ខេត្តបាត់ដំបង៖ ក្រុមអ្នកញៀ.នល្បែងបញ្ជល់មាន់ចំនួន០៧នាក់ ត្រូវកម្លាំងការិយាល័យព្រហ្មទណ្ឌកំរិតស្រាលឆ្មក់ចូលបង្ក្រាបនិងឃាត់ខ្លួន ខណៈរាប់សិបនាក់ទៀតរត់ពេញព្រៃចម្ការ កាលពីរសៀលថ្ងៃទី២៣ កុម្ភៈ នៅចំណុចភូមិសំរោងកោង ឃុំអូរដំបង១ ស្រុកសង្កែ ហើយស្របពេលដែលសមត្ថកិច្ចក្នុងមូលដ្ឋានត្រូវថ្នាំសណ្ដំដេកលក់មិនកំរើក ។
ប្រធានការិយាល័យនគរបាលព្រហ្មទណ្ឌកំរិតស្រាល លោក ឈឿង គឹមសុង បានឲ្យដឹងថា ក្រុមអ្នកប្រព្រឹត្តល្បែងជល់មាន់ដែលកម្លាំងការិយាល័យរបស់លោកចុះបង្ក្រាបខាងលើនេះ ប្រមូលផ្ដុំគ្នាប្រព្រឹត្តយូរហើយ តែពួកគេចល័តគ្រប់កន្លែងនៅក្នុងមូលដ្ឋាន លុះនៅរសៀលថ្ងៃទី២៣ កុម្ភៈ ពេលពួកគេកំពុងប្រមូលផ្ដុំគ្នា ទើបលោកស្នងការបញ្ជាឲ្យកម្លាំងជំនាញរបស់លោកចុះបង្ក្រាបតែម្ដង។
លោក ឈឿង គឹមសុង បានបញ្ជាក់ថា ក្នុងកិច្ចប្រតិបត្តិការនេះ កម្លាំងរបសលោក ឃាត់ខ្លួនអ្នកលេងបានចំនួន០៧នាក់ មាន់ជល់០២ក្បាល ជញ្ជីងថ្លឹងមាន់ សង្វៀនជល់មាន់ ម៉ូតូ០២គ្រឿង និង វត្ថុតាងមួយចំនួនទៀត។ សូមបញ្ជាក់ថា ក្រុមអ្នកញៀននឹងល្បែងជល់មាន់ តែងណាត់ប្រមូលផ្ដុំគ្នាបើកសង្វៀនបញ្ជល់មាននៅក្នុងទឹកដីស្រុកសង្កែ ដោយសារតែភូមិសាស្ត្រ នៅក្នុងស្រុកនេះមានអំណោយផលល្អគ្រប់យ៉ាង ទាំងសន្តិសុខ ទាំងទីតាំង។
ដោយឡែក បើនិយាយពីសមត្ថកិច្ច ឬអាជ្ញាធរដែនដីវិញ ហាក់ត្រូវដងត្រូវផ្លែជាមួយមេល្បែងស្ទើរគ្រប់កន្លែង។ ដូច្នេះហើយទើបល្បែងគ្រប់ប្រភេទ បានបើកដំណើរការនៅក្នុងទឹកដី ស្រុកសង្កែ យ៉ាងគគ្រឹក គគ្រេងគ្មានការទប់ស្កាត់ឬបង្ក្រាបពីសមត្ថកិច្ចមូលដ្ឋាន។ បើតាមការកត់សម្គាល់ កន្លងមកកម្លាំងស្នងការខេត្ត ធ្លាប់ចុះបង្ក្រាបល្បែងបញ្ជល់មាន់និងល្បែងដទៃទៀត ច្រើនករណីហើយ ខណៈកម្លាំងអធិការស្រុកនេះ មិនអើពើសោះ។
ប៉ុន្តែយ៉ាងណាក៏ដោយ ពាក់ព័ន្ធនឹងក្រុមញៀនល្បែងជល់មាន់ខាងលើនេះ បើតាមលោក ឈឿង គឹមសុង បានបញ្ជាក់ថា យោងតាមគោលការលោកស្នងការខេត្ត គឺគ្រាន់តែធ្វើការអប់រំ និង ធ្វើកិច្ចសន្យាហើយឲ្យត្រឡប់ទៅផ្ទះវិញ៕
ចែករំលែកព័តមាននេះ