ខេត្តកោះកុង ៖ បុរស២នាក់ត្រូវបានសមត្ថកិច្ចចាប់ខ្លួនជាបន្តបន្ទាប់ក្រោយពីពួកគេបានយកប្រាក់ដុល្លារ២ពាន់ដុល្លារទៅប្តូរយកលុយបាតថៃនៅកន្លែងប្តូរប្រាក់មួយកន្លែងក្បែរច្រកទ្វារអន្តរជាតិចាំយាមកាលពីវេលាម៉ោង៨ព្រឹក ថ្ងៃទី២០ ខែសីហា ឆ្នាំ២០១៦ ។
លោកវរសេនីយ៍ត្រី ណាក់ នី អធិការរងទទួលបន្ទុកកិច្ចការព្រហ្មទណ្ឌស្រុកមង្គលសីមា ឲ្យដឹងថា ជនសង្ស័យដែលត្រូវសមត្ថកិច្ចចាប់ខ្លួនមាន ទី១-ឈ្មោះ ប៊ុន ឃីម ភេទប្រុស អាយុ៥៣ឆ្នាំ មានទីលំនៅភូមិតាអុង ឃុំតាអុង ស្រុកចំការលើ ខេត្តកំពង់ចាម និង ទី២-ឈ្មោះ ប៉េង ហ៊ត់ ភេទប្រុស អាយុ២៤ឆ្នាំ មានទីលំនៅក្នុងសង្កាត់ព្រែកប្រា ខណ្ឌច្បារអំពៅ រាជធានីភ្នំពេញ ។
លោកវរសេនីយ៍ត្រី ណាក់ នី បានបញ្ជាក់ថា បន្ទាប់ពីអាជីវកររកស៊ីប្តូរប្រាក់នៅមាត់ច្រកទ្វារអន្តរជាតិចាំយាមឈ្មោះ ស ចិត្រា បានទូរស័ព្ទមកប្តឹងថា មានជនសង្ស័យ២នាក់យកដុល្លារក្លែងក្លាយមកប្តូរ ភ្លាមៗនោះកម្លាំងរបស់លោកក៏បានទៅដល់កន្លែងកើតហេតុ ហើយធ្វើការឃាត់ខ្លួនជនសង្ស័យបានម្នាក់ឈ្មោះ ប៊ុន ឃីម ចំណែកម្នាក់ទៀតបន្ទាប់ពីយកដុល្លារក្លែងក្លាយចំនួន២ពាន់ដុល្លារប្តូរយកលុយបាតថៃបានចំនួន៦៧០០០បាតហើយនោះក៏បើកឡានរត់គេចខ្លួនបាត់ ប៉ុន្តែក្រោយមកក៏ត្រូវប៉ូលិសចាប់ខ្លួនបានបន្ទាប់ពីរត់គេចខ្លួនបានតែកន្លះម៉ោងប៉ុណ្ណោះ ។
លោកអធិការរងបញ្ជាក់ទៀតថា ពេលសមត្ថកិច្ចរបស់លោកតាមឃាត់ខ្លួនជនសង្ស័យទី២ ប្រាក់បាតថៃ៦៧០០០បាតត្រូវបានដកហូតយកមកប្រគល់ឲ្យអាជីវករឈ្មោះ ស ចិត្រា វិញ ព្រមទាំងដកហូតបានរថយន្តបាឡែន១គ្រឿង ពាក់ស្លាកលេខចំនួន២ ទី១-ស្លាកលេខ កណ្ដាល 2A-6493 និងទី២-ស្លាកលេខ កំពង់ចាម 2A-0414 ។
ក្រោយពេលចាប់ខ្លួន ជនសង្ស័យទាំង២នាក់ និងវត្ថុតាង ត្រូវបានកសាងសំណុំរឿងបញ្ជូនទៅកាន់ការិយាល័យកណ្ដាលយុត្តិធម៌ នៃស្នងការដ្ឋាននគរបាលខេត្តកោះកុងដើម្បីចាត់ការបន្តតាមនិតិវិធីច្បាប់ ៕
ចែករំលែកព័តមាននេះ