រាជធានីភ្នំពេញ ៖ តារាស្រីសម្តីបានអ្នកនាង សំ ប៉ូលីដា បានបង្កើតឲ្យអ្នកសិល្បៈភ្ញាក់ផ្អើល និងសម្តែងក្តីអាណិតគ្រប់គ្នា ក្រោយពីនាងលើកឡើងថា បានដួលចៃដន្យរហូតបាក់កជើងខាងស្តាំង
រាជធានីភ្នំពេញ ៖ តារាស្រីសម្តីបានអ្នកនាង សំ ប៉ូលីដា បានបង្កើតឲ្យអ្នកសិល្បៈភ្ញាក់ផ្អើល និងសម្តែងក្តីអាណិតគ្រប់គ្នា ក្រោយពីនាងលើកឡើងថា បានដួលចៃដន្យរហូតបាក់កជើងខាងស្តាំង និងមានផ្នែកនៅមុខខ្លះទៀតជាំខ្មៅ ហើមភ្នែក របួសធ្ងន់ មើលមុខស្ទើតែមិនស្គាល់ ។ ចាត់ទុកថា ជាទិន្នន័យថ្មីមួយទៀត ដែលមុននេះអ្នកណាៗ ក៍យល់ថា សំ ប៉ូលីដា ដួលបាក់កជើង ដោយចៃដន្យរហូតរបួសធ្ងន់ធ្ងរដេកមួយកន្លែង បង្កឲ្យមានការចាប់អារម្មណ៍ ហើយអ្នកស្គាល់គាត់ម្នាក់ៗ តក់ស្លុត និងហួសចិត្តគ្រប់គ្នា ។
ប៉ុន្តែធាតុពិតមានប្រភពពីអ្នកសិល្បៈដែលស្និទ្ធនឹងនាងលើកឡើងថា សំ ប៉ូលីដា បានរងទណ្ឌកម្មដោយប្តីប្រើអំពើហឹង្សាយ៉ាងចាស់ដៃ រហូតប្រើបំពង់ទីប វាយសំពង តារាកំប្លែងរូបនេះ ឲ្យរបួសយ៉ាងខ្លាំង ស្ទើរតែក្ស័យប្រាណ ។
តារាចម្រៀង និងកំប្លែងអ្នកនាង សំ ប៉ូលីដា បានបញ្ជាក់ប្រាប់អ្នកសារព័ត៌មាន និងអ្នករួមអាជីបថា នាងបានជួបគ្រោះថ្នាក់បាក់ជើងស្តាំ តាំងពីយប់ ថ្ងៃទី៣ ខែសីហា ឆ្នាំ២០១៦ មកម្ល៉េះ គ្រាដែលនាងភ្លាត់ជើងដួល ព្រោះតែស្បែកជើងកែង បណ្តាលឲ្យដួលកាច់ផ្នែកខាងលើកជើង បាក់ឆ្អឹងយ៉ាងធ្ងន់ធ្ងរ ហើយត្រូវបានក្រុមគ្រួសារដឹកយកទៅសង្គ្រោះបន្ទាន់ នៅមន្ទីពេទ្យព្រះកេតុមាលា ។ ដោយអាការៈធ្ងន់ធ្ងរបែបនេះហើយ ទើបលោកគ្រូពេលបានតម្រូវឲ្យនាងសម្រាកបានយូរខែសិន ព្រោះមិនហ៊ានវះកាត់ តឆ្អឹង អំឡុងពេលនេះ ព្រោះតែនាងមានជំងឺប្រចាំកាយ គឺជំងឺទឹកនោមផ្អែម ។
ទោះជាយ៉ាងណាប្រភពក្រៅផ្លូវការណ៍ បានបញ្ជាក់ថា ករណីតារាចម្រៀង និងកំប្លែងស្រីរូបនេះ រងរបួសធ្ងន់ធ្ងរនេះ មិនមែនដោយសារតែភ្លាត់ស្នៀតដួលនោះទេ គឺដោយសារតែស្វាមីនាង ធ្វើទារុណកម្ម ។
ប្រភពខ្សឹបខ្សៀវនេះបញ្ជាក់ដែរថា នេះមិនមែនជាលើកទី១ទេ ដែលស្វាមីនាងធ្វើទារុណកម្មនោះ ដែលជាញឹកញាប់ គេឧស្សាហ៍ឃើញនាង និងស្វាមីឈ្លោះប្រកែកគ្នា ប៉ុន្តែលើកចុងក្រោយ កាលពីដើមខែសីហានេះ សភាពនៃជម្លោះកាន់តែធ្ងន់ធ្ងរ រហូតស្វាមីប្រើប្រាស់ដៃជើង វាយបែកមុខមាត់ ហើយជើងដែលបាក់នោះ គឺស្វាមីវាយនឹងបំពង់ទីប ។
ប្រភពលើកឡើងថា សួរអ្នកជិតខាង នៅខាងក្រោយវត្តក្រពើហា អ្នកណាក៏ដឹងថា ប្តីប្រពន្ធមួយគូរនេះឈ្លោះគ្នាជាញឹកញាប់ ដែលសូម្បីតែគ្រាទើបនឹងរៀបការរួចថ្មីថ្មោង ក៏មានការឈ្លោះគ្នាជាញឹកញាប់ដែរ ។ អ្វីដែលសង្វេគ គឺគ្រាដែលនាងឈឺ គេមិនឃើញវត្តមានស្វាមីនាង មកជិតមើលថែទេ ហើយនាងត្រូវបង្ខំចិត្ត មកស្នាក់នៅក្នុងភោជនីយដ្ឋានមួយដែលនាងច្រៀង ដោយមិនហ៊ានទៅសម្រាកព្យាបាលនៅផ្ទះឡើយ ខណៈដែលខ្លាចស្វាមីនាងធ្វើបាបបន្ត ។
ទោះជាយ៉ាងណាក្តី អ្នកនាង សំ ប៉ូលីដា បានឆ្លើយបដិសេធ ចំពោះការលើកឡើងខាងលើថា ស្វាមីនាងមិនបានធ្វើទារុណកម្មមកលើនាងរហូតដល់មានរួបស្នាម និងបាក់ជើងនោះទេ ។ នាងបន្តថា ស្វាមីនាង និងនាងមិនមានជម្លោះណាមួយទេ ហើយក៏រស់នៅជួបជុំគ្នាជាធម្មតាដែរ ។ ការឆ្លើយបដិសេធបែបនេះ ត្រូវបានអ្នកសិល្បៈដែលដឹងរឿងលើកឡើងថា គឺជាការលាក់លៀមប៉ុណ្ណោះ ព្រោះតែមិនចង់ឲ្យមានរឿងរ៉ាវវែងឆ្ងាយ ។ ប្រភពពីអ្នកសិល្បៈដដែលលើកឡើងថា “សំប៉ូលីដាសាច់កម្មណាស់ ប្តីវាយធ្វើបាបប៉ុណ្ណឹងហើយ នៅលាក់ការពារប្តីទៀត” ។
គួរបញ្ជាក់ដែរថា អ្នកនាង សំ ប៉ូលីដា បានចូលរោងការជាមួយស្វាមីឈ្មោះ ស្វាយ ស៊ីសុថា ហៅខ្យាដំរី នៅព្រឹកថ្ងៃទី១២ មិថុនា ឆ្នាំ២០១២ ។ ក្រោយរួមរស់ជាមួយគ្នា នាងទទួលបានចំណងដៃកូនស្រីម្នាក់ ដែលមានអាយុជិត២ឆ្នាំ ហើយ ។
បន្ថែមលើរឿងរ៉ាវខាងលើ ប្រសិនបើនោះជារឿងបង្កហឹង្សា ទៅលើប្រពន្ឋខ្លួនមែន នោះច្បាប់ត្រូវតែដោះស្រាយ វែកញែករកខុសត្រូវ បើទោះជាភរិយាប្រឹងការពារប្តី តែនេះជាសិទ្ឋិរបស់ស្ត្រី ដែលប្រទេសកម្ពុជា កំពុងតែឲ្យតម្លៃ និងលើកកម្ពស់ស្ត្រី ។ ដូច្នេះ សំ ប៉ូលីដា ខ្លួនឯងត្រូវតែហ៊ាននិយាយអ្វីដែលជាអាថ៌កំបាំង ក្នុងគ្រួសារ ដើម្បីកុំឲ្យប៉ះពាល់ផ្លូវចិត្តបន្តទៀត ស្របពេលមហាជនអ្នកស្រឡាញ់ គាំទ្រគេអាណិត និងចង់បានការពិតមួយច្បាស់លាស់ ៕
ចែករំលែកព័តមាននេះ