ខេត្តភូកេតរបស់ថៃបន្តបើកទទួលភ្ញៀវទេសចរ ទោះអត្រាឆ្លងកូវីដកើនឡើងខ្លាំង
ថៃ ៖ អភិបាលខេត្តភូកេត (Phuket) បានប្រកាសថាខេត្តរបស់លោកនៅតែបន្តបើកទទួលអ្នកទេសចរ ទោះបីមានការឆ្លងកូវីដ
ថៃ ៖ អភិបាលខេត្តភូកេត (Phuket) បានប្រកាសថាខេត្តរបស់លោកនៅតែបន្តបើកទទួលអ្នកទេសចរ ទោះបីមានការឆ្លងកូវីដ ១៩ថ្មីកើនឡើងខ្ពស់ក្តី។ ការប្រកាសរបស់លោកបានកាត់បន្ថយការព្រួយបារម្ភរបស់អ្នកប្រកបអាជីវកម្មឡើងវិញ ដែលចាប់ផ្តើមទទួលបានប្រាក់ចំណូលពីវិស័យទេសចរណ៍។
លោក Narong Wunsiew ថ្លែងថា ខេត្តលោកនឹងនៅតែទទួលភ្ញៀវទេសចរក្រោមកម្មវិធីផ្សព្វផ្សាយទេសចរណ៍ សម្រាប់ជាប្រយោជន៍នៃការរក្សាតុល្យភាពរវាងការគ្រប់គ្រងកូវីដ ១៩ និងការជំរុញសេដ្ឋកិច្ច។
លោកថ្លែងកាលពីថ្ងៃពុធថា «ខណៈដែលយើងមានគោលបំណងទប់ស្កាត់កូវីដ ១៩ក្នុងពេលជំរុញសេដ្ឋកិច្ច យើងទទួលបានការអង្វរកុំឲ្យបិទខេត្តកោះនេះ ព្រោះការធ្វើបែបនោះនឹងធ្វើឲ្យប៉ះពាល់ដល់សេដ្ឋកិច្ចរបស់ខេត្ត»។
ចាប់ពីថ្ងៃសៅរ៍ ដល់ថ្ងៃច័ន្ទកន្លងទៅនេះ ភ្ញៀវទេសចរណ៍សរុបចំនួន ១០.១៣២នាក់ បានធ្វើដំណើរមកខេត្តភូកេត។ លោកអភិបាលខេត្តនិយាយថា ចំនួនអ្នកទេសចរដ៏ច្រើនបែបនេះជាកាដូរដ៏ធំសម្រាប់សេដ្ឋកិច្ចក្នុងតំបន់។
លោកថ្លែងបន្តទៀតថា ខេត្តភូកេតបានធ្វើតេស្តអ្នកទេសចរចន្លោះ ៣.០០០ ទៅ ៥.០០០នាក់ក្នុងមួយថ្ងៃដើម្បីរកកូវីដ ១៩ ហើយអ្នកទេសចរជាមធ្យមចន្លោះ ៣០ ទៅ ៥០នាក់មានវិជ្ជមានកូវីដ ១៩។
ខេត្តនេះមានសណ្ឋាគារចំនួន ៦៦សម្រាប់ធ្វើចត្តាឡីស័កអ្នកវិជ្ជមានកូវីដ ១៩ដែលមានរោគសញ្ញាពីស្រាលទៅមធ្យម។
កាលពីថ្ងៃអង្គារកន្លងទៅនេះ ខេត្តនេះរកឃើញអ្នកឆ្លងវីដ ១៩ថ្មីចំនួន ២១៥នាក់ ដែលជាកំណត់ត្រាឆ្លងដ៏ខ្ពស់បំផុតក្នុងរយៈពេល ១ខែ៕ (យោងតាមប្រភព៖ Bangkok Post)
ចែករំលែកព័តមាននេះ