រាជធានីភ្នំពេញ ៖ ក្រុមហ៊ុនទ្រូម៉ាន់នី ខេមបូឌា (True Money) និងក្រុមហ៊ុនផេហ្គោស៊ី ខេមបូឌា (PayGo Sea (Cambodia Co.,Ltd) នៅថ្ងៃទី២៦ កក្កដា ២០១៦ បានចុះកិច្ចព្រមព្រៀង (MOU) ជាមួយគ្នាដោយប្រតិបត្តិទៅលើការងាចំនួន៤ចំណុច ។
ក្នុងកម្មវិធីចុះហត្ថលេខានាភោជនីយដ្ឋានទន្លេបាសាក់២ លោក គង់ មាន នាយកគ្រប់គ្រងទូទៅរបស់ក្រុមហ៊ុនទ្រូម៉ាន់នីប្រចាំនៅកម្ពុជា បានឲ្យលើកឡើងថា ចំណុចទាំង៤ ដែលក្រុមហ៊ុនទាំងពីរត្រូវប្រតិបត្តិការជាមួយគ្នានោះ ទី១-ការបង់វិក្កយបត្រអគ្គិសនី, ទី២-ការបញ្ចូលកាត់ទូរស័ព្ទរបស់ក្រុមហ៊ុនសេលខាត ដោយគ្រាន់តែអតិថិជនប្រាប់ទៅភ្នាក់ងារទ្រូម៉ាន់នី ហើយបញ្ជាទិញនូវតម្លៃកាត់ណាមួយដែលចង់បាន, ទី៣-ការផ្ទេរប្រាក់ពីគណនេយ្យរបស់ក្រុមហ៊ុនផេហ្គោស៊ី ទៅគណនេយ្យទ្រូម៉ាន់នី និងទី៤-ការផ្ញើប្រាក់ពីផេហ្គោស៊ី ទៅទ្រូម៉ាន់នី ។
លោកបានបន្តថា សម្រាប់ការងារបង់ថ្លៃភ្លើងនេះ គឺប្រតិបត្តិទៅលើរាជធានី-ខេត្តចំនួន៤ គឺនៅរាធានីភ្នំពេញ, ខេត្តបាត់ដំបង, ខេត្តសៀមរាប និងខេត្តព្រះសីហនុ ដែលតម្លៃសេវា គឺវិក្កយបត្របង់ថ្លៃភ្លើងចាប់ពី៤.០០០រៀល ដល់១០០.០០០រៀល តម្លៃសេវាចំនួន១.០០០រៀល និងចាប់ពី១០០.០០០រៀលឡើងទៅ គឺតម្លៃសេវាចំនួន២.០០០រៀល ។
លោក Salik subedi ប្រធានក្រុមហ៊ុន PayGo Sea Cambodia Co.,Lid ក៏បានថ្លែងថា «ថ្ងៃនេះខ្ញុំមានភាពរីករាយក្នុងការអបអរសាទរចំពោះយើងទាំងពីរ លើការបើកជាផ្លូវការក្នុងការសហការជាមួយដៃគូរអាជីវកម្មរវាងក្រុមហ៊ុន True Money Cambodia និងក្រុមហ៊ុន PayGo Sea Cambodia ។
សូមបញ្ជាក់ថា ក្រុមហ៊ុនទ្រូម៉ាន់នី គឺជាក្រុមហ៊ុនផ្ដល់សេវាកម្មទូទាត់សាច់ប្រាក់ដែលមានភ្នាក់ងារជិត៥.០០០ទីតាំង នៅរង់ចាំបំរើអតិថិជនទូទាំងប្រទេសកម្ពុជា ជាមួយនឹងសេវាកម្មផ្ទេរប្រាក់ ដាក់លុយទូរស័ព្ទដាក់ប្រាក់ ដកប្រាក់ និងបង់វិក្កយបត្រផ្សេងៗដែលល្បីល្បាញជាង១០០ប្រទេសទូទាំងពិភពលោក ខាងវិស័យកសិឧស្សាហកម្ម មានមូលដ្ឋាននៅប្រទេសថៃ ហើយទ្រូម៉ាន់នីមានការិយាល័យនៅ៦ប្រទេស ដូចជា កម្ពុជា ថៃ មីយ៉ាន់ម៉ា ឥណ្ឌូនេស៊ី ហ្វីលីពីន និងវៀតណាម ហើយ ក្រុមហ៊ុននឹងពង្រីកអាជីវកម្មខ្លួននៅគ្រប់ប្រទេសទាំងអស់ទូទាំងអាស៊ាននៅចុងឆ្នាំ២០១៦ខាងមុខនេះ ។ ទ្រូម៉ាន់នីមានពាក្យស្លោករបស់ក្រុមហ៊ុនគឺ «ដាក់ស្រួល ដកស្រួល និងមានសុវត្ថិភាព» ៕
ចែករំលែកព័តមាននេះ