ចាំទេ! ស្រីស្អាតមួយដួងថតរឿងក្នុង TikTok រំពឹងរឿងមួយក្រោយលេចមុខក្នុងរឿងដំបូង
- ភ្នំពេញ
រាជធានីភ្នំពេញ ៖ តារាសម្តែងវ័យក្មេងរូបស្រស់កញ្ញា ខន សូរិយា បានបង្ហាញមុខសម្តែងនៅក្នុងរឿងភាគទូរទស្សន៍ជាលើកដំបូងនៅក្នុងអាជីពរបស់នាង បន្ទាប់តារារូបនេះ ទទួលបានការចាប់អាម្មណ៍ពីមហាជនយ៉ាងច្រើន តាមរយៈការថតរឿងខ្លីៗបង្ហោះតាមបណ្តាញសង្គម TIK TOK ដែលនេះជាឱកាសដែលធ្វើឲ្យតារារូបនេះ កាន់តែទទួលបានប្រជាប្រិយភាពបន្ថែមទៀតនៅក្នុងពិភពសិល្បៈ។
ឱកាសបានចេញមុខតាមរយៈខ្សែភាពយន្តលើកដំបូងនេះហើយ បានធ្វើឲ្យស្រីស្អាត ខន សូរិយា រំពឹងថា រូបនាងនឹងមានឱកាសសម្តែងតួធំបន្ថែមទៀតនាពេលអនាគត ត្បិតការសម្តែងនេះគឺជាចំណង់ចំណូលចិត្តរបស់នាងតាំងពីកុមារភាព ខណៈពេលដែលនាងបាននិងកំពុងដុះខាត់នូវទេពកោសល្យសម្តែងរបស់ខ្លួនបន្ថែមទៀតតាមរយៈវីដេអូធូយូប។
ទស្សនិកជនដែលនិយមតាមដានខ្សែភាពយន្តភាគខ្មែរ ប្រាកដជាបានស្គាល់ច្បាស់ពីតារាសម្តែងស្រីស្អាត ខន សូរិយា តាមរយៈតួនាងរីណា ក្នុងរឿង «មន្តស្នេហ៍អ្នកគ្រូពេទ្យឆ្នាស់» ដែលកំពុងចាក់ផ្សាយលើកញ្ចក់ទូរទស្សន៍ CTN ដែលខ្សែភាពយន្តនេះ នាងជាតួរង បន្ទាប់ពីតួឯក គឺកញ្ញា សាន កុសមៈ ដែលជាម្ចាស់ជ័យលាភីកញ្ញាឯកសង្ក្រាន្តឆ្នាំ២០២១។
ជានិស្សិតទើបតែបញ្ចប់ថ្នាក់បរិញ្ញាបត្រផ្នែកច្បាប់កញ្ញា ខន សូរិយា បានលើកឡើងប្រាប់កោះសន្តិភាពតាមសារអេឡិចត្រូនិចថា នាងពិតជាមានអារម្មណ៍សប្បាយរីករាយយ៉ាងខ្លាំង ក្នុងពេលដែលនាងមានឱកាសបង្ហាញវត្តមានសម្តែងជាលើកដំបូងក្នុងខ្សែភាពយន្តភាគរឿង «មន្តស្នេហ៍អ្នកគ្រូពេទ្យឆ្នាស់» ដែលកំពុងចាក់ផ្សាយតាមកញ្ចក់ទូរទស្សន៍ ។
នាងបញ្ជាក់ថា តាំងពីតូចមក នាងមានចំណង់ចំណូលចិត្តនូវការសម្តែងនេះផងដែរ ប៉ុន្តែនាងគ្មានឱកាស ដោយនាងគ្រាន់តែអាចសម្តែងថតរឿងខ្លីៗបង្ហោះតាមបណ្តាញសង្គម TIK TOK តែប៉ុណ្ណោះ ក្នុងពេលដែលឃ្លីបវីដេអូដែលក្រុមរបស់នាងសម្តែងនោះ ក៏ទទួលបានការនិយមចូលទស្សនាជាច្រើនពីបណ្តាអ្នកលេងអ៊ីនធើរណែតផងដែរ។
នាងបន្តថា ដោយសារការមើលឃើញពីការសម្តែងខាងលើនេះហើយ ទើបផលិតកម្ម Studio4 មានការចាប់អារម្មណ៍ ក៏ហៅនាងឲ្យមកធ្វើតេស្តសម្តែងតួនាង រីណា ក្នុងរឿង «មន្តស្នេហ៍អ្នកគ្រូពេទ្យឆ្នាស់» នេះតែម្តង ខណៈពេលដែលការធ្វើតេស្តតួនាពេលនោះ គឺនាងក៏បានជាប់ ដោយសារនាងអាចសម្តែងទៅតាមតួអង្គដែលផលិតករចង់បាន។
តារាសម្តែងដែលមានដើមកំណើតនៅរាជធានីភ្នំពេញ ស្រីស្អាត ខន សូរិយា បានលើកឡើងបន្ថែមថា កន្លងមក នាងមិនបានចូលហាត់រឿន ឬចូលរួមប្រកួតក្នុងកម្មវិធីអ្វីនោះឡើយ ប៉ុន្តែដោយសារនិស្ស័យចូលចិត្តខាងសម្តែងនេះ បានធ្វើឲ្យនាងតែងតែដុះខាត់ការសម្តែងរបស់ខ្លួនតាមរយៈការមើលយូធូប ហើយពេលសម្តែងនោះក៏ទទួលបានការបង្ហាត់បង្ហាញពីផលិតករផងដែរ។
តែយ៉ាងណា នាងទទួលស្គាល់ថា ការសម្តែងលើកដំបូងនេះ នាងពិតជាមានការពិបាកច្រើន ប៉ុន្តែដោយសារជួយជ្រោមជ្រែងពីអ្នកដឹកនាំរឿង ទើបធ្វើឲ្យនាងសម្រេចបានលទ្ធផលនៃការសម្តែងរឿងខាងលើនេះរហូតបានដល់ចប់ និងទទួលបានការលើកសរសើរពីអ្នកដឹកនាំរឿងខ្លះៗផងដែរ។
ទោះជាយ៉ាងណា តារាសម្តែងដែលមានវ័យ២៤ឆ្នាំ កញ្ញា ខន សូរិយា បានសម្តែងក្តីរំពឹងថា ទៅថ្ងៃអនាគតនាងក៏មិនប្រាកដខ្លួនឯងដែរថា នឹងអាចប្រឡូកក្នុងសិល្បៈឲ្យបានពេញដៃនោះឡើយ ប៉ុន្តែប្រសិនបើមានឱកាសម្តែងតួធំថ្មីបន្ថែមទៀតនោះ នាងនឹងឆក់ឱកាសនេះ ដើម្បីចាប់អាជីពសិល្បៈនេះបន្តទៀតនាពេលអនាគត។
ដោយឡែកពាក់ព័ន្ធនឹងបញ្ហាស្នេហាវិញ តារាសម្តែងស្រស់ស្អាត ខន សូរិយា ហាក់មិនចង់បើកកកាយបញ្ហាផ្ទាល់ខ្លួនរបស់នាងឡើយ ពោលគឺនាងសុំលាក់ទុកសិន ព្រោះបច្ចុប្បន្ននាងចង់ពង្រឹងខ្លួនឯងឲ្យកាន់តែរឹងមាំជាងនេះថែមទៀត ទាំងអាជីពការងារ និងសម្តែង ខណៈពេលដែលនាងក៏នៅមានវ័យនៅក្មេងនៅឡើយ៕
ចែករំលែកព័តមាននេះ