ខេត្តប៉ៃលិន ៖ លោកជំទាវ បាន ស្រីមុំ អភិបាលខេត្តប៉ៃលិន បានផ្ដាំផ្ញើលោកគ្រូ អ្នកគ្រូ សូមរាយការណ៍បន្ទាន់ករណីសិស្សមានអាការៈមិនប្រក្រតី ឬសង្ស័យទាក់ទងនឹងជំងឺកូវីដ-១៩…
ខេត្តប៉ៃលិន ៖ លោកជំទាវ បាន ស្រីមុំ អភិបាលខេត្តប៉ៃលិន បានផ្ដាំផ្ញើលោកគ្រូ អ្នកគ្រូ សូមរាយការណ៍បន្ទាន់ករណីសិស្សមានអាការៈមិនប្រក្រតី ឬសង្ស័យទាក់ទងនឹងជំងឺកូវីដ-១៩ នៅពេលចូលរៀនវិញនេះ ។ ការថ្លែងនេះ ធ្វើឡើងនៅក្នុងពិធីបើកបវេសកាលឆ្នាំសិក្សាថ្មី២០២១-២០២២ នៅវិទ្យាល័យ ហ៊ុន សែនកក្រុងទេពនិម្មិត ស្ថិតក្នុងភូមិអូរតាពុកក្រោម សង្កាត់ទួលល្វា ក្រុងនិងខេត្តប៉ៃលិន នាព្រឹកថ្ងៃទី១១ ខែមករា ឆ្នាំ២០២២ ។
លោកជំទាវ បានមានប្រសាសន៍ផ្តាំផ្ញើដល់លោកគ្រូ អ្នកគ្រូ សូមពិនិត្យឱ្យមែនទែនអំពីអាការៈសិស្សានុសិស្ស បើឃើញថាមានអ្វីមិនប្រក្រតីសូមរាយការណ៍ជាបន្ទាន់ ហើយត្រូវផ្សព្វផ្សាយឱ្យបានទូលំទូលាយដល់អាណាព្យាបាលគ្រប់រូប ពេលកូនមករៀនត្រូវពាក់ម៉ាស ចូលដល់សាលាត្រូវលាងដៃឱ្យបានគ្រប់គ្នា។
ក្នុងឱកាសនោះ លោកជំទាវបានមានមតិសំណោះសំណាល ផ្តាំផ្ញើដល់ប្អូនៗក្មួយៗ ត្រូវខិតខំរៀនសូត្រ និងថែរក្សាសុខភាព អនាម័យឱ្យបានល្អ ហើយត្រូវធ្វើជាសិស្សល្អ កូនល្អ និងត្រូវឆ្លើយថាទេចំពោះគ្រឿង ញៀន ជាពិសេសត្រូវបន្តអនុវត្តឱ្យបានខ្ជាប់ខ្ជួនតាមវិធានការរបស់ក្រសួងសុខាភិបាល ៣កុំ និង៣ការពារ និងបន្តការចាក់វ៉ាក់សាំងការពារជំងឺកូវីដ-១៩ តាមកម្មវិធីដែលក្រសួងបានដាក់ជូន។
យោងតាមរបាយកាណ៍ លោក តង់ ធារ៉ា ប្រធានមន្ទីរអប់រំ យុវជន និង កីឡាខេត្តប៉ៃលិន បានឱ្យដឹងថា ឆ្នាំសិក្សាថ្មី២០២១-២០២២ គ្រឹះស្ថានសិក្សាសាធារណៈទូទាំងខេត្តនឹងដំណេីរការរៀន និងបង្រៀន មានមធ្យមសិក្សា៩កន្លែង វិទ្យាល័យចចំនួន០២កន្លែង និងអនុវិទ្យាល័យ ចំនួន០៧កន្លែង មានសិស្សសរុប៥៧២៣នាក់ ក្នុងនោះស្រី៣១១៦នាក់ បឋមសិក្សាសាធារណៈ និងឯកជន ចំនួន៥៦សាលា មានសិស្សសរុប១១៧៥៤ ស្រី៥៦៩៥នាក់ មេតេយ្យសាធារណៈ មត្តេយ្យសហគមន៍ និងមត្តេយ្យឯកជន ២០៦០នាក់ ស្រី ៨៣៧នាក់។ បុគ្គលិកអប់រំសរុប ៨២៥ នាក់ ស្រី៤០១នាក់៕
ចែករំលែកព័តមាននេះ