កូនខ្មែរ១រូប ពីជនភៀសខ្លួន ក្លាយជាអភិបាលក្រុង នៅអាមេរិក
អាមេរិក ៖ លោក សុខារី ចូវ (Sokhary Chau) ដែលជាជនភៀសខ្លួនរបបខ្មែរក្រហម បានក្លាយអភិបាលក្រុងឡូវែល (Lowell)។
អាមេរិក ៖ លោក សុខារី ចូវ (Sokhary Chau) ដែលជាជនភៀសខ្លួនរបបខ្មែរក្រហម បានក្លាយអភិបាលក្រុងឡូវែល (Lowell)។ លោកគឺជាពលរដ្ឋអាមេរិកដើមកំណើតខ្មែរដំបូងបង្អស់ដែលកាន់តំណែងនេះនៅអាមេរិក។
លោក សុខារី ចូវ សមាជិកក្រុមប្រឹក្សាក្រុងឡូវែល នៃរដ្ឋ Massachusetts ត្រូវបានជ្រើសរើសជាឯកច្ឆ័ន្ធដោយសមាជិកក្រុមប្រឹក្សារបស់គាត់ឲ្យកាន់តំណែងកំពូលនេះកាលពីថ្ងៃច័ន្ទដើមសប្តាហ៍នេះ។ លោកក៏ជាពលរដ្ឋអាមេរិកដើមកំណើតអាស៊ីដែលកាន់តំណែងជាអភិបាលក្រុងនេះផងដែរ។
ពេលថ្លែងសុន្ទរកថាអំឡុងការស្បថចូលកាន់តំណែង លោកបានរម្លឹកឡើងវិញនូវអនុស្សារីយ៍នៃការមកដល់ទឹកដីអាមេរិក ក្រោយពេលរួចផុតពីរបបខ្មែរក្រហមនៅកម្ពុជា។ លោកក៏មានក្តីរំជួលចិត្តយ៉ាងខ្លាំង នៅពេលត្រូវបានជ្រើសរើសដោយសមាជិកឲ្យកាន់តំណែងអភិបាលក្រុង។
លោកថ្លែងដូច្នេះថា «ព្រះជាម្ចាស់ប្រទានពរដល់អាមេរិក។ ខ្ញុំគឺជាជនភៀសខ្លួន ឥឡូវនេះខ្ញុំគឺជាអភិបាលនៃក្រុងដ៏ធំនៅរដ្ឋ Massachusetts»។
អភិបាលក្រុងវ័យ ៤៩ឆ្នាំរូបនេះបន្តទៀតថា «ខ្ញុំមិនដឹងថាតើវាអាចកើតឡើងនៅកន្លែងផ្សេងទៀតទេក្នុងពិភពលោក។ ខ្ញុំនៅតែព្យាយាមស្រូបយកវា»។
លោកថ្លែងថា «ក្នុងនាមជាពលរដ្ឋអាមេរិកដើមកំណើតខ្មែរដ៏មានមោទនភាព ខ្ញុំកំពុងឈរលើស្មាជនអន្តោប្រវេសន៍ជាច្រើនដែលមកដល់មុនខ្ញុំដើម្បីកសាងទីក្រុងនេះ»។
លោកក៏បានរៀបរាប់ផងដែរអំពីឪពុករបស់លោកដែលជាមេទ័ពក្នុងជួរកងទ័ពកម្ពុជា ដែលត្រូវបានរបបកុម្មុយនីស្តខ្មែរក្រហមសម្លា.ប់ក្នុងឆ្នាំ ១៩៧៥ អំឡុងសង្គ្រាមស៊ីវិល។
លោកនិយាយថា ម្តាយរបស់លោក ដែលបានទទួលមរណៈភាពកាលពីឆ្នាំមុនបានមើលថែកូនចំនួន៧នាក់ឲ្យអស់រយៈពេល ៤ឆ្នាំឲ្យរួចផុតពីគ្រាប់មីន ព្រៃ ភាពអត់ឃ្លាន ជំងឺឈឺថ្កាត់ និងភាពមិនច្បាស់លាស់ ដើម្បីបញ្ជូនពួកគេដោយសុវត្ថិភាពទៅកាន់អាមេរិក។
លោកលើកឡើងទៀតថា អាមេរិកប្រហែលមិនមានផ្លូវក្រាលមាសដូចដែលគ្រួសាររបស់លោកធ្លាប់គិតស្រម៉ៃនោះទេ ខណៈរស់នៅក្នុងជំរុំជនភៀសខ្លួន ប៉ុន្តែអាមេរិកគឺជាទឹកដីប្រជាធិបតេយ្យ ដោយសារតែប្រព័ន្ធត្រួតពិនិត្យ និងតុល្យភាព និងគោលការណ៍ស្មើភាព យុត្តិធម៌ និងតម្លាភាព។
«នៅពេលខ្ញុំអាយុ ៩ឆ្នាំ គ្រួសារខ្ញុំបានតាំងទីលំនៅដំបូងនៅទីក្រុង Pittsburgh រដ្ឋ Pennsylvania ដោយមានការជួយពីព្រះវិហារកាតូលិក។ បទពិសោធន៍ដ៏វិសេសវិសាលដែលផ្តល់ដោយព្រះវិហារ បានជំរុញពួកយើងឲ្យប្រែមកកាន់គ្រឹស្តសាសនា»។
សូមបញ្ជាក់ថាបច្ចុប្បន្ន ទីក្រុងឡូវែល (Lowell) មានប្រជាជនរស់នៅជាង ១១៥.០០០នាក់ ដែលក្នុងនោះមានប្រជាជនអាស៊ីជិត ២៥ភាគរយ និងជាទីក្រុងមានប្រជាពលរដ្ឋខ្មែររស់នៅច្រើនបំផុតទី ២ក្នុងសហរដ្ឋអាមេរិក៕ (យោងតាមប្រភព៖ VOA & republicworld)
ចែករំលែកព័តមាននេះ