រាជធានីភ្នំពេញ ៖ ឯកឧត្តម ខៀវ កាញារិទ្ធ រដ្ឋមន្ត្រីក្រសួងព័ត៌មានបានថ្លែងថា អ្នកកាសែតកម្ពុជាគួរតែពង្រឹងក្រមសីលធម៌របស់ខ្លួនឡើងវិញចំពោះការផ្សាយព័ត៌មានដែលក្រសួងបានជំរុញឲ្យស្ថានីយ៍ទូរទស្សន៍ កាសែតបោះពុម្ព ទស្សនាវដ្តី និងប្រព័ន្ធផ្សព្វផ្សាយដទៃទៀត មិនត្រូវថតសពក្នុងស្ថានភាពឃាតកម្មមានឈាម កាត់ក ដាច់ក្បាល មានដៃជើងច្រងេងច្រងាង មកចុះផ្សាយទេវាជាសីលធម៌មួយដែលត្រូវគិតដល់សព និងគ្រួសារសពគេមិនសប្បាយចិត្តចំពោះការផ្សាយបែបនេះទេ។
ការផ្សាយបែបនេះវាយអាចធ្វើឲ្យបាត់បង់តម្លៃខ្លួនឯង និងមិនគួរផ្សាយរូបភាពទាំងនោះទេ ការថ្លែងរបស់លោករដ្ឋមន្ត្រីបានធ្វើឡើងក្នុងសន្និសីទកាសែតមួយ ក្នុងក្រសួងព័ត៌មានបន្ទាប់ពីលោកបានចូលរួមក្នុងពីបិទវគ្គបណ្តុះបណ្តាលព័ត៌មានវិទ្យា(Java និង Window )ដែលរៀបចំឡើងដោយក្រសួងព័ត៌មានកាលពីថ្ងៃទី២៦ ខែកក្កដា ឆ្នាំ២០១៦។ វគ្គនេះមានសិក្ខាកាមជាង៦០នាក់មន្ត្រីរបស់មន្ទីរព័ត៌មាននៅតាមខេត្តមកចូលរួមរៀនសូត្រលើកដំបូងដែលមានគ្រូជនជាតិកូរេបួននាក់ និងគ្រូខ្មែរបង្រៀនដោយផ្ទាល់។
នៅពេលសួរថាស្ថានីយ៍ទូរទស្សន៍ កាសែត និងទស្សនាវដ្តី ឬប្រព័ន្ធផ្សព្វផ្សាយ មិនស្តាប់ការណែនាំរបស់ក្រសួង ពេលនោះអាចប្រឈមនឹងការពិន័យ ដកអាជ្ញាប័ណ្ណ ឬបិទប្រព័ន្ធផ្សព្វផ្សាយទាំងនោះទេ?។ លោករដ្ឋមន្ត្រីលើកឡើងថា រដ្ឋាភិបាលមិនបិទការផ្សព្វផ្សាយរបស់ពួកគេទេ តែយើងពង្រឹងការផ្សាយដែលគេនឹងដឹងថា នរណាជាអ្នកបំពានលើវិជ្ជាជីវៈសារព័ត៌មានដោយខ្លួនឯង។ ការបិទមិនមែនជាការល្អទេ ការនិយាយគ្នាល្អជាង។ កន្លងមកសម្តេចតេជោនាយករដ្ឋមន្ត្រីធ្លាប់បានមានប្រសាសន៍ដែរ អ្វីសំខាន់នោះអ្នកកាសែតខ្លួនឯងមានតម្លៃឬអត់។
លោករដ្ឋមន្ត្រីបានលើកឡើងថា មានអ្នកខ្លះចង់បន្ទាបបន្ថោកខ្លួនឯង ហើយយើងចង់ទៅធ្វើដូចគេដែរ?។ វាខុសវិជ្ជាជីវៈរបស់យើង ដូច្នេះយើងចង់រក្សាតម្លៃយើងជាអ្នកកាសែតមានតម្លៃ គឺការប្រើប្រាស់ពាក្យពេចន៍ និងរូបភាពឲ្យសមស្របតាមការណែនាំក្រមសីលធម៌របស់យើង។ ចំពោះសំណួរដែលថាក្រសួងបានហាមមិនឲ្យមានការផ្សាយការហែរសពលោក កែម ឡី មែនដែរទេ?។ លោករដ្ឋមន្ត្រីបានលើកឡើងថានរណាអ្នកនិយាយបែបនេះមិនត្រូវទេ។ តែទូរទស្សន៍ជាតិ(ទទក)បានផ្សាយ តែមិនដឹងថាមានទូរទស្សន៍ណាទៀតបានផ្សាយ?។
តែអ្នកដែលនិយាយនោះសួរវិញថា គេបានមើលទស្សន៍ ឬអត់ដែលគេចេះដើរនិយាយបែបនេះ។ កាលពីថ្ងៃទី២៥ ខែកក្កដា លោកបានជួបប្រជុំជាមួយតំណាងទូរទស្សន៍ទាំងអស់នៅកម្ពុជា ដែលពេលនោះគេបាននិយាយប្រាប់ក្រសួងព័ត៌មានថា គេនឹងខិតខំមិនផ្សាយរូបភាពឃាតកម្មសពដែលមានភាពមិនសមរម្យទៀតទេ។ នៅពេលគេសួរថាការលើកឡើងរបស់ក្រសួងព័ត៌មានបែបនេះ បន្ទាប់ការហែសពលោកកែមឡីយ៉ាងមេចដែរ? រដ្ឋមន្ត្រីក្រសួងព័ត៌មានលើកឡើងទៀតថា ទូរទស្សន៍ដែលបានផ្សាយគេបានដាក់រូបថតលោក កែម ឡី ញញឹមស្រស់មិនមែនដាក់រូបស្លាប់នៅកន្លែងកើតហេតុនោះទេ។ ចំពោះបញ្ហានេះមានកំហុសមួយដែលអ្នកកាសែតបានថតរូបសព នៅកន្លែងកើតហេតុហើយបានចុះផ្សាយនៅលើទំព័របណ្តាញផ្សព្វផ្សាយសង្គម។
លោករដ្ឋមន្ត្រី ខៀវ កាញារិទ្ធិ បានបញ្ជាក់ថារូបភាពនៅកន្លែងកើតហេតុគ្មានទូរទស្សន៍ណាបានថតទេ។ តែឥឡូវនេះមានការដណ្តើមគ្នាផ្សាយពីមរណភាព ឃាតកម្មមានការកើនឡើងច្រើនដែរ ក្នុងនោះព័ត៌មានជាតិ មានករណីប្តីប្រពន្ធឈ្លោះគ្នាជាដើម។ លោកលើកឡើងថានៅពេលលោកបានជួបអ្នកកាសែតបរទេសគេសួរថា ម៉េចបានជាទូរទស្សន៍នៅកម្ពុជាផ្សាយតែរឿងបុក(ចរាចរណ៍)ប្តីប្រពន្ធឈ្លោះគ្នា និងឃាតកម្មជាដើមអីចឹង។ លោករដ្ឋមន្ត្រីបានលើកឡើងថានេះជាការដេញតាមទីផ្សារដែលខ្មែរយើងចូលចិត្តមើលបែបហ្នឹង ដូចនេះការឲ្យតម្លៃរបស់យើងមានការថយចុះ។
ដោយសារតែការរត់តាមទីផ្សារបែបនេះយើងបែរជានាំគ្នាមិនឲ្យតម្លៃវិជ្ជាជីវៈរបស់ខ្លួនឯងផងនេះជាការមិនល្អទេ។ ប៉ុន្តែទន្ទឹមនឹងការនាំគ្នាដាក់រូបសាកសព អ្នករងគ្រោះវាបានធ្វើឲ្យតម្លៃសារព័ត៌មានធ្លាក់ចុះ ដែលសារព័ត៌របស់ខ្មែរវានៅអន់កន្លែងនេះ។ នេះយើងមិននាំគ្នាលើកតម្កើងខ្លួនឯងទេ នេះវាដូចជាយើងនាំគ្នាលោតចូលជ្រោះចូលក្នុងភក់ជ្រាំជាមួយគ្នា។គ្មាននរណាបង្អាប់បន្ថោកយើងទេ ខ្លួនយើងទេនាំគ្នាបន្ថោកខ្លួនយើង៕
ចែករំលែកព័តមាននេះ