ពលរដ្ឋ៩នាក់ មកពីស្រុកបន្ទាយស្រី ត្រូវបានតុលាការកោះហៅឱ្យចូលខ្លួនបំភ្លឺរឿងជម្លោះដីធ្លី ត្រូវបានក្រុមគ្រួសារ និងអ្នកភូមិលើកគ្នាជិត៤០នាក់ មកកាន់តុលាការដែរដើម្បី
ខេត្តសៀមរាប ៖ ពលរដ្ឋ៩នាក់ មកពីស្រុកបន្ទាយស្រី ត្រូវបានតុលាការកោះហៅឱ្យចូលខ្លួនបំភ្លឺរឿងជម្លោះដីធ្លី ត្រូវបានក្រុមគ្រួសារ និងអ្នកភូមិលើកគ្នាជិត៤០នាក់ មកកាន់តុលាការដែរដើម្បីតាមដាន ពិសេសខ្លាចតុលាការចោទប្រកាន់តំណាងទាំង៩នាក់ ត្រូវចាប់ខ្លួនឃុំនៅពន្ធនាគារ ។
សូមបញ្ជាក់ថា នៅរសៀលថ្ងៃទី១៣ ខែមករា ឆ្នាំ២០២២នេះ ក្រុមអ្នកភូមិដែលបានលើកគ្នាមកកាន់តុលាការ បានឱ្យដឹងថា ពួកគាត់លើកគ្នាមកនេះ គឺក្នុងគោលដៅផ្តល់កម្លាំងចិត្តដល់អ្នកដែលតុលាការកោះហៅ ឱ្យចូលខ្លួនមកបំភ្លឺ មិនមែនមកប្រឆាំងឬតវ៉ានិងអំណាចដីកាតុលាការនោះឡើយ ។ ប៉ុន្តែក្នុងករណីតុលាការសាកសួរហើយមិនឱ្យចេញមកវិញ ឬត្រូវឃុំខ្លួនពួកគាត់ទាំងអស់ក៍មិនវិលទៅផ្ទះវិញដែរ គឺសុខចិត្តដេកនៅទីនោះរហូតមានការដោះលែង ។
ចំពោះឈ្មោះអ្នកដែលត្រូវបានតុលាការកោះ ហៅនោះ មានរហូត១៨នាក់ តែសម្រាប់ថ្ងៃទី១៣ ខែមករា ឆ្នាំ២០២២នេះ បានចូលខ្លួនតែ៩នាក់ប៉ុណ្ណោះ ។ អុីចឹងទេក្នុងសំណុំ រឿងជម្លោះដីធ្លីនេះ ពួកគាត់មានការបារម្ភយ៉ាងខ្លាំងចំពោះផ្លូវតុលាការ ពីព្រោះថា ក្នុងដីកាបានចោទពីបទ ធ្វើឱ្យខូចខាតដោយចេតនា ។ ហេតុ ដូច្នេះការលើកគ្នាមកកាន់តុលាការនេះ ក្រៅពីផ្តល់កម្លាំងចិត្តដល់អ្នកចូលបំភ្លឺ ពួកគាត់ក៏ទទូច សុំស្ថាប័នតុលាការក៏ដូចជាថ្នាក់ដឹកនាំមេត្តាជួយដោះស្រាយជូនពួកគាត់ផង ។
ក្រុមអ្នកភូមិបានឱ្យដឹងទៀតថា ដីទំនាស់រ៉ាំរ៉ៃនេះមានទំហំ៤១០ហិកតា ស្ថិតក្នុងភូមិស្រះខ្វាវ ឃុំត្បែង ស្រុកបន្ទាយស្រី ខេត្តសៀមរាប បច្ចុប្បន្នប្រជាពលរដ្ឋ ចំនួន៣០២គ្រួសារកំពុងរស់នៅនិងអាស្រ័យផលរាល់ថ្ងៃ ។ ហើយដីនេះផ្តើមមានទំនាស់ជាមួយខាងយោធា និងខាងបរិស្ថាន ចាប់ពីឆ្នាំ២០០៣មកម្ល៉េះ ។ កាលពីឆ្នាំ១៩៨៧រហូតឆ្នាំ២០០២ ពួកគាត់គ្រប់គ្រងច្រើនរយហិកតា លុះឆ្នាំ ២០០៣ អាជ្ញាធរបានដកហូតដីមួយចំនួនដែលពួកគាត់បានដាំដើមឈើយកទៅធ្វើឧទ្យានជាតិ ។ ហើយដីដែលនៅសល់ពីរដ្ឋចំនួន៤១០ហិកតា គឺពួកគាត់ជាអ្នកគ្រប់គ្រងអាស្រ័យផលរាល់ថ្ងៃមានចំនួន៣០២គ្រួសារ ។ ប៉ុន្តែថ្មីៗនេះ ក៏លេចឈ្មោះ លី ស្រី ភេទស្រី ជាដើមបណ្តឹងទៅវិញ ។ ហេតុផលដូច្នេះហើយដែលពួកគាត់ទទូចសុំឱ្យថ្នាក់លើ ក៏ដូចជាស្ថាប័នពាក់ពាន់ជួយដោះស្រាយ ពីព្រោះពួកគាត់ធ្លាប់ដាក់ពាក្យសុំអន្តរាគមន៍ទៅសម្តេចពញាចក្រី ហេង សំរិន ប្រធានរដ្ឋសភារួចហើយ ។
ពលរដ្ឋដែលលើកគ្នាមកកាន់តុលាការនោះដែរក៏ឃើញមានវត្តមានតំណាងអយ្យការ អមសាលាដំបូងខេត្តសៀមរាបចេញមកបកស្រាយ និងបំភ្លឺជុំវិញករណីរឿង បងប្អូនចូលបំភ្លឺតាមការកោះហៅរបស់តុលាការនោះ គឺមិនមានអ្នកជាប់គុកនោះទេ គ្រាន់តែហៅមកសួរនាំប៉ុណ្ណោះ ។ តំណាងអយ្យការបន្តថា សូមឱ្យបងប្អូនកុំធ្វើអ្វីផ្តេសផ្តាសទុកឱ្យខាងតុលាការធ្វើការសិន ចំពោះអ្នកដែលចូលទៅបំភ្លឺនោះចេញមកវិញ សូមបងប្អូននាំគ្នាត្រឡប់ទៅផ្ទះវិញទៅ ។
បើយោងតាមលិខិតរដ្ឋសភាលេខ ០១៣. សរ.គ១ ដែលបានជម្រាបជូនអភិបាលខេត្តសៀមរាបបញ្ជាក់ថា គណ:កម្មការសិទ្ធិមនុស្សទទួលពាក្យបណ្តឹងអង្កេត និងទំនាក់ទំនងរដ្ឋសភា ព្រឹទ្ធសភា សូមបញ្ជូនសំណុំរឿងនេះជូនអភិបាលខេត្តពិនិត្យនិងដោះស្រាយតាមការគួរ ហើយផ្តល់លទ្ធផលនៃការដោះស្រាយមកគណ:កម្មការ ដើម្បីមានមូលដ្ឋានជម្រាបជូនម្ចាស់សំណើរវិញ ។
ទោះបីយ៉ាងណា នៅល្ងាចថ្ងៃដដែលក្រុមអ្នកភូមិដែលបានចូលទៅបំភ្លឺនៅក្នុងតុលាការ បានចេញមកវិញហើយនិងបានវិលទៅផ្ទះរៀងៗខ្លួនវិញ ដោយទឹកមុខស្រស់ស្រាយ ។ ប៉ុន្តែប្រសិនបើអ្នកណាម្នាក់ត្រូវឃុំខ្លួនមិនដឹងផ្ទុះរឿងយ៉ាងណាយ៉ាងណីទេ ជាមួយអ្នកស្រុកដ៏ច្រើននេះ ៕
ចែករំលែកព័តមាននេះ