សារព័ត៌មាននៅក្រុងប៊ែរឡាំង កាលពីថ្ងៃទី១៦ សីហា ២០១៦ ផ្សាយថា ធនាគារជាតិអាល្លឺម៉ង់ឱ្យដឹងថា រដ្ឋាភិបាលបានពន្យារអាយុនៃការចូលនិវត្តន៍ពី៦៥ឆ្នាំក្នុងពេលបច្ចុប្បន្នទៅ៦៩ឆ្នាំ ក្នុងរយៈពេល៤៤ឆ្នាំខាងមុខ ឬនៅឆ្នាំ២០៥០ ។ ធ្វើបែបនេះក្នុងហេតុុផលថា កន្លងមករដ្ឋាភិបាលមានគម្រោងពន្យារពេលចូលនិវត្តន៍ពីការងារក្នុងវ័យ៦៧ឆ្នាំ នៅឆ្នាំ២០៣០ ប៉ុន្តែក្នុងរយៈពេលវែងនេះមិគ្រប់គ្រាន់ពីការរក្សាតុល្យភាពប្រព័ន្ធសង្គមកិច្ច និងការងារ ព្រោះពលរដ្ឋវ័យចូលនិវត្តន៍នឹងមានអាយុវែង ផ្ទុយនឹងអត្រាកំណើតដែលធ្លាក់ចុះ ។ មានន័យថាមិនអាចផលិតធនធានមនុស្សជំនាន់ថ្មីមកជំនួសបានទាន់ពេលវេលា ។
ទោះជាយ៉ាងណាក៏ដោយ លោក Steffen Seibert អ្នកនាំពាក្យគណៈរដ្ឋមន្ត្រីអាល្លឺម៉ង់ បានបញ្ជាក់ថានយោបាយស្តីពីអាយុចូលនិវត្តន៍សម្រាប់វ័យចំណាស់់តាមគោលគំនិតរបស់លោកស្រីអធិការបតី Angela Merkel នៅតែស្ថិតក្នុងអាយុ៦៧ឆ្នាំ គឺជាការគណនាយ៉ាងសមស្របតាមគោលការណ៍ប្រជាសាស្ត្រ ខណៈពេលភាគីជាច្រើនមានជំនឿថាបញ្ហាអាយុដែលសមស្របសម្រាប់វ័យចូលនិវត្តន៍ ពីការងាររបស់អាល្លឺម៉ង់ គឺជាផ្នែកមួយនៅក្នុងបញ្ហាដ៏សំខាន់នៃការរកប្រជាប្រិយភាពក្នុងការបោះឆ្នោតនៅទូទាំងប្រទេសក្នុងឆ្នាំ១០១៧ ៕
ចែករំលែកព័តមាននេះ