បីធ្វើការប្រាស្រ័យទាក់ទងជាមួយភ្ញៀវទេសចរជនជាតិចិនឱ្យកាន់តែប្រសើរឡើង ជាពិសេសជំរុញផ្សព្វផ្សាយពីតំបន់ទេសចរណ៍របស់កម្ពុជាយើង»។
លោក ថោង ខុន រដ្ឋមន្ត្រីក្រសួងទេសចរណ៍បានឲ្យដឹងថា ចំនួនភ្ញៀវទេសចរណ៍ចិនមកកម្ពុជា ក្នុងឆ្នាំ ២០១៥ មានចំនួនប្រមាណ៧០ម៉ឺននាក់ ដែលគិតជាភាគរយ គឺស្មើនឹង១៥% នៃចំនួនភ្ញៀវទេសចរណ៍សរុប។ ចិនគឺមានទីផ្សារដ៏ធំជាងគេលើកពិភពលោកនៅក្នុងឆ្នាំ២០២០ ត្រូវបានរំពឹងទុកថាមានចំនួនភ្ញៀវទេសចរណ៍ប្រមាណជាង២០០លាននាក់ នៅលើពិភពលោក ដោយ៧០% គឺតំបន់អាស៊ីអាស្រ័យហេតុនេះ កម្ពុជាយើងត្រូវត្រៀមខ្លួនជាស្រេចក្នុងការទទួលនូវភ្ញៀវទេសចរណ៍ចិន ទាំងភាពរួសរាយរាក់ទាក់ ការប្រាស្រ័យទាក់ទង សេវាកម្ម និងបដិសណ្ឋារកិច្ច។ យើងបានធ្វើការខិតខំផ្សព្វផ្សាយឲ្យទូលំទូលាយទាំង ប្រព័ន្ធផ្សព្វផ្សាយបែបបុរាណ និងទំនើប។
លោកបណ្ឌិត ថោង ខុន បានបន្ថែមថា «សព្វថ្ងៃនេះបានបង្កើតគេហទំព័រទេសចរណ៍ ជាភាសាចិនរួចស្រេច។ បន្ទាប់មកទៀត យើងនឹងបង្កើត Mobile Application ដែលមានជាភាសាចិន និងអង់គ្លេស ជាពិសេសទូរស័ព្ទស្មាតហ្វូនម៉ាក Huawei គឺកាន់តែងាយស្រួលថែមទៀត»។
ចែករំលែកព័តមាននេះ