រាជធានីភ្នំពេញ ៖ វែបសាយ Myphsar.com គឺជាវែបសាយថ្មីសម្រាប់អ្នកប្រើប្រាស់ប្រព័ន្ធអីុនធើណេតអាចដាក់លក់ និងទិញទំនិញគ្រប់ប្រភេទទៅតាមតម្រូវការ តែរាល់ទំនិញទាំងនោះ ត្រូវជាទំនិញដែលស្របច្បាប់ត្រឹមត្រូវ ។ វែបសាយនេះ បានដាក់សម្ពោធប្រកាសប្រើប្រាស់ជាផ្លូវការកាលពីល្ងាចថ្ងៃទី៨ កក្កដា ២០១៦ នៅផ្សារទំនើបអ៊ីអនម៉ល ដោយមានវត្តមានកញ្ញា ឡូរ៉ា ម៉ម ឯកអគ្គរាជទូតរបស់វែបសាយ Myphsar.com និងក្រុមភ្លេងខ្មែរផងដែរ ។
នៅមុខមហាជនជាច្រើននៅផ្សារទំនើបអីុអន កញ្ញា Stacie’s អ្នកគ្រប់គ្រងវែបសាយមួយនេះបានអោយដឹងថា ដោយសារតែបច្ចេកវិទ្យាទំនើប កំណើនអ្នកប្រើប្រាស់អីុនធើណេតក៏កាន់តែច្រើន ដូចនេះហើយទើបក្រុមហ៊ុនពួកយើងបានបង្កើតវែបសាយនេះឡើង ដើម្បីសម្រួលដល់ការទិញអីុវ៉ាន់នានា តាមប្រព័ន្ធអនឡាញ ។ មិនតែប៉ុណ្ណោះ ក៏អាចដាក់ទំនិញរបស់ខ្លួននៅលើវែបសាយរបស់យើងបានថែមទៀតផង ដោយគ្រាន់តែចុះឈ្មោះធ្វើជាសមាជិក ។
កញ្ញាបន្តថា Myphsar ប្រៀបដូចជាផ្សារមួយអញ្ចឹងដែរ តែវាជាផ្សារអនឡាញ ហើយអ្នកប្រើប្រាស់ដូចជាអ្នកលក់ និងអ្នកទិញតាមប្រព័ន្ធអនឡាញរបស់យើង មិនទាមទារអោយមានការបង់ប្រាក់អ្វីទាំងអស់ ។
កញ្ញា Marta ស្ថាបនិកវែបសាយ Myphsar មួយរូបដែរនោះបានអោយដឹងថា ចំពោះកញ្ញាផ្ទាល់សព្វថ្ងៃហាក់ដូចជាខ្ចិលក្នុងការដើរផ្សារ ព្រោះនៅទីក្រុងភ្នំពេញមានការស្ទះចរាចរណ៍ច្រើន ដូចនេះធ្វើអោយការចំណាយការធ្វើដំណើរ និងពេលវេលាក៏ច្រើន ។ ម្យ៉ាងទៀតជួនកាលក៏ភ្លៀង ជួនកាលក៏ក្ដៅ ធ្វើអោយពិបាកធ្វើដំណើរទៅផ្សារ ចឹងហើយនៅពេលយើងមានវែបសាយដែលអាចដាក់លក់ និងទិញទំនិញតាមអនឡាញ យើងអាចណាត់ជួបគ្នានៅកន្លែងណាមួយដែលគិតថា ងាយស្រួល រួចដោះដូរទំនិញគ្នាជារឿងដ៏ល្អប្រសើរបំផុត ។
ចែករំលែកព័តមាននេះ