រាជធានីភ្នំពេញ ៖ កាលពីថ្ងៃច័ន្ទ ទី០៤ កក្កដា កន្លងមកនេះ សិស្សសាលាអន្តរជាតិហ្សាម៉ាន់ ១ក្រុមតំណាងឱ្យកម្ពុជាដែលទទួលបានជ័យលាភីពីការប្រកួតមណ្ឌលអាស៊ាន +៣ ផ្នែកវិទ្យាសាស្ត្រ២០១៦ នៅប្រទេសហ្វីលីពីន
រាជធានីភ្នំពេញ ៖ កាលពីថ្ងៃច័ន្ទ ទី០៤ កក្កដា កន្លងមកនេះ សិស្សសាលាអន្តរជាតិហ្សាម៉ាន់ ១ក្រុមតំណាងឱ្យកម្ពុជាដែលទទួលបានជ័យលាភីពីការប្រកួតមណ្ឌលអាស៊ាន +៣ ផ្នែកវិទ្យាសាស្ត្រ២០១៦ នៅប្រទេសហ្វីលីពីន កាលពីខែមិថុនាកន្លងមកនេះ ត្រូវបានលោកហុង ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា អនុញ្ញាតិឱ្យចូលជួបសំណេះសំណាលអស់រយៈពេលជិត២ម៉ោង នៅទីស្ដីការក្រសួងអប់រំ យុវជន និងកីឡា។
គួររំលឹកផងដែរថា សិស្សសាលាអន្តរជាតិហ្សាម៉ាន់ បានតំណាងឱ្យប្រទេសកម្ពុជាទៅចូលរួមប្រកួតក្នុងព្រឹត្តិការណ៍អាស៊ាន+៣ វិទ្យាសាស្ត្រលើកទី៥ ស្ដីពីបម្រែបម្រួលអាកាសធាតុព្រៃលិចទឹក ដែលព្រឹត្តិការណ៍នេះធ្វើឡើងនៅសាកលវិទ្យាល័យ ហ្វីលីពីនឡូសបាណូស (The University of Philipines, Los Banos) នៅក្នុងខេត្តឡាហ្គូណា (Laguna) កាលពីថ្ងៃទី១២ ដល់ថ្ងៃទី១៨ មិថុនា ២០១៦ កន្លងទៅនេះ។
ប្រធានបទនៃព្រឹត្តិការណ៍អាស៊ាន+៣ វិទ្យាសាស្ត្រលើកទី៥ នេះ ត្រូវបានគេធ្វើឡើងក្នុងគោលបំណង ដើម្បីបណ្ដុះបណ្ដាល និងអភិវឌ្ឍកុមារដែលមានទេពកោសល្យ និងមានសមត្ថភាពក្នុងវិស័យវិទ្យាសាស្ត្រ និងបច្ចេកវិទ្យា។ មិនតែប៉ុណ្ណោះព្រឹត្តិការណ៍ អាស៊ាន+៣ លើកទី៥ ស្ដីពីបម្រែបម្រួលអាកាសធាតុ និងព្រៃលិចទឹក បានផ្ដល់ឱកាសដ៏ប្រសើរមួយ ដើម្បីពង្រឹងទំនាក់ទំនងល្អរវាងប្រទេសអាស៊ាន និងជាតិសាសន៍របស់យើងជាមួយនឹងភ្ញៀវដែលមកពីបណ្ដាប្រទេសផ្សេងៗ។ លើសពីនេះទៅទៀត វាក៏បានផ្ដល់ឱកាសដ៏ល្អសម្រាប់គ្រូបង្រៀនផ្នែកវិទ្យាសាស្ត្រ ក្នុងការស្វែងរកវិធីសាស្ត្រល្អ ដើម្បីអភិវឌ្ឍនៃការអប់រំរបស់ពួកគាត់។
នៅក្នុងព្រឹត្តិការណ៍នេះ មានបណ្ដាប្រទេសនៃតំបន់អាស៊ីចំនួន១០ ចូលរួមបន្ថែមពីនេះមានប្រទេសចិន ប្រទេសចិនតៃវ៉ាន់ កូរ៉េ ជប៉ុន និងស៊ុយអែត ដែលមានសិស្សសរុប៨០នាក់ និងគ្រូ២៦នាក់ ចំណែកសិស្សសាលាហ្សាម៉ាន់ដែលតំណាងឱ្យប្រទេសកម្ពុជា ទៅចូលរួមប្រកួតលើកនេះ ឈ្នះបានមេដាយមាស៤គ្រឿង និងសំរិទ្ធ១គ្រឿង។ ហើយនៅពេលថ្មីនេះទៀត សិស្សសាលាអន្តរជាតិហ្សាម៉ាន់ ចំនួន២៣នាក់ ដែលបាននាំយកគម្រោងចំនួន១២ទៅប្រកួតក្នុងព្រឹត្តិការណ៍ Genius Olympiad អន្តរជាតិ ២០១៦ នៅសាកលវិទ្យាល័យនៃទីក្រុងញ៉ូវយ៉ក សហរដ្ឋអាមេរិក មានសិស្សចំនួន១៧នាក់ឈ្នះមេដាយមាស៣គ្រឿង ប្រាក់៤គ្រឿង និងសំរិទ្ធ១០គ្រឿង នៅលើគម្រោងចំនួន៩ ដែលមានសិស្សមកចូលរួមប្រកួតចំនួន៦៥ប្រទេស និង៤០រដ្ឋរបស់សហរដ្ឋអាមេរិក៕
ចែករំលែកព័តមាននេះ