AFP ផ្សាយថា សិង្ហបុរីបានប្រារព្ធពិធីគម្រប់ខួប៥១ឆ្នាំនៃថ្ងៃបុណ្យជាតិកាលពីថ្ងៃទី៩ សីហា ២០១៦ ដោយមានការការពារសន្តិសុខយ៉ាងតឹងរ៉ឹងទាំងផ្លូវគោក ផ្លូវទឹក និងផ្លូវអាកាស ។
ទីលានពហុកីឡដ្ឋានជាតិគឺជាទីតាំងប្រារព្ធពិធីមានទាំងមន្ត្រីរដ្ឋការ ប៉ូលិស និងពលរដ្ឋ។ ចំពោះប្រជាពលរដ្ឋត្រូវបានកំណត់ស្ថិតក្នុងតំបន់ពិសេសរបស់ខ្លួន ឯប៉ូលិសរង់ចាំការពារ ខណៈពេលទ័ពជើងទឹក និងកងនាវិករង់ចាំការពារយ៉ាងតឹងរ៉ឹងនៅដែនសមុទ្រ ។
សិង្ហបុរីស្ថិតក្នុងការត្រៀមខ្លួនក្នុងកម្រិតខ្ពស់ ក្រោយពីប៉ូលិសឥណ្ឌូណេស៊ី ចាប់ខ្លួនជនសង្ស័យជាសមាជិកក្រុមក្បាលរឹងចំនួន៦នាក់ កាលពីពេល ថ្មីៗកន្លងមកនៅកោះ Batam ប្រទេសឥណ្ឌូណេស៊ី នៅឆ្ងាយពីសិង្ហបុរីប្រហែល១៥គីឡូម៉ែត្រ ដោយក្រុមនោះមានគម្រោងបាញ់មីស៊ីលវាយប្រហារសិង្ហបុរីពីកោះ Batam ។ សិង្ហបុរីជាប្រទេសមានស្តុកស្តម្ភនៅតំបន់អាស៊ាន ។
លោកលី សៀនលុង នាយករដ្ឋមន្ត្រីរបស់សិង្ហបុរីថ្លែងថា «ប្រសិនបើមានការវាយប្រហាររបស់ក្រុមភេរវករកើតឡើង យើងត្រូវសាមគ្គីជាធ្លុងមួយ បើសិនមិនដូច្នេះទេប្រទេសយើងត្រូវរលំរលាយ ។ ក្រោយពីទទួលបានឯករាជ្យពីអាណានិគមអង់គ្លេស កាលពីថ្ងៃទី៣១ សីហា ១៩៦៣ សិង្ហបុរីក្លាយជាផ្នែកមួយរបស់ម៉ាឡេស៊ីនៅថ្ងៃទី១៦ កញ្ញា ឆ្នាំដដែល ក្រោយមកបានបំបែកចេញពីម៉ាឡេស៊ី ក្លាយជាប្រទេសឯករាជ្យនៅថ្ងៃទី៩ សីហា ១៩៦៥ ៕
ចែករំលែកព័តមាននេះ